ထိုင်းမြောက်ပိုင်းရောက်မြန်မာနိုင်ငံသားရွှေ့ပြောင်းအလုပ်သမားများ ကြိုတင်မဲစပေး

0

ထိုင်းနိုင်ငံမြောက်ပိုင်း ၉ ခရိုင်ရောက် မြန်မာနိုင်ငံသားရွှေ့ပြောင်းအလုပ်သမားများ ယနေ့ကစပြီး ချင်းမိုင်ခရိုင် ချင်းမိုင်မြို့ရှိ မြန်မာကောင်စစ်၀န်ရုံးတွင် ၂၀၂၀ ရွေးကောက်ပွဲအတွက် ကြိုတင်မဲပေးနေကြပါသည်။

ထိုင်းနိုင်ငံ ချင်းမိုင်မြို့ရှိ မြန်မာကောင်စစ်၀န်ရုံးသို့မဲလာပေးကြသည့် မြန်မာနိုင်ငံသားရွှေ့ပြောင်းအလုပ်သမားများ

ထိုင်းနိုင်ငံမြောက်ပိုင်းရောက်မဲမြန်မာနိုင်ငံသားဆန္ဒရှင်များက ကြိုတင်ဆန္ဒမဲပေးနိုင်ရန်အတွက် ဇူလိုင်လ ကတည်းက အမည်စာရင်းများပေးထားကြရပြီဖြစ်သည်။

ချင်းမိုင်မြို့ မြန်မာကောင်စစ်၀န်ရုံးတွင် ကြိုတင်မဲပေးသူများအား သွားရောက်ကူညီမှုပေးနေသည့်စေတနာ့၀န်ထမ်း ၊ချင်းမိုင်ရောက်သျှမ်းလူငယ်များအဖွဲ့က စိုင်းမိဏ်းက- “ဒီမနက်တော့ လားရှိုးနဲ့ မိုင်းကိုင်ပါ ။ ညနေပိုင်းတော့ မိုင်းရှူး ၊နမ့်စန်နဲ့ကျေးသီး မြို့ကလူတွေဖြစ်ပါတယ်။ ဒီနေ့လူတော်တော်များပါတယ်။ အားရကျေနပ်စရာကောင်းပါတယ်။ အမည်စာရင်းသွင်းထားတဲ့မဲဆန္ဒရှင်တွေ သတ်မှတ်ထားတဲ့နေ့ရက်မှာအချိန်မှီမဲလာပေးကြပါလို့ တိုက်တွန်းချင်ပါတယ်ခင်ဗျ။ နောက်ကျမှရောက်ရင်အခွင့်အရေးဆုံးရှုံးပါမယ်။ ဒီအခွင့်အရေးက ၅ နှစ်နေမှ တကြိမ်သာရတဲ့အခွင့်အရေးပါ။” – ဟု သျှမ်းသံတော်ဆင့်အားပြောသည်။

အမည်စာရင်းပေးထားသည့်မဲဆန္ဒရှင်များအနေဖြင့် အောက်တိုဘာလ ၁၀ ၊ ၁၁ နှင့် ၁၃ ရက်နေ့တွင် မြန်မာကောင်စစ်၀န်ရုံးမှထုတ်ပြန်ထားသည့်စာရင်းအတိုင်း သက်ဆိုင်ရာ မြို့နယ်များ၏ မဲဆန္ဒရှင်များက ကြိုတင်မဲလာပေးရမည်ဖြစ်သည်။

မြန်မာကောင်စစ်၀န်ရုံးမှ ကြေညာထားသည့် မြို့နယ်အလိုက်မဲပေးရမည့်ရက်

ချင်းမိုင်-လမ်းပွန်းနယ်စပ်မှ လားရှိုး၊ မိုင်းကိုင် မြို့သားအလုပ်သမားများ လူအယောက် ၅၀ ခန့်စုပြီး    ကြိုတင်မဲ ပေးရန်အတူတူလာကြသည့်  မိုင်းကိုင်ဒေသခံ မဲဆန္ဒရှင်  နန်းစင်က – “၀မ်းသာမှုခံစားရပါတယ်ရှင့်။ ကျမအသက် ၄၀ ကျော်ပြီ။ ဘ၀မှ ပထမဆုံးလုပ်ခွင့်ရတဲ့ အခွင့်အရေးပါ။ ကျမ စာပေမတတ်ပေမယ့် ကျမတို့သျှမ်းပြည်နယ်အတွက် နိုင်ငံသားတယောက်ရဲ့ တာ၀န်ကျေချင်လို့မဲလာပေးတာပါ။ ထင်ထားသလောက်မခက်ပါဘူး။ စိတ်ထဲထင့်နေတဲ့အရာတခုကတော့ ကျမတို့ပေးတဲ့ဆန္ဒမဲထည့်တဲ့ စာအိပ်တွေက ကော်က သိပ်မကပ်လို့ပါဘဲ။ ကျမတို့တကူးတက မဲလာပေးထားတော့ ကျမတို့ဆန္ဒမဲ ကျပျောက်မှာကိုစိုးရိမ်နေကြတာ။ ”- ဟုသျှမ်းသံတော်ဆင့်အားပြောသည်။

၄င်းနှင့်ပတ်သက်ပြီး ရှမ်းတိုင်းရင်းသားများဒီမိုကရေစီအဖွဲ့ချုပ် SNLD ပြောခွင့်ရစိုင်းလိတ်က – “အဲတာတော့ စိုးရိမ်စရာမရှိပါဘူး။ မပျောက်နိုင်ဘူး။ ဘာလို့လဲဆိုတော့ သက်ဆိုင်ရာမြို့ရဲ့ မဲရုံမှာ ကြိုတင်မဲထည့်ဖို့မဲဆန္ဒရှင်စာရင်းကရှိပြီးသားဘဲ။ မဲရေတွက်တဲ့အခါကျရင်ရှိထားတဲ့စရင်းနဲ့ ရလာတဲ့မဲပြားကို ပြန်တိုက်ကြည့်ရတယ်လေ။ ”- ဟုပြောဆိုသည်။

မဲမပေးမှီ မဲဆန္ဒရှင်များအား ကောင်စစ်၀န်ရုံးမှထုတ်ပြန်ထားသည့်စည်းကမ်းများ လိုက်နာရန် ၊ ဆောင်ရန်ရှောင်ရန်များကို စေတနာ့၀န်ထမ်းများက မဲရုံပြင်ပတွင် ရှင်းလင်းပြောပြနေစဉ်

ယနေ့မနက်ပိုင်း မဲလာပေးသည့် လားရှိုး မိုင်းကိုင်ဒေသခံ ၁၇၂ ဉီးရှိပြီး မွန်းလွဲပိုင်းတွင်မူ မိုင်းရှူး နမ့်စန် ကျေးသီးမြို့သားများ စုစုပေါင်း ၁၈၅ ဉီးက ကြိုတင်ဆန္ဒမဲလာပေးကြကြောင်းသိရသည်။

လမ်းပွန်းခရိုင်မှ ကြိုတင်မဲလာပေးသည့် မိုင်းနန်းမြို့သားများအဖွဲ့ကလည်း- မဲပေးရတာ လွယ်ကူအဆင်ပြေတယ်။ အနီးကပ်လာကြည့်ပြီး ဖိအားပေး တာမျိုးမရှိဘူး။ လွတ်လပ်မှုရှိပါတယ် – ဟုပြောသည်။

ထိုင်းနိုင်ငံ ချင်းမိုင်မြို့ရှိ မြန်မာကောင်စစ်၀န်ရုံးသို့မဲလာပေးကြသည့် မြန်မာနိုင်ငံသားရွှေ့ပြောင်းအလုပ်သမားများ

ချင်းမိုင်ကောင်စစ်၀န်ရုံးသို့မဲပေးရန်အမည်စာရင်းတင်သွင်းထားသည့်  မြန်မာနိုင်ငံသား ရွှေ့ပြောင်းအလုပ်သမား ၁၀၀၀ ကျော်ရှိပြီး ၄င်းတို့သည် ထိုင်းနိုင်ငံမြောက်ပိုင်း ချင်းရိုင်း၊ မယ့်ဟောင့်ဆောင်၊ ချင်းမိုင်၊ ဖယောင်း ၊ နန့်၊ လမ်းပန်း၊ လမ်းပွန်း၊ ဖရယ့်၊ ဉတရတစ် ခရိုင်တို့မှ လာရောက်မဲပေးကြရမည့်သူများဖြစ်ကြောင်းသိရသည်။

Leave a Comments

SHARE