ကျောက်မဲစစ်ရှောင် အမျိုးသမီးနှင့်ကလေးများ စိတ်သောကရောက်

အစိုးရတပ်နှင့် RCSS/SSA တို့ဖြစ်ပွါးသော တိုက်ပွဲကြောင့် ကျောက်မဲမြို့နယ်အတွင်းရှိ ဘုန်းကြီးကျောင်းများအသီးသီးသို့ စစ်ဘေးရှောင်  ရွာသားစုစုပေါင်း သုံးထောင်နီးပါးရှိနေပြီး အများစုမှာ အမျိုးသမီးနှင့်ကလေးငယ်များဖြစ်နေကြောင်းသိရသည်။

ကိုဗစ်နိုင်တင်း ပျံ့ပွါးကူးစက်မှု များပြားလာနေချိန်  စစ်ဘေးကလည်း ရှောင်နေရသဖြင့် နေထိုင်စားသောက်မှုခက်ခဲသည့်အပြင် သီးနှံဆွတ်ချိန်လည်းတန်နေပြီဖြစ်ရာ စစ်ဘေးရှောင်များ စိတ်သောကရောက်နေကြာင်း  စစ်ဘေးရှောင်များအားကူညီမှုပေးနေသည့်အဖွဲ့များကပြောသည်။

 ကျောက်မဲမြို့နယ် နမ့်ခုံး ပရဟိအဖွဲ့ ဉက္ကဌ စိုင်းကူးက – “ပုံ၀ိုးရွာအုပ်ချုပ်ရေးမှူးကပြောလာပါတယ်။ တောင်ထိပ်ရွာဘုန်းကြီးကျောင်းကစစ်ရှောင်တွေ အစားအသောက်ခက်ခဲနေတယ်ဆိုလို့ ကျနော်တို့အဖွဲ့ မနေ့က တိုက်ပွဲကြားကအရဲစွန့်ပြီးသွားပို့ပေးခဲ့ပါတယ်။ ကျနော်တို့ရောက်သွားတော့ စစ်ရှောင်ရွာသူတွေ ငိုယိုနေကြတယ်။ တော်တော်များများကတော့ ရွာမှာကျန်တဲ့ကျွဲနွားတွေ ၊ ဆွတ်ချိန်တန်နေတဲ့သီးနှံတွေကို ပူပန်ကြတာ။ တချို့ကတော့ ပြတ်လုနီးပါး ရိက္ခာတွေလာပို့ပေးလို့ ကျေးဇူးတင်ပြီး မျက်ရည်ကျတာ။”- ဟုသျှမ်းသံတော်ဆင့်အားပြောသည်။

 နမ့်မော်ဟင်ရွာတွင်မူ သက်ကြီးရွယ်အို ၁၀ ဉီးခန့် (မထွက်ပြေးလာနိုင်သဖြင့်) ရွာတွင်ကျန်ခဲ့ကြောင်း ၊ ရွာသူ လူငယ် ကလေးများ စစ်ဘေးရှောင်ထွက်လာနိုင်ပြီဖြစ်သော်လည်း အစိုးရတပ်မှအင်အားထပ်ဖြည့်လှုပ်ရှားနေသဖြင့် တိုက်ပွဲများထပ်မံဖြစ်ပွါးလာနိုင်ကြောင်း၊ တဖက်တွင်လည်း လယ်ယာအတွင်းဆွတ်ချိန်တန်ပြီဖြစ်သော သီးနှံများထံစိတ်ရောက်နေကြောင်း စစ်ရှောင်များပြောပြချက်အရသိရသည်။

 စစ်ရှောင် နန်းလှက – “သီးနှံတွေက ဆွတ်ချိန်တန်နေပြီ။ ပြောင်းတွေဘာတွေချိုးရတော့မယ်လေ။ ဗမာတပ်က လူထုကောင်းကောင်း နေလို့မရအောင် တမင်သက်သက်လာဖျက်ဆီးနေတာလားလို့တောင်တွေးမိကြတယ်။ ”- ဟု သျှမ်းသံတော်ဆင့်အားပြောသည်။

 အောက်တိုဘာလ ၈ ရက် ယမန်နေ့က သံဃာတော်များ၊ လူမှုကူညီရေးအဖွဲ့များ နှင့် လွှတ်တော်အမတ်များစုပေါင်းကာ စားနပ်ရိက္ခာများတင်ဆောင်ပြီး နမ့်မဟင်နှင့်တောင်ထိပ်ရွာသား စစ်ရှောင် ၇၀၀ ခန့်ရှိရာ တောင်ထိပ် ဘုန်းတော်ကြီးကျောင်းသို့ သွားရောက်ပို့ဆောင်ပေးခဲ့ကြောင်းသိရသည်။

အဆိုပါ တောင်ထိပ်ဘုန်းကြီးကျောင်းတွင်စစ်ဘေးရှောင်များမှာအမျိုးသမီး၊ သက်ကြီးရွယ်အိုနှင့် ကလေးများအများဆုံးဖြစ်ကြောင်း သိရသည်။

ရှမ်းအမျိုးသမီးရေးရာ ဆက်သွယ်လှုပ်ရှားဆောင်ရွက်ရေးအသင်း SWAN မှ နန်းခမ်းအွန်က- “အခုက ကိုဗစ်ကူးစက်မှုနှုန်းမြင့်မားတဲ့ကာလ ဖြစ်တာကြောင့် အခုလိုဘုန်းကြီးကျောင်းမှာလာပြီး စုရုံးနေထိုင်နေရတာဟာ စစ်ဘေးရှောင်တွေအတွက် အလွန်စိုးရိမ်မိပါတယ်။  တဖက်ကလည်း တိုက်ပွဲဟာ ကျေးရွာအနားမှာဖြစ်တာကြောင့် ကလေးငယ်တွေနဲ့အမျိုးသမီးတွေ စိတ်ပိုင်းဆိုင်ရာထိခိုက်မှာကို စိုးရိမ်မိပါတယ်။ ”-ဟု ပြောသည်။

 မိမိတို့ SWAN အနေဖြင့်လည်း စစ်ဘေးရှောင်များအတွက် အိပ်ရာထိုင်ခင်းများ အသုံးအဆောင်ပစ္စည်းများကို တကြိမ်သွားရောက်ပို့ဆောင်ကူညီမှုပေးခဲ့ပြီးဖြစ်ကြောင်း ၊ ထပ်မံပို့ဆောင်ကူညီနိုင်ရေးအတွက် စစ်ရှောင်စာရင်းထပ်မံကောက်ယူနေကြောင်း ပြောပါသည်။

 လက်ရှိကျောက်မဲမြို့နယ်အတွင်း စစ်ဘေးရှောင်ဉီးရေ ၃၀၀၀ ခန့် – ပုံ၀ိုးဘုန်းကြီးကျောင်း ၊ တောင်ထိပ်ဘုန်းကြီးကျောင်းတွင် ၇၀၀ ၊ နမ့်အုမ်ဟစ်ကျောင်းတွင် ၄၀၀၊ ခန်ခိုင်းတွင် ၄၀၀ ၊ ကွန်ဟဲန်တွင် ၄၀၀၊ နားဆောင်းတွင် ၁၀၀၊ ဟိုင်းကွီတွင် ၁၀၀ ကျော် ၊ ကောင်းမူးခါမ်တွင် ၇၅ အိမ်ထောင်စု၊ နမ့်ဟန်ခိန်တွင် ၁၅၀ ကျော်၊ ကောင်းလန်းတွင် ၁၀၀ ကျော်နှင့် နောင်ကွမ် တွင် ၁၅၀ ကျော်- ရှိနေကြောင်းလည်း စစ်ရှောင်ကူညီရေးအဖွဲ့ကပြောပါသည်။

 အစိုးရတပ်မတော်သည် အောက်တိုဘာလကုန်အထိ တဖက်သတ်အပစ်ရပ်ကြေညာထားသော်လည်း  ကျောက်မဲမြို့နယ်အတွင်း  NCA လက်မှတ်ရေးထိုးထားသော RCSS/SSA အားအင်အားဖြည့်တင်းတိုက်ခိုက်နေပါသည်။ ၄င်းနှင့်ပတ်သက်ပြီး RCSS/SSA က – တိုက်ပွဲဆက်လက်ဖြစ်ပွါး မဖြစ်ပွါးသည်မှာ အစိုးရတပ်မတော်တွင်သာမူတည်ကြောင်း- ပြောဆိုပါသည်။ တဖက်တွင်လည်း ကိုဗစ်ကာလကြောင့် ၂ ဖက်တပ်တွေ့ဆုံဆွေးနွေးရန်မလွယ်ကူသကဲ့သို့  တိုက်ပွဲဆက်လက်ပြင်းထန်မည်ဆိုပါက ၁ လ သာကျန်တော့သည့် ၂၀၂၀ ပါတီစုံရွေးကောက်ပွဲကိုလည်း ထိခိုက်နိုင်ကြောင်း နိုင်ငံရေးပါတီများက သုံးသပ်ပြောဆိုနေကြပါသည်။