သျှမ်းပြည်မြောက်ပိုင်း နမ္မတူမြို့နယ်အတွင်း TNLA နှင့် RCSS/SSA တို့ကြား စစ်ရေးတင်းမာမှုကြောင့် တိုက်ပွဲဖြစ်ပွါးမည်ကိုဒေသခံများ စိုးရိမ်နေကြသည်။
ဒီဇင်ဘာလ ၈ ရက် မနက်ပိုင်း တအောင်းအမျိုးသား လွတ်မြောက်ရေးတပ်မတော် TNLA မှ နမ္မတူမြို့ နယ် မန်စံကျေးရွာ အုပ်စု ပန်တောင်းတံတားတွင် စစ်အင်အားဖြည့်တင်းနေကြောင်း ဒေသခံများ ကပြောသည်။
“နှစ်ဖက်တပ်အင်အားဖြည့်ပြီး တင်းမာနေကြတယ်။ အခုချိန်ထိတော့ သေနတ်သံ မထွက်သေးဘူး” ဟု နမ္မတူဒေသခံ ဉီးမောင် ကပြောသည်။
အဆိုပါ ပန်တောင်းတံတားဘက်တွင် အစိုးရတပ်မတော်လည်း၀င်ရောက်နေရာယူထားကြောင်း ဒေသခံများပြောသည်။
“ အခု အစိုးရတပ်မတော်ဖက်ကလည်းရောက်နေတယ်။ အခြေအနေကတော့ ၃ ခုဖြစ်နေတယ်။ ဘယ်သူက ဘယ်သူကိုတိုက်မလဲတော့မသိသေးဘူး။ အစိုးရတပ်မတော်ဖက်ကတော့ ၆၀ယောက်လောက်တော့ ရှိတယ်” ဟု ၎င်းဒေသခံကပြောသည်။
RCSS/SSA ပြောရေးဆိုခွင့်ရှိသူ ဒုတိယဗိုလ်မှူးကြီး စဝ်အုမ်ခေးက “ ဒီနေ့စစ်ရေးကတော့မရှိသေးဘူး။ တင်းမာနေတာတော့ရှိတာပေါ့” ဟု ပြောသည်။
အလားတူ TNLA သတင်းနှင့်ပြန်ကြားရေးဌာနတာဝန်ခံ ဗိုလ်မှူးမိုင်းအိုက်ကျော် ကလည်း “ဒီနေ့ ထိတွေ့မှုတော့မရှိသေးဘူး။ အခြေအနေက ငြိမ်သက်နေတာလည်း မဟုတ်ဘူး” ဟု ပြောသည်။
နမ္မတူမြို့နယ်တွင် ဒီဇင်ဘာ ၇ ရက် ယမန်နေ့ကလည်း တအောင်းအမျိုးသားလွတ်မြောက်ရေး တပ်မတော် TNLA နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA တို့ တိုက်ပွဲများဖြစ်ခဲ့သည်ဟုသိရသည်။
