သျှမ်းပြည်နယ် အရှေ့ပိုင်း တာချီလိတ်မြို့နယ် ရွှေတူးဖော်မှု ပြုလုပ်နေသည့် တာလေမြို့ နယ်ခွဲ နားဟိုင်းလုံ ကျေးရွာတွင် ယခုလဆန်းပိုင်းက မိုးသည်းထန်စွာ ရွာသွန်းမှုကြောင့် နေအိမ်ထဲသို့ရေများဝင်ရောက်ကာ တိရိစ္ဆာန်များ သေကြကြောင်း သတင်းရရှိသည်။
“ မိုးရွာတာကတော့ မေလ ၃ ရက် ည ၁၀ နာရီကနေ မနက် ၃နာရီထိ ဆိုတော့ အိမ်နောက်က ချောင်းရေတွေ တက်လာတယ်။ နေအိမ် ၄ လုံး ရေဝင်တယ်။ တိရိစ္ဆာန်တွေလည်း သေတာ အများကြီးပါပဲ” လို့ နားဟိုင်းလုံ ကျေးရွာမှ သွားဖွားဆရာမ နန်းလာ က ပြောသည်။
ချောင်းရေများ လျှံကာ အိမ်ခြေ ၄အိမ်ထဲဝင်ပြီး ခြံထဲသို့ သဲများဖုံးသွားကြောင်း၊ အိမ်မွေး ကြက် ၁၅၀ ကျော်သေဆုံးပြီး၊ အိမ်သုံးပစ္စည်းများလည်း ပျက်စီး ကြောင်း နန်းလာ ကပြောသည်။
“ ဒီနှစ်က မိုးရွာတာ စောသလို ချောင်းရေလျှံ သဲတွေ မြင့်တက်မှုကလည်း စောလာတယ်။ အရင်နှစ်တွေက ဂျူလိုင်၊ သြဂုတ် လောက်မှဖြစ်တာ။ သဲတွေ ရေတွေ အိမ်ထဲဝင်ရင်တော့ တခြား အိမ်ရွှေ့နေကြတယ်။ ” ဟု နန်းလာ က ဆိုသည်။
ရွှေတူးဖော်မှု ဆက်လုပ်နေသေး သရွေ့ နားဟိုင်းလုံရေလွှမ်းမိုး မှုက ပိုပြီး ဖြစ်လာမည်ဖြစ်ကြောင်း လည်း နာဟိုင်းလုံ ကျေးရွာ ဒေသခံများက ပြောသည်။
“ အိမ်ထဲမိုးရေတွေဝင်၊ သဲနှုန်းတွေ ဝင်လာရင် ငိုကြ အော်ကြ တာတွေ ကြားရတာစိတ်မကောင်းဘူး။ ကျမအနေနဲ့ကတော့ ရွှေတူးဖော်မှုကို ရပ်စေချင်ပြီ” ဟုလည်း နန်းလာ က ထပ်ပြောသည်။
မိုးသည်းထန်ရွာသွန်းကာ နေအိမ်ထဲသဲနှုန်းများ၊ရေများဝင်ရောက်ပြီး ပျက်စီးဆုံးရှုံးမှုကိုလည်း တာလေမြို့အုပ်ချုပ်ရေးမှူး၊ မိုင်းလင်းနယ်မြေ စခန်းမှူး၊ ကျေးရွာ အုပ်စု အုပ်ချုပ်ရေးမှူး နှင့် ကြာကူနီ ဌာနေ ပြည်သူ့စစ် တို့က ကွင်းဆင်းစစ်ဆေး ကြောင်း သိရသည်။
သျှမ်းပြည်နယ် အရှေ့ပိုင်း တာချီလိတ်မြို့နယ် အတွင်း ရွှေတူးဖော်မှု ကို ၂၀၀၇ ခုနှစ်တွင် စတင်တူးဖော်ခဲ့သည်။ ရွှေတူးဖော်မှုစီမံကိန်းမှ သဲနှင့်နှုန်းမြေများ၊ အဆိပ်ဓါတ်ပါသောရေများက ဒေသခံလူထု၏ လယ်ယာခြံမြေများအတွင်းနှင့် နေအိမ်များအတွင်းဝင်ရောက်သဖြင့် သဘာဝပတ်ဝန်းကျင်ထိခိုက်ပျက်စီး၊ မြစ်ချောင်းများတိမ်ကောပျောက်ကွယ်ကာ လယ်ယာဧကပေါင်း ရာနှင့်ချီပျက်စီးဆုံးရှုံးခဲ့ရသဖြင့် ရွှေတူးဖော်မှုရပ်ဆိုင်းရန် ဒေသခံများအကြိမ်ကြိမ်တောင်းဆိုသော်လည်း ယနေ့တိုင် ရပ်ဆိုင်းခြင်း မရှိသေးပေ။
