သျှမ်းပြည်မြောက်ပိုင်း နမ္မတူမြို့နယ် နမ့်ပိုင်ကျေးရွာအနီး RCSS နှင့် TNLA တို့အကြား ပစ်ခတ်တိုက်ခိုက်မှုဖြစ်ပွါးရာ လက်နက်ကြီးကျည်ကျသဖြင့် ကိုယ်ဝန်သည် အမျိုးသမီး အပါအဝင် ထိခိုက်ဒဏ်ရာရရှိသူ (၄) ဦး ရှိကြောင်းသိရသည်။
ယမန်နေ့ ဒီဇင်ဘာ (၁၀) ရက် ည ၅ နာရီ မှ ၆ နာရီထိ နှစ်ဘက် တိုက်ပွဲများဖြစ်ပွားစဉ် ရွာသားများ ပြောင်းကြိတ်နေသည့်နေရာအနီး လက်နက်ကြီးကျည်ကျရောက်ရာ ကျည်စထိမှန်ပြီး ၄ ဦး ဒဏ်ရာ ရရှိခဲ့ကြောင်း RCSS/SSA ၏ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့် ကိုပြောသည်။
“ဒဏ်ရာ ရရှိတဲ့သူ ၃ ယောက်ကတော့ သူတို့ မီးဖိုချောင်ထဲ ရှိနေချိန်မှာ လက်နက်ကြီးစ ထိမှန်ခဲ့ပါတယ်။”ဟု ဗိုလ်မှူးခမ်းစံ က သျှမ်းသံတော်ဆင့်ကိုပြောသည်။
ယမန်နေ့ညတွင်းချင်းမှာ လူမှုကူညီရေးအဖွဲ့များက ၄င်းတို့ကို သွားရောက်ခေါ်ဆောင်ခဲ့ပြီး နမ္မတူပြည်သူ့ဆေးရုံသို့ ပို့ဆောင်ပေးခဲ့ကြောင်း စစ်ရှောင်ပြည်သူများကို ကူညီတဲ့ ကော်မတီအဖွဲ့ဝင် စိုင်းဘဉာဏ် က သျှမ်းသံတော်ဆင့် ကိုပြောသည်။
“ဒဏ်ရာ ရရှိသူ (၄) ဦးမှာ ကိုယ်ဝန်သည် အမျိုးသမီး တစ်ဦးပါတာ ဟုတ်ပါတယ်။နမ့်ပိုင်က ရွာသားတွေ မနေ့ည က ချက်ချင်းထွက်ပြေးလာပြီး မန်စံဘုန်းကြီးကျောင်းမှာ ရောက်လာကြပါတယ်။” ဟု စိုင်းဘဉာဏ် က ပြောသည်။
ဒီဇင်ဘာ (၉) ရက် မနက်ပိုင်း နမ္မတူမြို့နယ်အတွင်း မန်စံကျေးရွာအုပ်စု နားကျဲကျေးရွာအနီး RCSS နှင့် မဟာမိတ်တပ်ပေါင်းစုများ တိုက်ပွဲများဖြစ်ပွားခဲ့ပြီး ရွာသားများ မန်စံဘုန်းကြီးကျောင်းသို့ စစ်ဘေးရှောင်ခဲ့ရသည်။ယနေ့ လက်ရှိချိန်ထိ ကျေးရွာသားတစ်ချို့ နေရပ်သို့ မပြန်နိုင်သေးပေ။
“မန်စံဘုန်းကြီးကျောင်းမှာ စစ်ဘေးရှောင်လာခဲ့ပါတယ်။ စစ်ဘေးရှောင်သူ ရှိထားတဲ့သူကော ထပ်ရောက်တဲ့သူကော အားလုံးပေါင်း (၂၂၅) ဦးလောက်ရှိမယ်။ မနေ့ညက ချက်ချင်းထွက်ပြေးလာကြတယ်။” ဟု စိုင်းဘဉာဏ် က ပြောသည်။
ဒဏ်ရာ ရရှိသူ (၄) ဦးကို ယမန်နေ့ညတွင်းချင်း နမ္မတူပြည်သူ့ဆေးရုံသို့ ပို့ဆောင်ခဲ့ကြောင်း သိရသည်။
လက်နက်ကြီးကျည်မှာ မည်သည့်တပ်ဖွဲ့မှပစ်ခတ်သည့်ကျည်မှန်းမသိရကြောင်းလည်းရွာသားများကပြောသည်။
PSLF/TNLA သတင်းနှင့် ပြန်ကြားရေးဌာန ရေးသားဖော်ပြချက်အရ ဒီဇင်ဘာလအတွင်း RCSS တပ်ဖွဲ့တို့ နယ်မြေကျူးကျော် ထိုးစစ်ဆင်တိုက်ခိုက်မှုကြောင့် တအောင်းတပ်မတော် (TNLA) နှင့် တိုက်ပွဲ (၃) ကြိမ် ဖြစ်ပွားခဲ့ကြောင်း ရေးသားဖော်ပြထားသည်။
ဒီဇင်ဘာ (၉) ရက် မနက်ပိုင်း နမ္မတူမြို့နယ်အတွင်း မြောက်ပိုင်း မဟာမိတ်တပ်ဖွဲ့ နှင့် RCSS တို့အကြား တိုက်ပွဲဖြစ်ပွားခဲ့သဖြင့် မန်စံကျေးရွာ အုပ်စု နားကျဲကျေးရွာ၊ ကွန်ကျောင်းကျေးရွာ၊ နားကျိုင်းကျေးရွာ နှင့် ပိန်းလုံ ကျေးရွာ တို့ စစ်ဘေးရှောင်ခဲ့ရသည်။
