မြန်မာ – ထိုင်း နှစ်နိုင်ငံ ချစ်ကြည်ရေးတံတား အမှတ် (၁) ပြန်လည်ဖွင့်လှစ်နိုင်ရေးအတွက် နှစ်နိုင်ငံ အစိုးရ တရားဝင် ဆွေးနွေးညှိနှိုင်းပြီးမှ ဖွင့်လှစ်နိုင်မည်ဖြစ်ကြောင်း စုံစမ်းသိရှိရသည်။
အမှတ် (၁) ချစ်ကြည်ရေးတံတား ပြန်လည် ဖွင့်လှစ်ရေး နှင့် ပတ်သက်ပြီး နှစ်နိုင်ငံ အစိုးရအချင်းချင်း တရားဝင် ဆွေးနွေးလာခြင်းမျိုးမရှိသေးကြောင်း၊ နှစ်နိုင်ငံ နယ်စပ်ကိစ္စများ ဆောင်ရွက်ခြင်းဖြစ်သည့်အတွက် ကိုဗစ် ကာကွယ် ထိန်းချုပ်ရေး စည်းကမ်းသတ်မှတ်ချက်များအား ညှိနှိုင်းဆောင်ရွက်ရန် လိုအပ်ကြောင်း သိရသည်။
“နှစ်ဘက်သဘောတူ ဆုံးဖြတ်ချက်ကိုစောင့်ရမှာပါ။ နှစ်ဘက်သဘောတူမှဖွင့်လို့ရမှာပါ။ နှစ်နိုင်ငံ တရားဝင်သတင်းဌာနတွေက ကြေညာမှအတည်ပါခင်ဗျ။ လိုင်းပေါ်မှာက ခန့်မှန်းတွေပါ မှန်ရင်လည်းမှန်သွားနိုင်တာပေါ့။ အခုထိတော့ နှစ်နိုင်ငံ မဆွေးနွေးရသေးပါဘူး။ ထိုင်းဘက်ကကမ်းလှမ်းချက်ကို နှစ်ဘက်အသီးသီး အထက်ကိုတင်ပြထားဆဲပါ” ဟု မြန်မာ-ထိုင်းနယ်စပ်အရေးဆောင်ရွက်သူ တစ်ဦးက သျှမ်းသံတော်ဆင့်ကို ပြောသည်။
ကိုဗစ် ကာလအတွင်း ရောက်ရှိနေသည့် ထိုင်းနိုင်ငံသားများ နှင့် တဖက်ထိုင်းနိုင်ငံရောက်ရှိနေသော မြန်မာနိုင်ငံသားများ ပြန်လည်နေရပ်ပြန်နိုင်ရေးအတွက် လူလွှဲဆောင်ရွက်ခြင်းလုပ်ငန်းများ ညှိနှိုင်းရန် လိုအပ်နေကြောင်း စသည့် ကိစ္စများအား နှစ်ဖက် ညှိနှိုင်း ဆွေးနွေးပြီးမှသာ တံတားဖွင့်မည့်အချိန်အား သတ်မှတ်ပေးနိုင်မည်ဖြစ်ကြောင်း တာချီလိတ် အခြေချ (စစ်ဗျုဟာမှူး) ဗိုလ်မှူးကြီး မင်းမင်းထွန်း က ထိုင်းဘက်ခြမ်းသို့ အကြောင်းပြန်ထားကြောင်း သိရသည်။
ယနေ့ ဧပြီ (၂၅) ရက်မှာတော့ ထိုင်းနိုင်ငံဘက်ခြမ်း မယ်ဆိုင်မြို့ရှိ နယ်စပ်ဂိတ် ပြန်လည်မွမ်းမံအပြီးမှာ သန့်ရှင်းရေးများ ပြုလုပ်နေသည်။
ထိုင်းဘက်ခြမ်းမှ နယ်စပ်ဂိတ်များကို သန့်ရှင်းရေး ပြုလုပ်ခြင်း နှင့် ပတ်သက်ပြီး နယ်စပ်နေထိုင်သူ တစ်ဦးက “ဖွင့်ဖြစ်ဖို့တော့ နီးလာပါပြီ” ဟု သျှမ်းသံတော်ဆင့် ကိုပြောသည်။
မြန်မာ – ထိုင်းနယ်စပ်ဂိတ်ဖြစ်သည့် တာချီလိတ် ချစ်ကြည်ရေး တံတား အမှတ်(၁) ကို ၂၀၂၀ ခုနှစ် မတ် (၂၃) ရက်နေ့က ကိုဗစ်-၁၉ ကာကွယ်ထိန်းချုပ်ရေးတွက် စတင်ပိတ်ထားလိုက်သည်မှာ (၂) နှစ်ကျော်သွားပြီဖြစ်သည်။7m
Leave a Comments