သျှမ်းပြည် တာချီလိတ်ခရိုင် တာချီလိတ်မြို့နယ် ဝလုံးကျေးရွာအုပ်စု လွယ်သထုံကျေးရွာရှိ ဒေသခံများ ကကျောက်မီးသွေးသုံး ထုံးဖိုစက်ရုံ ပိတ်ရန် တောင်းဆိုထားသော်လည်း ပြန်လည် အသုံးပြုလာနေကြောင်း စုံစမ်းသိရှိရသည်။

ပြီးခဲ့သည့် ဧပြီ နောက်ဆုံးပတ်မှစတင်ပြီး လွယ်သထုံကျေးရွာရှိ ကျောက်မီးသွေးသုံး ထုံးဖိုစက်ရုံကို ပြန်အသုံးပြုလာသည့်အတွက်ကြောင့် အနံ့သက်ဆိုးများ ပြန်ထွက်ပေါ်လာခဲ့ကြောင်း သိရသည်။

“ဘယ်လိုပြောပြော မရဘူး။ သူတို့ ပြန်ရှို့လာတာ ၅ ရက်လောက်ရှိနေပြီ။ အနံ့ဆိုးတွေ ပြန်ထွက်လာခဲ့တယ်။ တစ်ချို့တွေဆိုရင် အဲ့ အနံ့ကြောင့် ခေါင်းတွေပါ ကိုက်တယ်။ ရွာထဲနေလို့မရဘူး”ဟု လွယ်သထုံကျေးရွာ ဒေသခံတစ်ဦးက ပြောသည်။

ပြီးခဲ့သည့် ၂၀၂၂ ခုနှစ် နိုင်ဝင်ဘာ ၁၆ ရက်တွင် အဆိုပါ ထုံးဖို စက်ရုံကို ယာယီပိတ်သိမ်းသွားရန်အတွက် မြို့နယ်ထွေအုပ်ရုံး တာဝန်ရှိသူ နှင့် သဘာဝပတ်ဝန်းကျင် ထိန်းသိမ်းရေးအဖွဲ့ဝင်များက ညွှန်ကြားခဲ့သည်။

ထိုသို့ ညွှန်ကြားထားသော်လည်း ယခု ၂၀၂၃ ခုနှစ် မတ်လမှစ စက်ရုံကို ပြန်လည် အသုံးပြုလာခဲ့ကြောင်း သိရသည်။

“ ပိတ်ခိုင်းလိုက်တာ မကြာဘူး။ သူတို့ ပြန်လုပ်တယ်။ ပြီးခဲ့တဲ့ မတ်လ လောက်ကလည်း စက်ရုံက ပြန်လည်ပတ်နေတယ်။ ကျနော်တို့ အနံ့တအားဆိုးတယ်လို့ သွားပြောလိုက်တော့ တစ်လလောက် ပြန်ပိတ်သွားတယ်။ အခုတော့ ပြန်လုပ်နေတယ်” ဟု အထက်ပါ လွယ်သထုံကျေးရွာဒေသခံက ပြောသည်။

ထုံးဖိုမှ ထွက်လာသည့် အနံ့သက်ဆိုးသည် လွယ်သထုံအောက်ရွာအထိ အနံ့ရသည့်အတွက်ကြောင့် ဒေသခံများက ခေါင်းကိုက်ဝေဒနာ နှင့် အပြင်သွားလာလို့ မရဖြစ်နေကြောင်း သိရသည်။

“ ကျမတို့ ရွာနဲ့က တော်တော်ဝေးတယ်။ ဒီထိ အနံ့တွေကရတယ်။ အဲ့စက်ရုံ နဲ့ ကျမတို့ ရွာအထိဆိုရင် ၁ နာရီကျော်လောက်မောင်းရတယ်။ ညဆိုရင်လည်း အိပ်မရဘူး။ တံခါးတွေ ပိတ်ထားရတာ။ နေ့လည်လည်း အပြင်သွားမရဘူး။ တံခါးဖွင့်တာနဲ့ အနံ့က အရမ်းဆိုးတယ်” ဟု လွယ်သထုံအောက်ရွာ ဒေသခံ အမျိုးသမီးတစ်ဦးက ပြောသည်။

ထုံးဖိုမှ ထွက်လာသည့်ဓာတ်ငွေ့ အနံ့ဆိုးများကို ရှုရှိုက်မိပါက အသက်ရှူလမ်းကြောင်းဆိုင်ရာ ရောဂါ ဖြစ်ခြင်း၊ ကင်ဆာရောဂါဖြစ်လာနိုင်ခြင်း၊ ကိုယ်ဝန်ဆောင်မိခင်များ ကိုယ်ဝန်ပျက်ကျနိုင်ခြင်း စသည့် အသက်ရှုလမ်းကြောင်းဆိုင်ရာ ရောဂါများ ဖြစ်ပွားလာနိုင်ကြောင်း သိရသည်။