သျှမ်းပြည်မြောက်ပိုင်း နမ္မတူမြို့နယ်အတွင်း RCSS နှင့် TNLA တို့ကြား တိုက်ပွဲ (၃) ကြိမ်ဖြစ်ပွားခဲ့ကြောင်း စုံစမ်းသိရှိရသည်။

“မနေ့ နဲ့ ဒီနေ့တော့ တိုက်ပွဲငြိမ်နေတယ်။ နှစ်ဖက် စစ်အင်အားဖြည့်တာတွေတော့ မကြားရသေးဘူး။ TNLA နဲ့ တိုက်ပွဲဖြစ်တာ ၃ ကြိမ်ပါ။ SSPP နဲ့က တစ်ကြိမ်။ စုစုပေါင်း (၄) ကြိမ် တိုက်ပွဲဖြစ်ပွားခဲ့တယ်။” ဟု RCSS ၏ ပြောရေးဆိုခွင့် ရှိသူ ဒုဗိုလ်မှူးကြီး စဝ်အုမ်ခေး က သျှမ်းသံတော်ဆင့် ကိုပြောသည်။

ဒီဇင်ဘာ (၅) ရက်နေ့က RCSS နှင့် SSPP တို့ သျှမ်းပြည်မြောက်ပိုင်း သီပေါမြို့နယ်တွင်း သျှမ်းတပ် (၂) တပ် တိုက်ပွဲ ဖြစ်ပွားခဲ့ကြောင်း၊ ဒီဇင်ဘာ (၇ ရက်မှ ၁၀) ရက်ထိ နမ္မတူမြို့နယ်အတွင်း RCSS နှင့် TNLA တို့ တိုက်ပွဲ (၃) ကြိမ် ဖြစ်ပွားကြောင်းသိရသည်။

အဆိုပါ တိုက်ပွဲများကြောင့် ထိခိုက်ဒဏ်ရာ ရရှိသူ (၄) ဦးရှိပြီး ၊ စစ်ဘေးရှောင် ပြည်သူ (၂၀၀) ကျော်ရှိကြောင်း သိရသည်။

“ဒီနေ့ထိ မန်စံဘုန်းကြီးကျောင်းမှာ စစ်ဘေးရှောင်တဲ့သူတွေ ရှိသေးတယ်။ ဘယ်လောက်ကျန်လဲတော့ အတိအကျ မသိရသေးဘူး။ တစ်ချို့လည်း ပြန်သွားတာတွေရှိတယ်။ တစ်ချို့ကျတော့လည်း တိုက်ပွဲပြန်ဖြစ်မှာ စိုးရိမ်လို့ မပြန်သေးတာတွေလည်းရှိတယ်။” နမ္မတူမြို့နယ် မှ မေတ္တာရှင် လူမှုကူညီရေးအသင်းသား တစ်ဦး က သျှမ်းသံတော်ဆင့် ကိုပြောသည်။

TNLA လှုပ်ရှားရာ နယ်မြေတွင်း RCSS ကျုးကျော်ဝင်ရောက်သည့်အတွက်ကြောင့် တိုက်ပွဲဖြစ်ပွားရကြောင်း (TNLA) သတင်းမှန်ကြားရေး က ထုတ်ပြန်ထားသည်။

“TNLAပြောတာတော့ RCSS ဘက်က နယ်မြေကျုးကျော်တာပေါ့။ ဒါပေမယ့် RCSS က မကျူးကျော်ရပါဘူး။ ကျနော်တို့ အဲ့နေရာ ဒေသ လှုပ်ရှားလာတာ နှစ်ပေါင်း (၃၀) ကျော်ပြီ။ ဒါကြောင့် ဘာကြောင့် တိုက်ပွဲဖြစ်လဲဆိုရင် TNLA ဘက်ကပြောတာတော့ ကျနော်တို့ သူတို့ နယ်မြေကို ကျုးကျော်လို့ တိုက်ပွဲဖြစ်ရတာပေါ့။” ဟု စဝ်အုမ်ခေး က သျှမ်းသံတော်ဆင့် ကိုပြောသည်။

PSLF/TNLA သတင်းနှင့် ပြန်ကြားရေး ဌာန ရေးသားဖော်ပြချက်အရ ဒီဇင်ဘာအတွင်း RCSS တပ်ဖွဲ့တို့နယ်မြေကျုးကျော် ထိုးစစ်ဆင်တိုက်ခိုက်မှုကြောင့် တအောင်းတပ်မတော် (TNLA) နှင့် တို်က်ပွဲ (၃) ကြိမ် ဖြစ်ပွားခဲ့ကြောင်း ရေးသားဖော်ပြထားသည်။