တောင်ကြီးခရိုင်တွင် တပ်မတော်သား နှင့် အတူနေမိသားစုဝင်များ၏ ကြိုတင်မဲပေးမည့်စာရင်း (၃၄၀၀) ကျော် ရှိကြောင်း ခရိုင်ရွေးကောက်ပွဲ ကော်မရှင်ထံ စုံစမ်းသိရှိရသည်။
တောင်ကြီးခရိုင်တွင် မြို့နယ် (၅) မြို့နယ်ရှိပြီး တပ်မတော်သား နှင့် အတူနေ မိသားစုဝင်များ ကြိုတင်မဲ ပေးမည် ဦးရေ ( ၃၄၄၀) ဦး ရှိကြောင်း တောင်ကြီးခရိုင် ရွေးကောက်ပွဲ ကော်မရှင် ဥက္ကဋ္ဌ ဦးဝင်းရွှေ က သျှမ်းသံတော်ဆင့် ကိုပြောသည်။
“ကြိုတင်မဲ အနေနဲ့ တပ်မတော်သား နဲ့ အတူနေ မိသားစုဝင်တွေရဲ့ ကြိုတင်မဲ စာရင်းပဲ ရထားပါတယ်” ဟု ဥက္ကဋ္ဌ ဦးဝင်းရွှေ က ပြောသည်။
အဆိုပါ တပ်သားနှင့် အတူနေမိသားစု ကြိုတင်မဲစာရင်းသည် တောင်ကြီးခရိုင် ရှိ တောင်ကြီးမြို့နယ်၊ ညောင်ရွှေမြို့နယ်၊ကလောမြို့နယ်၊ ရပ်စောက်မြို့နယ် နှင့် ဖယ်ခုံမြို့နယ် တို့ ဖြစ်ကြောင်းသိရသည်။
၂၀၂၀ ပါတီစုံ အထွေထွေ ဒီမိုကရေစီ ရွေးကောက်ပွဲ တွင် တောင်ကြီးခရိုင် အတွင်း မဲဆန္ဒရှင် စုစုပေါင်း (၇၄၈၄၅၁) ဦးရှိပြီး ခရိုင် မဲရုံပေါင်း (၇၂၃) ရုံ ရှိကြောင်းလည်း ခရိုင်ရွေးကောက်ပွဲ ကော်မရှင် မှစုံစမ်းသိရသည်။
“မဲထည့်မယ့်မဲဆန္ဒရှင် ၇ သိန်းကျော်ထဲမှာ တပ်မတော်သားနဲ့ အတူနေမိသားစုဝင်ရဲ့ စာရင်းပါ သွားပြီ” ဟု ဦးဝင်းရွှေ က ဆိုသည်။
တောင်ကြီးခရိုင်တွင် နိုဝင်ဘာ (၈) ရက်နေ့မှာ ဝင်ရောက်ယှဉ်ပြိုင်မည့် နိုင်ငံရေး ပါတီ စုစုပေါင်း (၁၈) ပါတီရှိပြီး ကိုယ်စားလှယ်လောင်း (၁၂၂ ) ဦး ရှိကြောင်း သိရသည်။
သျှမ်းပြည်တွင် တပ်မတော်သား မဲရုံ စုစုပေါင်း (၇၅) ရုံရှိပြီး ၊ တပ် နှင့် ပြည်သူ မဲရုံပေါင်း (၁၁၄) ရုံ ရှိကြောင်း သိရသည်။
