သျှမ်းပြည်မြောက်ပိုင်း မူစယ်မြို့နယ် ထဲမှာရှိတဲ့လောင်းကစားရုံကို တအာင်းအမျိုးသား လွှတ်မြောက်ရေး တပ်မတော်က ၀င်ရောက်ပစ်ခတ်မှုကြောင့် ဒဏ်ရာရရှိသူတွေထဲက ဒဏ်ရာပြင်းထန်သူတဦး ဒီမနက်မှာ ထပ်မံသေဆုံးသွားခဲ့လို့ သေဆုံးသူစုစုပေါင်း ၂၁ ဦးရှိပြီဖြစ်ပါတယ်။
ဒီမနက်သေဆုံးသူဟာ နမ့်ခမ်းမြို့နယ် ပေါက်နေရပ်ကွက်သား စိုင်းယီလျန် ဖြစ်ပါတယ်။
ပစ်ခတ်မှုဖြစ်ပွါးတဲ့နေ့က မူစယ်မှာအလုပ်သွားလုပ်ရင်း နမ့်ခမ်းမှာမင်္ဂလာပွဲဝင်ဖို့အပြန် လမ်းမှာ တအာင်းတပ်ဖွဲ့ရဲ့ပစ်ခတ်မှုခံရတာဖြစ်တယ်လို့ မူစယ်မြို့ခံ မိတ်ဆွေတဦးကပြောပါတယ်။
သူနဲ့အတူ သူ့ရဲ့အမျိုးသမီးနဲ့ပေါက်တဲန်မ ကပြည်သူ့စစ်တဦး ပါတယ်။ သူတို့ကကားနဲ့ နမ့်ခမ်းကိုပြန်မှာ။ ပြည်သူ့စစ်ကတော့ ပွဲချင်းပြီးသေတယ်။ သူကျတော့ လည်ပင်းမှာနဲ့ ခါးမှာကျည်စ ဝင်သွားတယ်။ ဒဏ်ရာပြင်းလို့ မိုင်းခွန်ဆေးရုံမှာသွားပြီးခွဲထုတ်ထာ။ အောက်ဆီဂျင်ပေးထားရတယ်။ မနေ့က အောက်ဆီဂျင်ဖြုတ်တာနဲ့ သေတာ။- မူစယ်မြို့ခံ အေယိင်းက ပြောပါတယ်။
လက်ရှိတွင် ၄င်း၏ အလောင်းအား မိုင်းခွန်ဆေးရုံမှ နမ့်ခမ်းမြို့သို့ ယနေ့သယ်ဆောင်လာခဲ့ပြီး အသုဘအခမ်းအနားပြုလုပ်ပေးသွားမည်ဖြစ်ကြောင်း နီးစပ်သူဆွေမျိုးများထံမှသိရပါတယ်။
မေလ ၁၂ ရက်နေ့က မူစယ်မြို့နယ် နမ့်ပေါ့တံတားထိပ်၊ နောင်ယန်း ရွှေလီမြစ်ကူး ကူးတို့ဆိပ်နဲ့ မူစယ်မြို့တဘက်ကမ်း စယ်လန့်အုပ်စုတွေမှာ တအာင်းအမျိုးသား လွှတ်မြောက်ရေး တပ်မတော် TNLA က နေ ၀င်ရောက်တိုက်ခိုက်ခဲ့ပါတယ်။ ရဲတပ်ဖွဲ့နဲ့ ပြည်သူ့စစ်တပ်ဖွဲ့ပူးပေါင်းတပ်တို့နဲ့တိုက်ပွဲဖြစ်ပွါးအတွင်း မေလ ၁၂ ရက်နေ့က ဒေသခံလူထု ၁၉ ဦး သေဆုံးပြီး ၂၇ ဦး ဒဏ်ရာရရှိခဲ့ပါတယ်။ ဒဏ်ရာရရှိတဲ့သူတွေကို မန္တလေးဆေးရုံကိုပို့ရင်း ၁ ဦးထပ်မံသေဆုံးပြီး လက်ရှိမှာတော့ မိုင်းခွန်ဆေးရုံမှာ ၁ ဦးထပ်မံသေဆုံးတာကြောင့် စုစုပေါင်းသေဆုံးသူ ၂၁ ဦးနဲ့ ဒဏ်ရာရရှိသူ ၂၅ ဦး ရှိပါတယ်။
သေဆုံးသူထဲမှာ တရုတ်နိုင်ငံဘက်ခြမ်းကနေ လာရောက်အလုပ်လုပ်တဲ့ တရုတ်နိုင်ငံသား ၃ ဦးလည်း ပါရှိကြောင်းသိရပါတယ်။
Leave a Comments