သျှမ်းပြည်တပ်မတော် ၂ တပ်ကို သတ်မှတ်ထားသည့်နယ်မြေ သာခွင့်ပြုပြီး၊ နယ်မြေကျော်ခွင့်မပြုကြောင်း ကာကွယ်ရေး ဦးစီးချုပ် မင်းအောင်လှိုင် က ပြောဆိုလိုက်သည်။
ကာကွယ်ရေး ဦးစီးချုပ်သည် စက်တင်ဘာ (၈) ရက် အရှေ့ပိုင်းတိုင်း စစ်ဌာနချုပ် နယ်မြေ အတွင်းသို့ ရောက်ရှိစဉ် ပြောကြားခဲ့သည်ဟု တပ်မတော် သတင်းမှန်ပြန်ကြားရေး၏ သတင်းစာမျက်နှာတွင် ရေးသားဖော်ပြထားသည်။
မူးယစ်ဆေးဝါး တိုက်ဖျက်ရေး လုပ်ငန်းများကို ကြပ်မတ်စွာ ကိုင်တွယ်ဆောင်ရွက်ရမည်ဖြစ်ပြီး ၊သျှမ်းပြည် ပြန်လည် ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) ကို လွယ်တိုင်းလျန်း ဒေသနှင့် မိုင်းပန် တောင်ခြမ်း ဒေသ၊ သျှမ်းပြည် တိုးတက်ရေး ကောင်စီ ၊သျှမ်းပြည် တပ်မတော်( SSPP/SSA) ကို ဝမ်ဟိုင်းဒေသတွင် သာ ခွင့်ပြုထားပြီး၊ ကျန်နယ်မြေများတွင် ခွင့်ပြုပေးထားခြင်းမရှိကြောင်း၊ နယ်မြေ ကျော်လွန်လှုပ်ရှားမှု ခွင့်ပြု၍ မရကြောင်း ကာကွယ်ရေး ဦးစီးချုပ် က ပြောဆိုသည်ဟု ဖော်ပြထားသည်။
သို့သော် သျှမ်းတပ်မတော် ၂ တပ် အနေဖြင့် ပြည်နယ် အဆင့် သဘောတူညီ စာချုပ် လက်မှတ်ရေးထိုးရာတွင် နယ်မြေ ကန့်ကွက်မှု မပါရှိကြောင်း၊ နယ်မြေ ပိုင်းခြားမှု မရှိထားသေးကြောင်းလည်း ပြောဆိုလိုက်သည်။
ထို့ကြောင့် SSPP/SSA ပြောရေးဆိုခွင့်ရှိသူ ဗိုလ်မှူး စိုင်းသန်းအောင် က“ ကျနော်တို့ ပစ်ခတ်တိုက်ခိုက်မှု ရပ်စဲရေး ပြည်နယ် အဆင့်လုပ်နေတာကို သူမေ့သွား တယ်ထင်တယ်။ ကျနော်တို့ ဒီနေရာနေရမယ် ။ဟိုနေရာနေရာမယ်ဆိုပြီး ကျနော်တို့လက်မှတ်ရေးထိုးထားတာ မရှိပါဘူး” ဟု သျှမ်းသံတော်ဆင့်ကို ပြောသည်။
SSPP/SSA အနေဖြင့် ပြည်နယ် အဆင့် အပစ်ခတ်ရပ်စဲရေး လက်မှတ်ရေးထိုးစဉ်တွင် ဝမ်ဟိုင်းဌာနချုပ် ကို အခြေပြု ပြီး လက်တလောရောက်ရှိနေသည့် တပ်ဖြန့်ခွဲထားသည့်နေရာကို ယာယီရပ်ဆိုင်းထားရန်သာ ပါရှိကြောင်း၊ ဝမ်ဟိုင်းဌာနချုပ်ကိုသာ ခွင့်ပြုထားသည်ဟူသည့်အချက် မပါရှိကြောင်း ဗိုလ်မှူး စိုင်းသန်းအောင် က ဆိုသည်။
ထိုနည်းတူ တနိုင်ငံလုံး အပစ်ခတ်ရပ်စဲရေး သဘောတူညီ စာချုပ် (NCA ) လက်မှတ်ရေးထိုးထားသည့် RCSS/SSA မှ ပြောရေးဆိုခွင့်ရှိသူ ဗိုလ်မှူး ခမ်းစံ က “ ကျနော်တို့မှာလည်း နယ်မြေကန့်သတ်မှုမရှိ။ NCA ထိုးတဲ့နေရာမှာလည်း နယ်မြေ ကန့်သတ်မှု နယ်မြေပိုင်းခြားရေး လည်း မရှိသေးဘူး။ သဘောတူညီမှုစာ ချုပ်မှာလည်း မပါသေးဘူး။ ဆွေးနွေးဖို့ပဲရှိသေးတယ်” ဟု သျှမ်းသံတော်ဆင့်ကို ပြောသည်။
RCSS/SSA အနေဖြင့်လည်း NCA လက်မှတ်မရေးထိုးခင်ကတည်း က သျှမ်းပြည် တဝှမ်း တွင် လှုပ်ရှားသည့်နယ်မြေများရှိကြောင်း၊ ထိုနယ်မြေ အတွင်း တွင် မူယစ်ဆေးဝါး တိုက်ဖျက်ရေး လုပ်ငန်းများကို ဆက်လက်လုပ်ဆာင်သွားမည် ဟု ဗိုလ်မှူး ခမ်းစံ က ပြောသည်။
မူးယစ်ဆေးဝါးသည် သျှမ်းပြည် တပြည်လုံး နှင့် ဆိုင်သည့် ကိစ္စ၊ သျှမ်းပြည် တရပ်လုံး နစ်နာသည့် ကိစ္စဖြစ်သည့်အတွက် RCSS/SSA အနေဖြင့် ဆက်လက် လုပ်ဆောင်သွားမည် ဟု ဗိုလ်မှူး ခမ်းစံ ကဆိုသည်။
ဆက်လက်ပြီး SSPP/SSA မှ ဗိုလ်မှူး စိုင်းသန်းအောင် က “ မူးယစ်ဆေးဝါးက တနိုင်ငံလုံး အန္တရာယ်ဖြစ်နေတယ်။ ဟိုနေရာ မလုပ်ရဘူး။ ဒီနေရာ မလုပ်ရဘူး။ ဆိုတာ အဟန့်အတားတွေ ပါ” ဟု ထပ်လောင်း ပြောသည်။
ထို့ပြင်တပ်မတော် ကာကွယ်ရေး ဦးစီချုပ် က “ တပ်မတော် အတွင်းရှိ တပ်တိုင်း ရဲဘော်တိုင်း တိုက်ပွဲဝင် ဖို့အသင့်ဖြစ်စေရေးအတွက် လေ့ကျင့်ရေးကို ထိရောက်စွာ ဆောင်ရွက်ကြ ရန်လိုကြောင်း” ပြောဆိုထားသည်။
စစ်မြေပြင် အတွင်း တိုက်ပွဲဝင်ချိန်၌ ကြံ့ခိုင်မှု မပြည့်ဝပါက တာဝန်ကို ကျေပွန်စွာ ထမ်းဆောင် နိုင်မည် မဟုတ်၍ တဦးချင်းလေ့ကျင့်မှု၊ အစုအဖွဲ့လိုက် မှန်မှန်ကန်ကန် လေ့ကျင့်မှုများကို လေ့ကျင့်ကြရမည်ဖြစ်ကြောင်း၊ အဟာရ ပြည့်ဝစွာ နေထိုင်စားသောက်နိုင်ရေး အတွက်လည်း ဖြည့်ဆည်းပေးရမည်ဖြစ်ကြောင်း တပ်မတော် ကာကွယ်ရေး ဦးစီးချုပ် က အရှေ့ပိုင်းတိုင်း စစ်ဌာနချုပ် မှ တပ်သားများကို မှားကြားခဲ့ကြောင်း သိရသည်။
ယခုရက်တပတ်အတွင်း ကာကွယ်ရေး ဦးစီးချုပ် မင်းအောင်လှိုင်သည် သျှမ်းပြည် အရှေ့ပိုင်း ရွှေတြိဂံ ဒေသ နှင့် သျှမ်းတောင် ကို သွားရောက်ကာ (NDAA ) မိုင်းလား အဖွဲ့ နှင့် UWSA “ဝ” တပ်ဖွဲ တို့ကို တွေ့ဆုံပြီး ကိုဗစ်-၁၉ ရောဂါ ကာကွယ်ထိန်းချုပ်ရေးဆိုင်ရာ အထောက်အကူပြုပစ္စည်းများကို ထောက်ပံ့ပေးအပ်ခဲ့သည်။
ထိုနည်းတူ တပ်မတော် ကာကွယ်ရေး ဦးစီးချုပ်သည် သျှမ်းတောင် နမ့်စန်မြို့နယ် ရှိ ပြည်သူ့စစ်(ဌာနေ) အဖွဲ့ကို တွေ့ဆုံပြီး မူးယစ်ဆေးဝါး တားဆီးနှိမ်နင်းရေး လုပ်ငန်းများ ကို ထိရောက်စွာ ဆောင်ရွက်နိုင်သည့်အတွက် ဂုဏ်ပြုချီးမြှင့်ငွေများနှင့် ကိုဗစ်-၁၉ ကာကွယ်ထိန်းချုပ်ကုသရေး ကို ပေးအပ်ခဲ့ကြောင်း သိရသည်။
