သျှမ်းပြည်မြောက်ပိုင်း ကျောက်မဲမြို့နယ်အတွင်း RCSS/SSA လှုပ်ရှားနေထိုင်ရာတောပိုင်းက်သို့ အစိုးရတပ်မတော်မှ စစ်ကြောင်း ၂ ကြောင်းထိုးကာ လက်နက်ကြီးလက်နက်ငယ်များဖြင့် အင်အားဖြင့် ပစ်ခတ် ခဲ့ကြောင်းသိရသည်။
စက်တင်ဘာလလ ၃၀ ရက်နေ့ နံနက်ပိုင်းက အစိုးရတပ်မတော်စစ်ကြောင်းတစ်ကြောင်းကကျောက်မဲမြို့ ကျွဲကုန်းမှ နောင်ပိန်အွန်၊ ထိုမှတဆင့် နားပိန်း-နားပုံသို့လည်းကောင်း၊ ကျန်စစ်ကြောင်းတစ်ကြောင်းကလည်း ကောင်းဟုန်းမှ နားပုံ-နားပိန်းဘက်သို့လည်းကောင်း တက်လာကြပြီး RCSS/SSA လှုပ်ရှားရာ ကျောက်မဲမြို့ အရှေ့မြောက်ဘက် ၅ မိုင် ၆ မိုင်အကွာရှိ တောပိုင်းသို့လက်နက်ကြီးငယ်ပစ်ခတ်ခဲ့ကြကြောင်း နောင်ပိန်-ဂုတ်တွင်း ဒေသခံများကပြောသည်။
နောင်ပိန်ဒေသခံတဉီးက – “ဒီနေ့မနက် ၇ နာရီလောက်က အစိုးရစစ်ကြောင်းတစ်ကြောင်းကျွဲကုန်းဘက်ကတက်လာတယ်။ နောက်တကြောင်းက ကောင်းဟုန်းဘက်ကတက်လာတယ်။ နားပုံရွာကထွက်တာနဲ့ လက်နက်ကြီးငယ်နဲ့ အရပ်မျက်နှာအဘက်ဘက်ကို ပစ်ခတ်တယ်။ RCSS/SSA ဘက်ကတော့ ပြန်ပစ်ခတ်တာမကြားမိဘူး”- ဟုသျှမ်းသံတော်ဆင့်အားပြောသည်။
စက်တင်ဘာလ ၂၉ ရက် ယမန်နေ့ကမှသာ တပ်မတော်ဘက်က တဘက်သတ်အပစ်ရပ်ကာလအား နောက်တစ်လထပ်တိုးထားကြောင်း တပ်မတော် သတင်းမှန်နှင့်ပြန်ကြားရေးဌာနက ကြေငြာခဲ့သည်။
၄င်းနှင့်ပတ်သက်ပြီး RCSS/SSA ၏စစ်မြေပြင်အတွင်း အရာရှိတဉီးက – “သူတို့ဘက်ကတဘက်တည်းပစ်ခတ်နေတာ။ သစ်ပင် ခြုံပုတ်တွေထဲပစ်ခတ်တာ။ ကျနော်တို့တပ်စခန်းကို တိုက်ရိုက်မပစ်ခတ်လာလို့ ကျနော်တို့လည်းပြန်မပစ်ခတ်ခဲ့ပါဘူး”- ဟု သျှမ်းသံတော်ဆင့်အားပြောသည်။
နားပုံ နားပိန်းရွာသားတဉီးကလည်း -” ကျနော်တို့ဒေသမှာRCSS/SSA လှုပ်ရှားလာတာ ဟိုးအရင်ကတည်းကဘဲ။ ခုချိန်ထိတော့ ထွက်ပြေးရမလားမထွက်ပြေးရမလား မသိသေးဘူး။ စောင့်ကြည့်နေသေးတယ်အခြေအနေ “- ဟု သျှမ်းသံတော်ဆင့်အားပြောပြသည်။
အစိုးရတပ်မတော်သည် ယခု ၂၀၂၀ ခုနှစ်အတွင်း တဘက်သတ်အပစ်ရပ် ၃ ကြိမ် (မေလ ၁၀ ရက်မှ သြဂုတ်လကုန်၊ ထိုမှတဆင့် စက်တင်ဘာလကုန်အထိ၊ ယခုတကြိမ်တွင်မူ အောက်တိုဘာလကုန်အထိ) ကြေငြာခဲ့သည်။
ကျောက်မဲမြို့နယ်ပြည်နယ်လွှတ်တော်ကိုယ်စားလှယ် စိုင်းထွန်း၀င်းက -“အစိုးရစစ်ကြောင်း အားဖြည့်လှုပ်ရှားလာတဲ့အကြောင်းရင်းကတော့ ကြည့်မယ်ဆိုရင် ၃ ချက်ရှိပါတယ်။ ၁- အထက်ညွှန်ကြားချက်အရ လာတာ။ ၂- အချက်ကတော့ ဇွန်လ လူထုကိုပစ်သတ်တဲ့ကိစ္စကိုပြန်လာစစ်တာ။ ၃- က ရွေးကောက်ပွဲအတွက်လာတာ ဖြစ်နိုင်ပါတယ်” – ဟု သျှမ်းသံတော်ဆင့်အားပြောသည်။
ယခုနှစ်ဇွန်လ ၂၅ ရက်မှ ဇူလိုင်လ ၂၁ ရက်နေ့အထိ ၁ လအတွင်း အစိုးရတပ်မေတာ် ခလရ ၂၂၊ ၂၃၊ ၁၀၁၊ ၁၄၇၊ ၂၅၆ ၊ ၁၃၆ နှင့် ခမရ ၅၀၃ တို့ပူးပေါင်းတပ်များက ကျောက်မဲမြို့နယ်အတွင်းလှုပ်ရှားနေသော RCSS/SSA တပ်များနောက်လိုက်လံကာ ပစ်ခတ်တိုက်ခိုက်မှု အကြိမ် ၂၀ ထက်မနည်းဖြစ်ပွါးခဲ့သည်။ တိုက်ပွဲများမှာ ဟိုင်းကွီ၊ လွယ်စောင်၊ ပန်လော့အုပ်စုအတွင်းဖြစ်ပွါးခဲ့ပြီး လူထု ၁ ဉီးကျည်ဆံထိမှန်သေဆုံး၊ ၁ ဉီးထိမှန်ဒဏ်ရာရကာ ၁ ဉီးမှာ ဖမ်းဆီးရိုက်နှက်ခံရသည်။ ရွာသားများ ထိမှန်ဒဏ်ရာရ သေဆုံးမှုအပေါ်တရားမျှတမှုရရှိရေးအတွက်ကျောက်မဲလူထု ၁ သောင်းနီးပါးက အေးချမ်းစွာလမ်းလျှောက်ဆန္ဒထုတ်ဖော်ကာတောင်းဆိုခဲ့ကြသော်လည်းယနေ့တိုင် တရားမျှတမှုမရှိသေးကြောင်းကျောက်မဲဒေသခံများကပြောဆိုနေကြသည်။
