သျှမ်းပြည်တောင်ပိုင်း တောင်ကြီးခရိုင်အတွင်း စစ်ကောင်စီမှ စစ်မှုထမ်းရန် အတွက် ခေါ်ဆောင်ခံရသည့် လူငယ်များ ရှေ့တန်းတွင် သေဆုံးမှုများရှိနေကြောင်း ဒေသခံများထံ စုံစမ်းသိရသည်။
ထိုသူများသည် တောင်ကြီးမြို့နယ်နှင့် ညောင်ရွှေမြို့နယ်များမှ စစ်မှုထမ်း အပတ်စဉ် (၅) နှင့် (၆) အတွက် စစ်မှုထမ်းခေါ်ဆောင်ခံသွားရသည့် လူငယ်များဖြစ်ကြသည်။
ဇန်နဝါရီလ (၅) ရက်မှ (၁၀) ရက်အတွင်း သျှမ်းပြည်တောင်ပိုင်း တောင်ကြီးနှင့် ညောင်ရွှေမြို့နယ်တို့မှ စစ်မှုထမ်းအတွက် ခေါ်ဆောင်သွားခံရသော လူငယ်များ ရှေ့တန်း၌ကျဆုံးသွားကြောင်းနှင့် ထိုလူငယ်များတွင် စစ်မှုထမ်းအကျုံးဝင် အသက်အရွယ်မပြည့်မီသေးသည့် အသက် (၁၅) မှ (၁၇) နှစ် အရွယ် ဆယ်ကျော်သက်လူငယ်များပါ ပါဝင်နေကြောင်း သတင်းရရှိသည်။
“ရှေ့တန်းမှာ ကျဆုံးသွားတယ်ဆိုပြီး အိမ်တိုင်ရာရောက်အကြောင်းကြားတာရော၊ အကြောင်းမကြားဘဲ တဆင့်ပြန်သိရတာမျိုးတွေလည်း ရှိနေတယ်၊ နာရေးလုပ်တာ အလောင်းပြန်မရ၊ ဘယ်လိုသေသွားလဲဆိုတာမသိရတာတွေ အတော်များတယ်လို့ကြားတယ်” ဟု ရှေ့တန်း၌ ကျဆုံးသွားသော လူငယ်တစ်ဦး၏ မိသားစုဝင်များနှင့် နီးစပ်သူတစ်ဦးက သျှမ်းသံတော်ဆင့်သို့ပြောသည်။
ထို့အပြင် စစ်မှုထမ်းအပတ်စဉ် (၆)မှ ဒဏ်ရာရရှိလာသော လူငယ်များသည် အောင်သပြေ နှင့် အောင်ပန်းစစ်ဆေးရုံတို့တွင် ရောက်ရှိနေပြီး ဆေးကုသမှုမပေးကြောင်း သိရသည်။
“အပတ်စဉ် ၆ က ဒဏ်ရာရလာတဲ့ လူငယ်တွေ ထပ်ရောက်တယ်လို့ကြားတယ်၊ တချို့ကို ဆေးမကုဘဲ ပစ်ထားတာ ၄၊ ၅ ရက်ရှိပြီလို့ သိရတယ်” ဟု စစ်ဆေးရုံ အသိုင်းအဝိုင်းနှင့် နီးစပ်သူတစ်ဦးထံမှ သိရသည်။
ထိုသို့ ဒဏ်ရာရထားသည့် လူငယ်များတွင် မိမိ၏မိသားစုဝင်များ ပါဝင်ခြင်းရှိ၊ မရှိ စုံစမ်း၍ ပြန်လည် ခေါ်ယူစေလိုကြောင်း ၎င်းကဆက်ပြောသည်။
ပြည်သူ့စစ်မှုထမ်း သင်တန်းအမှတ်စဉ် (၁) ကို (ဧပြီလ ၈ ရက်) မှစတင်၍ လက်ရှိအမှတ်စဉ် (၈) အထိ သင်တန်းဆင်းခဲ့ပြီးဖြစ်ကာ ထိုသင်တန်းများမှ ပြည်သူ့စစ်မှုထမ်းများသည့် တပ်ရင်းတပ်ဖွဲ့များတွင် တာဝန်ထမ်းဆောင်နေကြကြောင်း စစ်ကောင်စီက သတင်းထုတ်ပြန်ထားသော်လည်း စစ်မှုထမ်း စုဆောင်းခံရသည့် လူငယ်အားလုံးနီးပါး စစ်မြေပြင်ရှေ့တန်းကိုသာ ပို့ဆောင်ခံနေရကြောင်းလည်း သိရသည်။
နိုင်ငံတဝှမ်း ဖြစ်ပွားနေသောတိုက်ပွဲများတွင် စစ်အင်အားပြုန်းတီးနေသော စစ်ကောင်စီတပ်မှ စစ်မှုမထမ်းမနေရ ဥပဒေအားအသက်သွင်းပြီး လူငယ်များအား အတင်းအဓ္ဓမ စစ်သားစုဆောင်းနေကာ အချို့နေရာများတွင် သက်ကြီးရွယ်အိုများနှင့် စစ်မှုထမ်းအသက်မပြည့်မှီသေးသည့် ဆယ်ကျော်သက်လူငယ်များကိုပါ ပေါ်တာဆွဲဖမ်းဆီးခေါ်ဆောင်လျက်ရှိနေသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments