ကိုဗစ်ကူးစက်မှုနှုန်း မြန်ဆန်သော သျှမ်းပြည်နယ်အရှေ့ပိုင်း တာချီလိတ်မြို့တွင် စျေးများကို မနက် ၁၀  နာရီထိသာရောင်းချခွင့်ပြုတော့မည်ဖြစ်ကြောင်း စုံစမ်းသိရှိရသည်။

တာချီလိတ်မြို့တွင်းရှိ ဈေးများအားလုံး ဒီဇင်ဘာ ၈ ရက်နေ့မှစတင်ပြီး မနက်ဈေးအဖြစ်သာရောင်းချခွင့် ပြုသွားတော့မည် ဖြစ်ကြောင်းသိရသည်။

“ ဒီမှာက မနက် ၁၀ နာရီထိဘဲရောင်းချခွင့်ပြုတော့မှာ။ နေ့လည်ဈေးနဲ့ ညဈေးက မရှိတော့ဘူးပေါ့။ တာချီလိတ်မှာက ကိုဗစ် များလာတယ်လေ” ဟု တာချီလိတ်ပြည်နယ်လွှတ်တော်ကိုယ်စားလှယ် ဦးခင်မောင်တင့် ကပြောသည်။

တာချီလိတ်မြို့တွင် ယနေ့ ဒီဇင်ဘာ ၈ ရက်နေ့ထိ ကိုဗစ် ၁၉ အတည်ပြုလူနာ စုစုပေါင်း ၇၄ ဦးရှိကြောင်းသိရသည်။  ဟိုတယ်၀န်ထမ်းမှတဆင့် တပတ်အတွင်း ကိုဗစ်ကူးစက်သူတဟုန်ထိုးတက်လာနေပြီဖြစ်သဖြင့် စျေးသည်များပါမကျန် ကိုဗစ်ပိုးတွေ့ရှိလာခဲ့ရာ ထိုသို့စျေးများကို နံနက်ပိုင်းတွင်သာရောင်းချရန် ထုတ်ပြန်လိုက်ခြင်းဖြစ်ကြောင်းသိရသည်။

“ စျေးတွေဆိုရင် နံနက် ၁၀ နာရီကျော်သွားရင် မပေးရောင်းတော့ဘူး။ အခု မနက်ပိုင်းဘဲဖွင့်ရတာ ” ဟု  ဈေးသည်   နန်းဟွမ် ကပြောသည်။

 အိမ်ဆိုင်များမှာမူ ည ၁၀ နာရီအထိသာဖွင့်ခွင့်ပေးကြောင်း၊ စားသောက်ဆိုင်များမှာလည်း တာချီလိတ်မြို့တွင်းကိုဗစ်ကူးစက်မှု ၁၀ ဉီးစရှိသော ကူးစက်မှု တတိယမြောက်နေ့ (နို၀င်ဘာလ  ၂၈ ရက်နေ့)ကတည်းက ဆိုင်ထိုင်ခွင့်မပြုတော့သကဲ့သို့ ညနေပိုင်း အသားကင်ဆိုင် စားသောက်ဆိုင်များပိတ်ထားရသည်အထိဖြစ်ရကြောင်း မြို့ခံများပြောပြချက်အရသိရသည်။

ဒီဇင်ဘာလ ၈ ရက် ယနေ့တွင်လည်း တာချီလိတ်မြို့တွင် ကိုဗစ်ထပ်မံကူးစက်လူနာ ၁၀ ဉီးတိုးပြီးထိုအထဲတွင် လသားကလေးငယ်တဉီးပါကြောင်းသိရသည်။

“ပြီးခဲ့တဲ့ ၃-၄ ရက်ကတော့ခြောက်ကပ်နေတယ်။ ဒီနေ့ညနေပိုင်းတော့ လူတွေစားစရာတွေထွက်လာ၀ယ်ကြတယ် အရမ်းစည်တယ်။ အားရှိမယ့်အစားအစာတွေလည်း စားပေးရမယ်လေနော် အားရှိအောင်နေရမယ်လေ။ “- ဟု စျေးသည် နန်းဟွမ်က ပြောသည်။

မြန်မာနိုင်ငံတွင် ကိုဗစ် ၁၉ အတည်ပြုလူနာသည် တစ်နေ့တွင် လူ ထောင်ချီးပိုးတွေ့လာရသောကြောင့် ဆရာဝန်များ နှင့် ပရိဟိတ အဖွဲ့များက အပြင်မထွက်ကြရန်နှင့် ကျန်းမာရေးဌာနမှ ထုတ်ပြန်ထားသည့် စည်းကမ်းချက်များကို လိုက်နာပေးကြရန် အကြံပြုထားသည်။