တအောင်းအမျိုးသားလွှတ်မြောက်ရေးတပ်မတော် TNLA မှ မန္တလေးတိုင်းဒေသကြီး မိုးကုတ်မြို့နယ်တွင် အရပ်သားပြည်သူများ ဖမ်းဆီးခေါ်ဆောင်ပြီး ငွေကြေးတောင်းခံမှုအပေါ် လူ့အခွင့်အရေး နှင့် တရားမျှတရေး စွမ်းဆောင်သူများအဖွဲ့ ကန့်ကွက်ရှုတ်ချကြောင်း သဘောထား ထုတ်ပြန်လိုက်သည်။

ဒီဇင်ဘာ (၇) ရက် ရက်စွဲဖြင့် မန္တလေးတိုင်းဒေသကြီး အခြေစိုက် လူ့အခွင့်အရေးနှင့် တရားမျှတရေး စွမ်းဆောင်သူများအဖွဲ့က လက်ရှိ (TNLA) မှ ဖမ်းဆီးထားသော သူများကို အမြန်ဆုံး ပြန်လွှတ်ပေးရန် နှင့် အဓမ္မငွေကြေး တောင်းခံနေမှုအား ရပ်တန့်ရန် တောင်းဆိုထားပြီး မိုးကုတ်မြို့ရှိ ရဟန်းရှင်လူ၊ လူတန်းစား အလွှာအသီးသီး နှင့် ဘာသာရေး အဖွဲ့အစည်းများ၊ အရပ်ဘက် အဖွဲ့အစည်းများက ဝိုင်းဝန်း ကန့်ကွက်ရှုတ်ချလိုက်သည်ဟု ထုတ်ပြန်ကြေညာထားသည်။

“အဓိက ရည်ရွယ်ချက်ကတော့ မိုးကုတ်သူ မိုးကုတ်သားတွေက သူတို့ခံစားနေရတဲ့ဟာတွေက ဥပဒေဘောင်မဲ့ဖြစ်ပြီးတော့ လာရောက်ပြီးတော့ အချိန်မရွေး မိုးကုတ်မြို့ထဲဝင်ပြီးတော့ ဆက်ကြေးတောင်း၊ ရိုက်နှက်တာတွေ သူတို့လည်း မခံနိုင်တော့ဘူးလေ။ ဥပဒေဘောင်မဲ့ ဖြစ်လာတော့ ကျနော်တို့ လူ့အခွင့်အရေး တရားမျှတရေးကို အကူညီတောင်းလာခဲ့တယ်။ ကျနော်တို့ကနေ ဦးစီးပြီးတော့ ရပ်မိရပ်ဖ မိုးကုတ်သူ မိုးကုတ်သားတွေရဲ့ ဆန္ဒကို ထုတ်ဖော်ပြီးတော့ ကန့်ကွက်ရှုတ်ချပေးတာပေါ့နော်။” မန္တလေးတိုင်းဒေသကြီး လူ့အခွင့်အရေး နှင့် တရားမျှတရေး စွမ်းဆောင်သူများအဖွဲ့ တာဝန်ခံ ဦးတင်ထွန်းနိုင် (ခ) ဦးနိုင်မိုး က သျှမ်းသံတော်ဆင့် ကိုပြောသည်။

လက်နက်မဲ့ အရပ်သားများကို TNLA အဖွဲ့က လူ့အခွင့်အရေး ချိုးဖောက်ကာ အနိုင်ကျင့်နေသည့် လုပ်ရပ်များအား နိုင်ငံတကာ လူ့အခွင့်အရေးကော်မရှင်၊တရုတ်ပြည်သူ့ သမ္မတနိုင်ငံ အပါအဝင် နိုင်ငံအသီးသီးက သိရှိစေရန် အကြောင်းကြားစာ ပေးပို့သွားမည်ဖြစ်ကြောင်း သိရသည်။

“ဒီလို ထုတ်ပြန်ရင်တော့ ထိရောက်မှုတော့ ရှိရမှာပေါ့။ တခါတည်း ပတ်သက်တဲ့ ဒီအထက်ကဆိုင်ရာ နိုင်ငံတော် သမ္မတထိ တပ် ဆိုရင်လည်း ကာချုပ်၊ နယ်လုံ အကုန်လုံး ပို့မယ်။ ထိရောက်မှုတော့ ရှိလာမှာပေါ့။” ဟု ဦးတင်ထွန်းနိုင် (ခ) ဦးနိုင်မိုး က ပြောသည်။

ဒီဇင်ဘာ (၄) ရက်နေ့က မိုးကုတ်မြို့ ရှောလီဝိုင်းရပ်ကွက်မှ စံပြမုန့်တိုက်ပိုင်ရှင် ဦးကျော်ဝင်းအား (TNLA) မှ အဓမ္မ ဖမ်းဆီးသွားမှု ၊ အောက်တိုဘာ (၁၇) ရက်က ဒေါ်ခင်ဌေးမြင့် ကို (TNLA) မှ နေအိမ်အတွင်း ဝင်ရောက် အဓမ္မ ဖမ်းဆီးခေါ်ဆောင်ကာ ၁၀ ရက်အကြာ ထိန်းသိမ်းရိုက်နှက်ပြီး ငွေကျပ်သိန်း (၃၄၀) ဖြင့် ပြန်လည် ရွေးယူခဲ့ရမှု၊ မိုးကုတ်မြို့ရှိ စီးပွားရေး လုပ်ငန်းရှင်များ ကျောက်မျက်တူးဖော်ရေးလုပ်ငန်းများ၊တစ်နိုင်တစ်ပိုင် လုပ်ငန်း လုပ်ကိုင်နေသူများ၊ စျေးဆိုင်ခန်းများ၊ ကုန်စုံဆိုင်များ (TNLA) က နည်းလမ်းမျိုးစုံဖြင့် ခြိမ်းခြောက်ကာ ငွေကြေး အမြောက်အများ တောင်းခံနေသဖြင့် ပြည်သူများ စိုးရိမ်သောက ရင်ဆိုင်နေရသည်ဟု ဖော်ပြထားသည်။

၄င်းနှင့်ပတ်သက်ပြီး TNLA ၏ပြန်ကြားရေးဌာနမှ ပြောရေးဆိုခွင့်ရှိသူမိုင်းအိုက်ကျော်က – “မီဒီယာသတင်းတွေလည်း ပြောပြီးသားဖြစ်တယ်။ ဖမ်းဆီးထားတာ မှန်တယ်။သူ့ရဲ့ လုံခြုံရေး ကျန်းမာရေးက ဘာမှ စိုးရိမ်စရာမရှိဘူး။ လောလောဆယ်တော့ ကျနော်တို့ ဒီလောက်ပဲ ပြောနိုင်သေးတယ်။ ”- ဟု သျှမ်းသံတော်ဆင့်အားပြောပြသည်။

ဒီဇင်ဘာ ၃ ရက်မှ ၅ ရက်အထိ မိုးကုတ်မြို့တွင် လှုပ်ရှားနေသည့် ရှမ်းပြည်တိုးတက်ရေးပါတီ/ ရှမ်းပြည်တပ်တော် (SSPP/SSA) သည်လည်း မိုးကုတ်မြို့တွင်းရှိ ဒေသခံ ၁၆ ဦး မူးယစ်ဆေးဝါး ရောင်းဝယ်မှုဖြင့် ဖမ်းဆီးထားသည်ဟု ဒေသခံများကပြောဆိုသည်။

SSPP/SSA အနေဖြင့်လည်း မူးယစ်ဆေးရောင်းဝယ်သုံးစွဲသူများအားဖမ်းဆီးကာ စာရိတ္တပြန်လည်ပြုပြင်ပေးကြောင်း တရားဝင်ကြေငြာထားပြီး အလားတူ ယမန်နေ့ကလည်း တန့်ယန်းမြို့နယ်အတွင်းရှိမူးယစ်ဆေး သုံးစွဲရောင်းဝယ်သူ လူငယ်များအားဖမ်းဆီးခဲ့ကြောင်း ၄င်းတို့၏ SSPP Info သတင်းစာမျက်နှာတွင်ဖော်ပြထားသည်။

.