သျှမ်းပြည်မြောက်ပိုင်း သီပေါမြို့နယ် မန်နောင်ကျေးရွာအုပ်စုအတွင်း အသက် (၆) နှစ်အရွယ် ကလေးငယ် တစ်ဦးကို အဓမ္မပြုကျင့်ပြီး သတ်ဖြတ်ခဲ့သူကို ကြီးလေးသောပြစ်ဒဏ်ချမှတ်သွားမည်ဖြစ်ကြောင်း SSPP/SSA ထံမှ စုံစမ်းသိရှိရသည်။
ဒီဇင်ဘာ ၉ ရက်နေ့က တစ်ရွာသားဖြစ်သူ အသက်(၃၀)နှစ်ရှိသူ စိုင်းစောသည် (၆) နှစ်အရွယ် ကလေးငယ်ကို အဓမ္မပြုကျင့် သတ်ဖြတ်ခဲ့ကြောင်း သိရသည်။
“ကျနော်တို့ မူဝါဒအရ ဒီလို လူသတ်မှုဆိုရင် သေဒဏ်အထိ ချဖွယ်ရှိတာပေါ့နော်။ ပြီးတော့ ဒါက ကလေးလည်းဖြစ်တယ်။ဘယ်လို အမိန့်ချမယ်ဆိုတာကိုတော့ မဆုံးဖြတ်ရသေးတော့ အချုပ်ထဲမှာပဲ ထည့်ထားနေတုန်း”ဟု SSPP ၏ ပြန်ကြားရေးမှူး ဗိုလ်မှူးစိုင်းသန်းအောင် က သျှမ်းသံတော်ဆင့် ကိုပြောသည်။
အဆိုပါ အဓမ္မပြုကျင့်သည့်သူကို SSPP က ဖမ်းဆီးထားပြီး ယခုလက်ရှိတွင် အမိန့်မချမှတ်ရသေးသည့်အတွက်ကြောင့် အချုပ်ထဲ ထည့်ထားကြောင်း၊ ၄င်းသည် မူးယစ်သုံးစွဲသူ မဟုတ်ကြောင်းလည်း ဗိုလ်မှူးစိုင်းသန်းအောင် ကပြောသည်။
ထိုကလေးငယ်သည် ဒီဇင်ဘာ (၉) ရက်ညပိုင်းအချိန်မှာ နေအိမ်မှ ပျောက်ဆုံးသွားပြီး ရွာသားများ လိုက်လံရှာဖွေရာ ဒီဇင်ဘာ (၁၁) ရက် နေ့လည်ပိုင်းအချိန်တွင် ရွာအနောက်ပိုင်ရှိ ချောင်းခြောက်အတွင်း လည်ပင်းညှစ်ခံထားရသည့် ဒဏ်ရာ ၊ နောက်စေ့ရိုက်ခံထားသည့် ဒဏ်ရာ ဖြင့် သေဆုံးနေကြောင်း သိရသည်။
အလားတူ ဖြစ်စဉ်မျိုးကို SSPP/SSA လှုပ်ရှားရာ နယ်မြေအတွင်း ရှိခဲ့ဖူးပြီး သေဒဏ်အထိ ပေးခဲ့ဖူးကြောင်းလည်း သိရသည်။
