သျှမ်းပြည်တောင်ပိုင်း တောင်ကြီးမြို့တွင် ယနေ့ ဒီဇင်ဘာ ၁၁ ရက်နေ့ထိ ကိုဗစ် ၁၉ လူနာ ၁၁၇ ဦးရှိပြီကြောင်း စုံစမ်းသိရှိရသည်။

လူနာ ၁၁၇ အနက် ဆေးရုံ၌ဆေးကုသမှုခံယူနေသည့်ကိုဗစ် ၁၉ အတည်ပြုလူနာ ၂၅ ဦးကျန်ရှိကြောင်း မြို့နယ်ပြည်သူ့ကျန်းမာရေး ဦးစီးဌာန ဒေါက်တာမိုးထွန်းက သျှမ်းသံတော်ဆင့် ကိုပြောသည်။

“ တောင်ကြီးမှာကအရင်ကနေခုထိ ၁၁၇ ရှိတယ်။ လက်ရှိဆေးရုံတက်လူနာက ၂၅ ကျန်ရှိနေသေးတယ်။ အားလုံးကတော့ ကျန်းမာရေးအခြေနေကောင်းတယ်” ဟု ဒေါက်တာမိုးထွန်းကပြောသည်။

  ယနေ့ ဒီဇင်ဘာ ၁၁ ရက်တွင်ကိုဗစ်အတည်ပြုလူနာသစ် ၂ ဦးထပ်တိုးကြောင်း သိရသည်။

တောင်ကြီးမြို့သည် ကိုဗစ် ၁၉ အတည်ပြုလူနာ များလာရခြင်းမှာ ဒုတိယလှိုင်းစ ရာတွင် ပြည်သူများ အနေဖြင့် ကျန်းမာရေး လိုက်နာမှုအားနည်းပြီး ခရီးသွားမှုများသောကြောင့် ဖြစ်သည်ဟု ဒေါက်တာမိုးထွန်းက ဆိုသည်။

“ ပထမလှိုင်းက ၇ ယောက်ဘဲရှိတယ်။ Mask တပ်တဲ့ရာခိုင်နှုန်း၊ လက်ဆေးတဲ့ရာခိုင်နှုန်း၊ လူစုလူဝေး မလုပ်ဘူးဆိုတဲ့ ရာခိုင်နှုန်းတွေကို လိုက်နာဆောင်ရွက်တာက အားနည်းနေတယ်။ ၆ ပေကွာ နေထိုင်မှုကလည်း အားနည်းနေတယ်။ အဲလိုဘဲ ကုန်စည်စီးဆင်းမှုကနေပြီးတော့ ယာဉ်နောက်လိုက်တွေကနေ တွေ့လာတယ်” ဟု ဒေါက်တာမိုးထွန်းကပြောသည်။

ယခုကဲ့သို့ ကိုဗစ် လူနာများလာရခြင်းသည် ဆရာဝန်များအတွက် ပိုးတွေ့လူနာနှင့် ထိတွေ့ဆက်ဆံသူ များကို လိုက်ရှာရာတွင် အခက်ခဲများစွာရှိကြောင်း  ဒေါက်တာမိုးထွန်းက ထပ်လောင်းပြောသည်။

တောင်ကြီးမြို့တွင် Quarantine စင်တာ ၁၃ ခုရှိပြီး စင်တာတိုင်းတွင် လူနေမှုပြည့်နေကြောင်းသိရသည်။ တောင်ကြီးမြို့နယ်တွင် Quarantine ဝင်နေသူပေါင်း ၁၀၀၀ ကျော်ရှိနေပြီး ဖြစ်ကြောင်း သိရသည်။

မြန်မာနိုင်ငံတွင် ကိုဗစ် ၁၉ ပိုးတွေ့လူနာ များလာသောကြောင့် ပြည်သူများအနေဖြင့် ကျန်းမာ ရေးနှင့် အားကစား ဝန်ကြီးဌာန ထုတ်ပြန်ထားသည့် စည်းကမ်းချက်များကို လိုက်နာရန်လိုအပ်ကြောင်း ဆရာဝန်များနှင့် ပရဟိတ ဆောင်ရွက်နေသည့် အဖွဲ့များက အကြံပြုထားသည်။