မြန်မာ-ထိုင်း နယ်စပ် ချစ်ကြည်ရေး တံတား အမှတ် (၂) တွင် ပြည်တော်ပြန် ၇၅ဦး ယနေ့ စတင် လက်ခံခဲ့ကြောင်း စုံစမ်းသိရှိရသည်။
ထို ပြည်တော်ပြန် ၇၅ ဦးသည် ထိုင်းနိုင်ငံတွင် ပြစ်ဒဏ်ကျပြီး ပြန်လွှတ်လာသည့် သူ ၂၈ဦး နှင့် ထိုင်းနိုင်ငံတွင် လုပ်လုပ်သည့် ရွှေ့ပြောင်းအလုပ်သမား ၄၇ ဦးတို့ ဖြစ်ကြောင်း မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေး နှင့် စေ့စပ်ညှိနှိုင်းရေး ကော်မတီ ဦးစိုင်းနွံတွံ့ ကသျှမ်းသံတော်ဆင့် ကိုပြောသည်။
“ ဒီနေ့ မနက် (၉ နာရီ မှ ၁၁နာရီ)ထိ တာချီလိတ်မြို့ရှိ ချစ်ကြည်ရေး တံတား(၂) မှာ ထိုင်းနိုင်ငံမှာ ပြစ်ဒဏ်ကျခံရတဲ့ သူတွေ နဲ့ နေရပ် ပြန်ချင်တဲ့သူတွေ လက်ခံတယ်” ဟု ဦးစိုင်းနွံတွံ့ က ပြောသည်။
ထိုသူအားလုံးကို တာချီလိတ် မိုးကုတ်ရိပ်သာ တွင် Quarantine ၄ ရက်ထားပြီး၊ ဓာတ်ခွဲခန်းစစ်ဆေးသွားမည် ဖြစ်ကြောင်း ဦးစိုင်းနွံတွံ့က ထပ်လောင်းပြောသည်။
“ ကျနော်တို့သူတို့ ကို ဓာတ်ခွဲခန်းစစ်မယ်။ ပိုးမရှိရင် သူတို့ နေရပ် ကို ပြန်လို့ရပြီ” ဟု ဦးစိုင်းနွံတွံက ဆိုသည်။
လက်ရှိမှာ ထိုင်းနိုင်ငံတွင် အလုပ်လုပ်သည့် ရွှေ့ပြောင်း အလုပ်သမားများလည်း မြန်မာ – ထိုင်းနယ်စပ် ဖြစ်သည့် မဲဆောက် – မြဝတီ မှ တရက်လျှင် ၁ ထောင်ကျော် ဝင်လာကြောင်း စုံစမ်း သိရသည်။
