သျှမ်းပြည် မိုးဗြဲမြို့သို့ နေရပ်ပြန်သည့် ဒေသခံများကို စစ်ကောင်စီ သတ်မှတ်ပေးထားသည့် ဘုန်ကြီးကျောင်းအတွင်းသာ နေထိုင်ခွင့်ပြုကြောင်း စုံစမ်းသိရသည်။
မိုးဗြဲမြို့ကို စစ်ကော်မရှင်တပ်က ပြီးခဲ့သည့် ၂၀၂၅ ခုနှစ် ဇူလိုင်လအတွင်း ပြန်လည် ထိန်းချုပ်နိုင်ခဲ့သည်။
ထို့နောက် နေရပ်ပြန်သည့် ဒေသခံအချို့ကိုရပ်ကွက်အတွင်းတွင်နေထိုင်ခွင့်မပြုဘဲ စစ်ကော်မရှင် သတ်မှတ်ထားသည့် ဘုန်းကြီးကျောင်းအတွင်းသာ နေထိုင်စေပြီး အပြင်ထွက်သွားလာခွင့်ကိုလည်း ကန့်သတ်ထားကြောင်း မိုးဗြဲမြေပြင် စစ်ရေးသတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“စစ်တပ်က မိုးဗြဲကို ထိန်းချုပ်ထားတဲ့နောက် နေရပ်ပြန်တဲ့ ပြည်သူတွေရှိတယ်။ဒါပေမယ့် ရပ်ကွက်တွေမှာ နေခွင့် မပေးဘူး။ဘုန်းကြီးကျောင်းတွေမှာ နေခိုင်းတယ်။ အပြင်ထွက်လို့ မရဘူး။ပြည်သူတွေကို ထိန်းချုပ်ထား သလိုမျိုးဖြစ်နေတယ် ။”ဟု ၎င်းကပြောသည်။
ထိုနေရပ်ပြန် ဒေသခံများသည် မိုးဗြဲမြို့ (၄၂၂) တပ်အနီးရှိ ဘုန်းကြီးကျောင်းတကျောင်းတွင် နေထိုင်နေကြပြီး၊ ရပ်ကွက်အချို့နှင့် ဘုန်းကြီးကျောင်းတွင် ဒေသခံ ၂၀၀ ခန့်ရှိနိုင်ကြောင်း ကရင်နီပြည်နယ် ကြားကာလအုပ်ချုပ်ရေး (IEC) အတွင်းရေးမှူး ဗညားခွန်အောင်က ပြောသည်။
“နေရပ်ပြန်လာတဲ့ ပြည်သူတွေရှိတယ်။စစ်ကောင်စီတွေက သတ်မှတ်ထားတဲ့ ဘုန်းကြီးကျောင်းတွေမှာ ၃ လ အနည်းဆုံးနေပြီး သူတို့က အချက်အလက်တွေ စိစစ်တယ်။ သတ်မှတ်ထားတဲ့ ဘုန်းကြီးကျောင်းတွေ မဟုတ်ရင်လည်း ရပ်ကွက်အချို့ မှာပဲပေး နေတာ။တချို့ရပ်ကွက်တွေကိုပြန်ဝင်လို့မရသေးတာကြောင့် ဘုန်းကြီးကျောင်းတွေမှာ ဆက်နေနေတာမျိုးရှိပါတယ်။”ဟု ၎င်းက ပြောသည်။
လက်ရှိ မိုးဗြဲမြို့ နောက်ခြမ်းတွင်လည်း စစ်ကောင်စီတပ် နှင့် ကရင်နီတော်လှန်ရေးတပ်ဖွဲ့တို့ ထိတွေ့ တိုက်ပွဲများ ဆက်လက်ဖြစ်ပွားနေခြင်းကြောင့် နေရပ်ပြန်ပြည်သူများ သတိထား သွားလာရန် လိုအပ်ကြောင်း ကရင်နီပြည်နယ် ကြားကာလအုပ်ချုပ်ရေး (IEC) အတွင်းရေးမှူး ဗညားခွန်အောင်က ဆက်ပြောသည်။
“ဖြစ်နိုင်ရင်တော့ စစ်ရှောင် စခန်းတွေမှာ နေဖို့ပြောချင်တယ်။ စစ်ဖြစ်နေတဲ့ နေရာတွေနဲ့ နီးနေတဲ့ အတွက်ကြောင့် အန္တရာယ်တွေများတယ်။ အချိန်မရွေးစစ်ပွဲတွေ ပြန်ဖြစ်နိုင်တာကြောင့် ပြည်သူတွေကိုလည်း သတိထားဖို့ လိုပါတယ်။”ဟု ၎င်းကပြောသည်။
လက်ရှိအချိန်ထိ ၂ နှစ်ကျော်ကြာ စစ်ဘေးရှောင်နေရသည့် မိုးဗြဲမြို့ ဒေသခံအများစုသည် နေရပ်မပြန်နိုင်ဘဲ မိုးဗြဲမြို့ အနီးရှိ ကျေးရွာများ၊ တောတောင်များအတွင်းရှိ စစ်ဘေးရှောင်စခန်းများ နှင့် ကရင်နီပြည် အတွင်း ပျံနှံ့စစ်ရှောင်နေကြသည်။
ပြီးခဲ့သည့် ရှေ့ပတ် မေလ ဒုတိယပတ်အတွင်းတွင်လည်း မိုးဗြဲ-ဖယ်ခုံ လမ်းပိုင်းတကြောကို စစ်ကော်မရှင်တပ် ပြန်လည်ထိန်းချုပ်နိုင်ရန် အတွက် မြေပြင်ထိုးစစ်ဆင်ခဲ့ပြီး ကရင်နီတော်လှန်ရေးတပ်ပေါင်းစုတို့ နှင့် တိုက်ပွဲများ ပြင်းထန်ခဲ့သည်။
Leave a Comments