သျှမ်းပြည် တာချီလိတ်ခရိုင်၊ တာချီလိတ်မြို့နယ်အတွင်း အရက်အတူတူ သောက်နေကြသည့် အမျိုးသားလူငယ် နှစ်ဦးသည် အချင်းချင်း စကားများပြီး ပစ်ခတ်မှု ဖြစ်ပွားခဲ့ကြောင်း သိရသည်။
ယမန်နေ့ (ဇွန်လ ၁၈) ရက်နေ့ ညပိုင်း ၇ နာရီတွင် တာချီလိတ်မြို့၊ ပန်ဟက်ကျေးရွာနေ လူငယ်တစ်ဦး နှင့် သီရိငေါကျေးရွာနေ လူငယ်တစ်ဦး တို့က လယ်တဲ တစ်ခုအတွင်း အရက်အတူတူသောက်ရာမှ စကားများပြီး အချင်းချင်း သေနတ်ပစ်ခတ်မှု ဖြစ်ပွားခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
“တူမီးသေနတ် နဲ့ အချင်းချင်း ပစ်ကြတာ၊ လူမှုကူညီရေးအသင်းတွေရောက်လာတဲ့ အချိန်မှာတော့ သူတို့ နှစ်ဦးရဲ့ လက်ထဲမှာ ဓားတွေ၊ သေနတ်တွေ မရှိတော့ဘူး။ တစ်ယောက်က တူမီးသေနတ် နဲ့ ပစ်ပြီး၊ တစ်ယောက်က ဓားနဲ့ လိုက်ခုတ်လိုက်တာတဲ့၊ နှစ်ယောက်စလုံးက ဒဏ်ရာပြင်းထန်တယ်” ဟု နီးစပ်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
တူမီးသေနတ်ဖြင့် ပစ်ခံရသည့် အမျိုးသားလူငယ်သည် ဘယ်ဘက် ရင်အုံတွင် ထိမှန်သွားပြီး ၊ ဓားဖြင့် ခုတ်ခံရသည့် အမျိုးသားလူငယ်က ပါးတစ်ဖက် နှင့် ခါးနေရာတို့တွင် ထိခိုက်ဒဏ်ရာ ရသွားကြောင်း သိရသည်။
အဆိုပါ အချင်းချင်း ခိုက်ရန်ဖြစ်ပွားသည့် အမျိုးသားလူငယ် နှစ်ဦးအနက် တူမီးသေနတ်ဖြင့် ပစ်သူသည် ပန်ဟက်ကျေးရွာနေ စိုင်းလုံ အသက် ၂၆ နှစ်၊ ဓားဖြင့်ခုတ်သူ သီရီငေါကျေးရွာနေ စိုင်းဦးခွန်း အသက် ၂၃ နှစ် ဖြစ်ကြကြောင်းလည်း သိရသည်။
“အခုမှာတော့ နှစ်ယောက်စလုံးကို ဆေးရုံပို့ပြီး ကုသထားတယ်၊ မနေ့က ဆေးရုံရောက်တဲ့ အချိန် သွေးလေးလုံးသွင်းရတယ်လို့ ပြောတယ်၊ ဒီနေ့တော့ အခြေအနေ မသိရသေးဘူး၊ ဒဏ်ရာကတော့ တော်တော်ပြင်းတယ်” ဟု အထက်ပါ နီးစပ်သူ အမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဇွန်လ ၁၇ ရက်နေ့တွင်လည်း တာချီလိတ်မြို့၊ ဆန်ဆိုင်း (ခ) ရပ်ကွက်ရှိ စားသောက်ဆိုင် @16 တွင်လည်း ပစ်ခတ်မှု ဖြစ်ပွားခဲ့ပြီး ၃ ဦး ထက်မနည်း ထိခိုက်ဒဏ်ရာ ရရှိခဲ့သည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း တာချီလိတ်မြို့နယ်အတွင်း တရားမဝင် လုပ်ရပ်များ၊ လောင်းကစားဝိုင်းများ နှင့် ခုတ်သတ် ပစ်ခတ်မှုများလည်း ပိုမိုများပြားလာပြီး ဒေသခံများ လုံခြုံရေးအတွက် ကင်းမဲ့နေကြောင်းလည်း ဒေသခံများက ပြောဆိုညဥ်းတွားနေကြသည်။
Leave a Comments