သျှမ်းပြည်မြောက်ပိုင်း မူစယ်မြို့နယ်အတွင်း ဖြစ်ပွါးခဲ့သော တအာင်း TNLA နှင့် အစိုးရရဲတပ်ဖွဲ့၊ ပြည်သူ့စစ်တပ်ဖွဲ့ တို့ကြားတိုက်ပွဲကြောင့် ဒေသခံလူထု အများအပြားသေကြေဒဏ်ရာရမှုအပေါ် ကျန်ရစ်သူမိသားစုဝင်များအား အလေးထား လျော်ကြေးပေးရန် ထိုင်းနိုင်ငံရောက်သျှမ်းပြည်သားရွှေ့ပြောင်းအလုပ်သမားများက ကြေငြာချက်ထုတ်ပြန်ကာ တိုက်တွန်းတောင်းဆိုလိုက်သည်။

မူစယ်မြို့နယ် မူဆယ်-နမ့်ခမ်း ကားလမ်းမ နမ့်ပေါ် ပန်ခမ်းတံတားအနီးရှိ လောင်းကစားရုံအား မေလ ၁၂ ရက်နေ့ နံနက် ၀၅းဝဝ နာရီမှ ၀၇းဝဝ နာရီအချိန်ထိ တအာင်းတပ်ဖွဲ့က ၀င်ရောက်ပစ်ခတ်ရာ ရဲနှင့်ပြည်သူ့စစ်ပူးပေါင်းတပ်ဖွဲ့က ပြန်လည်ပစ်ခတ်သဖြင့် တိုက်ပွဲကြား ဒေသခံလူထု ၁၄ ဦးသေဆုံး ကာ ၂၉ ဦးဒဏ်ရာရခဲ့ကြသည်။

ထို့အတွက် လူထုအများအပြားသေကြေဒဏ်ရာရစေသည့်အဆိုပါ မြို့တွင်းတိုက်ပွဲအား ပြင်းပြင်းထန်ထန် ကန့်ကွက် ကြောင်း၊ တိုက်ပွဲများဖြစ်ပွါးစေသည့်လက်နက်ကိုင်တပ်ဖွဲ့တို့အကြား အမြန်ဆုံး ပစ်ခတ်တိုက်ခိုက်မှုရပ်စဲစေလိုကြောင်း ၊ ၂ ဦး ၂ ဖက် ငြိမ်းချမ်းရေးအမြန်ဆုံးပြုလုပ်စေလိုကြောင်း၊ သေကြေဒဏ်ရာရရှိသွားသည့် လူထု၏ကျန်ရစ်သူမိသားစုဝင်များအား ထိုက်တန်သည့် နစ်နာကြေး၊ လျော်ကြေးပေးဆောင်စေလိုကြောင်း စသဖြင့် ပါရှိပါသည်။

ထိုင်းနိုင်ငံ ဘန်ကောက်မြို့မှ သျှမ်းလူမျိုးများအဖွဲ့မှ ပြန်ကြားရေးတာဝန်ခံ နန်းမိုင်က- ဒီဖြစ်စဉ်က လူပေါင်း ၄၀ ကျော်ကို သေကြေဒဏ်ရာရအောင်လုပ်တဲ့အတွက် ဒီလက်နက်ကိုင်တပ်တွေဟာ လူ့အခွင့်အရေး အလွန်အကျွံ ကျူးလွန်တယ်လို့မြင်တယ်။ ဒါကြောင့် သူတို့တွေကို ငြိမ်းချမ်းရေး၊ အပစ်အခတ်ရပ်စဲရေးအတွက် အမြန်ဆွေးနွေးကြဖို့တိုက်တွန်းတယ်။ အဓိကကတော့ သူတို့ ပစ်ခတ်လို့ကြားထဲကသေသွားတဲ့ဒေသခံလူထုအတွက် များစွာစိတ်မကောင်းဖြစ်မိတယ်။ ဒီလူတွေအတွက် နစ်နာကြေးပေးဖို့ လက်နက်ကိုင်အဖွဲ့ ၂ ဖွဲ့ကို တိုက်တွန်းထားတာဖြစ်ပါတယ်- ဟု သျှမ်းသံတော်ဆင့်အားပြောပြသည်။

မူစယ်မြို့တွင် တအာင်း TNLA နှင့်အစိုးရတပ်မတော်တို့ ပစ်ခတ်မှုဖြစ်ပွါးသည့်နေ့တွင် တရုတ် နိုင်ငံသံရုံးနှင့် ကမ္ဘာ့ကုလသမဂ္ဂအဖွဲ့ရုံးတို့မှလည်း ပစ်ခတ်မှုများရပ်တန့်ရေးအမြန်ဆုံးဆောင်ရွက်ရန် ကြေငြာချက်များ အသီးသီးထုတ်ပြန်ကာတိုက်တွန်းခဲ့ကြသည်။

၄င်းတိုက်ပွဲနှင့်ပတ်သက်ပြီး TNLA ပြန်ကြားရေးဌာနကလည်း ရှင်းလင်းချက်တစောင်ထုတ်ပြန်ရာ အဆိုပါရှင်းလင်းချက်တွင် –

“မူစယ်-နမ့်ခမ်း ကားလမ်းမ မူစယ်မြို့အဝင် နမ့်ပေါ်ပန်ခမ်း တံတားအနီးရှိ ပန်ဆေးပြည်သူ့စစ် လောင်းကစားရုံသည် ကားလမ်းမနှင့် ကိုက် (၃၀၀) အကွာတွင် မြန်မာစစ်တပ် ကျောထောက်နောက်ခံဖြင့် ဖွင့်လှစ်ထားပါသည်။
ထိုလောင်းကစားရုံသည် အကြီးစား (casino) ဒိုင်ဖြစ်ပြီး လက်နက်ကိုင်ဆောင်ထားသည့် မြန်မာစစ်တပ် ရဲတပ်ဖွဲ့ နှင့် ပြည်သူ့စစ် များက ကာကွယ်လုံခြံုရေး ပေးထားသည်။ လောင်းကစားရုံတွင် လောင်းကစားမှု အမျိုးစုံပြုလုပ်ခြင်း၊ မူးယစ်ဆေးဝါး မျိုးစုံ ရောင်းဝယ် သုံးစွဲသည့် နေရာတစ်ခုလည်းဖြစ်သည်။ …….. အဆိုပါလောင်းကစားဝိုင်းသည် တရုတ်-မြန်မာနယ်စပ် တည်ငြိမ် အေးချမ်းရေးကို ပျက်ပြားစေသည့် မူးယစ်ဆေးဝါး ရောင်းဝယ်ဖောက်ကားခြင်း၊ တရုတ်နိုင်ငံသားများအား လောင်းကစားများ အတင်းအဓမ္မ ကစားစေပြီး ငွေညစ်ခြင်း၊ ငွေမပေးနိုင်သူများကို သတ်ဖြတ်ခြင်းများ ယခုနှစ်ပိုင်းအတွင်း ပိုမို ပြုလုပ်လာသည်။ …… ၂၀၁၆-၂၀၁၇-၂၀၁၈ ကာလတိုအတွင်းတွင်ပင် တရုတ်နိုင်ငံသား ရာပေါင်းများစွာ ပြန်ပေးဆွဲခံရခြင်း၊ လောင်းကစားကြောင့် ငွေညစ်ခံရခြင်း၊ တောင်းသည့်ငွေ မပေးနိုင်သဖြင့် သတ်ဖြတ် ခံရခြင်းများရှိခဲ့သည်။ထိုလောင်းကစားဝိုင်း အတွင်းတွင် တရုတ် နိုင်ငံသားများ ရာဂဏာန်းနီးပါး သတ်ဖြတ် အစဖျောက်ခံရသည်။ထို့ကြောင့် မြန်မာစစ်တပ် ကျောထောက ်နောက်ခံ ပန်ဆေး ပြည်သူ့စစ် လောင်းကစားရုံအား တအန်းတပ်မတော် TNLA မှ ၀င်ရောက် ရှင်းလင်း တိုက်ခိုက် ရခြင်းဖြစ်သည်။” – အစရှိသဖြင့် ပါရှိပါသည်။

အဆိုပါတိုက်ပွဲကြောင့် ရဲအုပ် အဆင့်ရှိသူ (၁) ဦး၊ အရပ်သား (၆) ဦး၊ ပြည်သူ့စစ် (၂၅) ဦး စုစုပေါင်း (၃၂) ဦး သေဆုံးခဲ့ပြီး တအာင်းဘက်ကမူ အနည်းငယ်သာထိခိုက်ဒဏ်ရာရရှိခဲ့ကြောင်း ၄င်းတို့၏ ပြန်ကြားရေးဌာနစာမျက်နှာတွင် ဖော်ပြထားသည်။

သျှမ်းပြည်မြောက်ပိုင်းတွင် မြောက်ပိုင်းမဟာမိတ်တပ်မတော်၊ အစိုးရတပ်မတော် ၊ သျှမ်းတပ်ဖွဲ့ ၂ ဖွဲ့ အစရှိ လက်နက်ကိုင် တပ်ဖွဲ့များ လှုပ်ရှားနေပါသည်။ ထို့ကြောင့်တိုက်ပွဲများလည်း မကြာခဏ ဖြစ်ပွါးလျှက်ရှိပါသည်။