နမ္မတူမြို့နယ် မန်စံဘုန်းကြီးကျောင်းမှ စစ်ဘေးရှောင်များ နေရပ်သို့ ပြန်သွားပြီး နာရီပိုင်းအကြာ ပစ်ခတ်တိုက်ခိုက်မှုထပ်ဖြစ်သဖြင့် ရွာသားများ ဘုန်းကြီးကျောင်းသို့ပြန်လည်ထွက်ပြေး လာခဲ့ကြကြောင်းသိရသည်။
ဒီဇင်ဘာ (၁၇) ရက်ည နမ့်တောင်ကုန်းအုပ်စု နားကျဲကျေးရွာအနီး TNLA နှင့် RCSS တို့အကြား ပစ်ခတ်တိုက်ခိုက်မှုများကြောင့် နားကျဲရွာသားနှင့်ထိုအနီးရှိ ပန်ချင်အုပ်စုဝင် ပိန်းလုံကျေးရွာ၊ ကွန်ကျောင်းကျေးရွာ နှင့် ဒေသခံများသည် မန်စံရွှေစကားဝါ ဘုန်းကြီးကျောင်းသို့ပြန်လည်ရောက်ရှိ လာကြောင်း သိရသည်။
“မနေ့ညနေက ထိတွေ့မှုဖြစ်တယ်။ ချက်ချင်းဘဲ မနေ့ညနေက ပြန်ရောက်လာတယ်။ မူရင်းရှိပြီးသား စစ်ရှောင်တွေက ပြန်သွားတယ်။ အိမ်မှာ တစ်ညသွားအိပ်တယ်။ အထုပ်တောင်မဖြည်သေးဘူး တစ်ညအိပ်ပြီးတော့ နောက်တစ်ရက်မှာ တိုက်ပွဲဖြစ်တော့ ချက်ချင်းပြန်ရောက်လာတယ်။” ဟု နမ္မတူမြို့နယ် ပြည်သူ့လွှတ်တော်အမတ် နန်းခမ်းအေး က သျှမ်းသံတော်ဆင့် ကိုပြောသည်။
ယနေ့ ဒီဇင်ဘာ (၁၈) ရက် နံနက်အစောပိုင်းကစပြီး နားကျဲရွာပိုင်းက ပစ်ခတ်သံများ နေ့ခင်းပိုင်းအချိန်အထိ ကြားနေရကြောင်း လားရှိုး-မန်စံကားလမ်းမဘေးရှိ နားကျိုင်းမှရွာသားက သျှမ်းသံတော်ဆင့် ကိုပြောသည်။
“ဒီနေ့ ရွာပေါင်း (၃) ရွာ ပိန်းလုံ ကွန်ကျောင်း နားကျဲ အိမ်ထောင်စု (၅၂) စု လူဦးရေ (၁၅၈) မန်စံရွှေစကားဝါ ကျောင်းတိုက်မှာ ရောက်ရှိနေပါတယ်။ မနေ့ည ရောက်လာတာက (၄၇) အိမ် လူဦးရေ (၁၄၅) ဒီမနက် နညး်နည်း ထပ်တိုးလိုက်တော့ (၅၂) အိမ်ဖြစ်သွားတယ်။” ဟု နန်းခမ်းအေး ကပြောသည်။
TNLA နှင့် RCSS/SSA တို့ ယမန်နေ့ညက တိုက်ပွဲဖြစ်ပွားခဲ့ကြောင်းကို (TNLA) သတင်းနှင့် ပြန်ကြားရေးဌာနက ဒီဇင်ဘာ (၁၇) ရက်နေ့က ၎င်းတို့၏ ဖေ့ဘုတ်စာမျက်နှာမှာရေးသားထား သည်။
“မနေ့ည တိုက်ပွဲဖြစ်တာ ဟုတ်ပါတယ်။ ၅ မိနစ်လောက် ဖြစ်တာပါ။”ဟု RCSS/SSA ၏ပြောရေးဆိုခွင့်ရှိသူ ဗိုလ်မှူးခမ်းစံ ကပြောသည်။
ဒီဇင်ဘာ (၉) ရက်နေ့မှစပြီး နမ္မတူမြို့နယ် နားကျဲကျေးရွာအနီး ၂ ဘက်တပ် ပစ်ခတ်မှု ရှိသဖြင့် ရွာသားများနေရပ်မှ ဘုန်းကြီးကျောင်းသို့ ထွက်ပြေးတိမ်းရှောင်ခဲ့ရသည်။ ဒီဇင်ဘာလ ၁၇ ရက် နေ့ခင်းပိုင်းက ရွာပိုင်းတွင်ပစ်ခတ်မှုငြိမ်နေသဖြင့် ပြန်သွားကြရာ နာရီပိုင်းအကြာတွင်ပစ်ခတ်မှုထပ်ကြားရသဖြင့် ဘုန်းကြီးကျောင်းသို့ပြန်လည်ထွက်ပြေးလာခဲ့ကြခြင်းဖြစ်ပါသည်။
Leave a Comments