သျှမ်းပြည်နယ်တောင်ပိုင်း၊ တောင်ကြီးခရိုင် အတွင်းတွင် အွန်လိုင်းမှတဆင့် တရားမဝင်မြေကွက် ရောင်းချနေသူများကို ထွေအုပ်ရုံးမှ အသိပေးစာထုတ်ပြန်လိုက်ကြောင်း သတင်းရရှိသည်။
ပြီးခဲ့သည့် ဩဂုတ်လ ပထမပတ်ကတည်း တောင်ကြီးခရိုင် ကျောက်တစ်လုံးကြီးမြို့ နောင်ကား၊ နောင်ရွေးဖက်တွင် မြေကွက်များကို ဈေးသက်သာစွာဖြင့် အွန်လိုင်းကနေရောင်းချနေသူများကို မြေယာဥပဒေနှင့်အညီ ခွင့်ပြုချက်ရရှိရေး တင်ပြဆောင်ရွက်ကြရန်နှင့် ထိုသို့ မလိုက်နာသည့်သူများကို တည်ဆဲဥပဒေအရ အရေးယူမည်ဖြစ်ကြောင်း ဩဂုတ်လ ၁၈ ရက်နေ့တွင် မြို့နယ် ထွေထွေအုပ်ချုပ်ရေးရုံးမှ ထုတ်ပြန်လိုက်သည်။
“ အခု ကျောက်တစ်လုံးမှာ မြေဝယ်ရင် တရားမဝင်ဘူး။ မဝယ်နဲ့ တကယ်လို့ ရွာထဲမှာ အသိရှိတယ်ဆိုရင်တော့ တစ်မျိုးပေါ့လေ။သူများကြော်ငြာတိုင်းဝယ်ရင် မကောင်းဘူး။ ဝယ်လည်း ပိုက်ဆံ ရှုံး တယ်။ အဲမြေတွေက ဖျက်ချင်တဲ့အချိန်ပေးရတယ်။ ပွဲစားတွေက ပွဲစားခပဲ လိုချင်တာပဲ။ အစိုးရတစ်ယောက်တက်လာရင်အဲဒါတွေ ဆွဲချမှာ ။ အိမ်တွေ ဆွဲနှုတ်မှာ။” ဟု တောင်ကြီး ဒေသခံတစ်ဦးက ဆိုသည်။
ထိုသို့ မြေဝယ်မည်ဆိုပါက စာရွက်စာတမ်းနှင့် မြေအမျိုးစားများကို မှန်ကန်မှုရှိမရှိ စုံစမ်းပြီးမှသာ ဝယ်ယူနိုင်ကြောင်းနှင့် မြေပွဲစားများမှာလည်း မြေရောင်းမထွက်ခင်အထိသာ တာဝန်ယူမှုရှိပြီး မြေရောင်းပြီးလျှင် ဖြစ်လာသည့် ပြဿနာများကို တာဝန်ယူမှု တာဝန်ခံမှု မပေးကြကြောင်း သိရသည်။
ထို့အပြင် မြေအများစုကို (PNO) နှင့် စစ်ကောင်စီတပ်များမှ အချိန်မရွေးသိမ်းနိုင်ကြောင်း နှင့် မြေစုထားသူများမှာ ငွေဈေးအတက်ကျကြောင့် မြေများဝယ်စုထားကြကြောင်း မြေပွဲစားတစ်ဦးက ဆိုသည်။
“ သူတို့လိုချင်ရင်ဘယ်မြေဖြစ်ဖြစ် သိမ်းသွားတာပဲ။ သူတို့ လုပ်ချင်တာတစ်ခုခုရှိပြီဆိုရင် သိမ်းနိုင်တယ်။ အစိုးရအနေနဲ့ မလွတ်ကင်းဘူးဆိုပြီး သိမ်းတယ်။ မြေဝယ်တဲ့သူတွေက ငွေဈေးအတက်ကျ ဖြစ်နေတော့ လက်ထဲ ပိုက်ဆံမထားချင်လို့ ဝယ်ထားကြတယ်။” ဟု မြေပွဲစားလုပ်နေသူတစ်ဦးကပြောသည်။
ထွေအုပ်ရုံးမှလည်း သက်ဆိုင်ရာ အိမ်ခြံမြေဝန်ဆောင်မှု အသင်းများရှိ အသင်းဝင်များမှ တရားမဝင်ဖော်ထုတ်ရောင်းချမှု ရှိ၊ မရှိ ပြန်လည် စီစစ်တင်ပြရန် အသိပေးထုတ်ပြန်လိုက်သည်။
အလားတူ ညိုမီးရွာဖက်တွင် မြေဝယ်ထားသူတစ်ဦးမှာလည်း စစ်ကောင်စီတပ်မှ တပ်ပိုင်မြေဟုဆိုကာ လာရောက်သိမ်းသွားကြောင်းသိရသည်။
လက်ရှိတောင်ကြီးမြို့နယ်အတွင်း စစ်ကောင်စီတပ်နှင့် ပအိုဝ်းပြည်သူ့စစ် (PNO) တို့မှ နယ်မြေစိုးမိုးထားပြီး စစ်မှုထမ်းရန်အတွက် လူများဆက်တိုက်စုဆောင်းနေလျှက်ရှိကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments