မြန်မာ – တရုတ်နယ်စပ် အဓိက ကုန်သွယ်ရေးလမ်းဖြစ်သည့် လားရှိုး – မူဆယ် ပြည်ထောင်စုလမ်းမကြီးပေါ်ရှိ SSPP/SSA နှင့် KIA တပ်တို့၏ စစ်ဆေးရေးဂိတ်များ တရုတ်ဖိအားကြောင့် ဖြုတ်သိမ်းဆုတ်ခွာရကြောင်း စုံစမ်းသိရသည်။

ပြီးခဲ့သည့် မတ်လ တတိယပတ်တွင် လားရှိုး – မူဆယ် ပြည်ထောင်စုလမ်းမကြီးပေါ်ရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် ကချင်လွတ်လပ်ရေးတပ် KIA တို့၏ စစ်ဆေးရေးဂိတ်များကို တရုတ်ဖိအားနှင့်အတူ ကိုးကန့်တပ်ဖွဲ့ MNDAA က ဖယ်ရှားခိုင်းခဲ့ကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ‌ပြောသည်။

“၁၀၅ မိုင်နဲ့ နမ့်ဖတ်ကာကြားက လမ်းမကြီးပေါ်မှာ ရှိတဲ့ SSPP တပ်ရဲ့ ဂိတ်တွေ ဖယ်‌ပေးရတာ သေချာပါတယ်။ လမ်းမကြီးပေါ်မှာ ဂိတ်တွေ မရှိရဘူး ဆိုတဲ့သဘောမျိုးပါ၊ KIA တပ်လည်း ဖယ်ပေးလိုက်ရပါတယ်။ စစ်ဆေးရေးဂိတ်တွေကို တရုတ်ဖိအားနဲ့ ကိုးကန့်က ဖယ်ခိုင်းတာ”ဟု အဆိုပါ စစ်ရေးသတင်းရင်းမြစ်က ပြောသည်။

မြောက်ပိုင်းမဟာမိတ်တပ်ဖွဲ့များ၏ စစ်ဆေးရေးဂိတ်များကို ဖြုတ်သိမ်း ဆုတ်ခွာခိုင်းသည့်အပေါ် ကိုးကန့်တပ်ဖွဲ့ MNDAA ၏ နောက်ကွယ်တွင် တရုတ်အစိုးရ ဖိအားပေးမှုများ ရှိနိုင်ပြီး မြန်မာနှင့် တရုတ် အဓိက ကုန်သွယ်ရေးလမ်းဖြစ်သည့် မူဆယ်-လားရှိုး-မန္တလေး ပြည်ထောင်စုလမ်းမကြီးကို ပြန်ဖွင့်ရန် အစီအစဉ် ရှိနိုင်ကြောင်း စစ်ရေးသတင်းရင်းမြစ်က သုံးသပ်ပြောဆိုသည်။

“ကျနော်တို့ အမြင်က တရုတ်ရဲ့ ကုန်သွယ်ရေးလမ်းကြောင်းပါ။ သူတို့ ဒီလမ်းပွင့်သွားရင် ကိုးကန့်တွေကို လက်ကိုင်တုတ်အနေနဲ့ ထားချင်တာလည်း ဖြစ်နိုင်တယ်။ သူတို့ ဒီသတ္တုတူးဖော်တဲ့ ကိစ္စတွေကိုပါ ထပ်ချဲ့လာနိုင်ဖို့ ရှိပါတယ်။ လမ်းမကြီး သေချာဖွင့်သွားရင် ကြံ၊ ပြောင်း၊ သတ္တု စတာတွေကိုလည်း ကြိုက်သလို သယ်လို့ရတာပေါ့”ဟု စစ်ရေးသတင်းရင်းမြစ်က သုံးသပ်သည်။

မူဆယ်မြို့နယ် ၁၀၅ မိုင်ဒေသ နမ့်အွမ်ကျေးရွာ အဝင်အထွက်ရှိ SSPP/SSA နှင့် KIA တပ်တို့၏ စစ်ဆေးရေးဂိတ်နှင့် အကာအရံများကို ဖယ်ရှားခိုင်းထားပြီး ပြည်ထောင်စုလမ်းမကြီး၏ ၅ မိုင်အကွာ ပတ်လည်တွင် ဆုတ်ခွာခိုင်းထားကြောင်း ဆိုသည်။

ပြီးခဲ့သည့် မတ်လ ၁၃ ရက်မှစပြီး MNDAA နှင့် TNLA တပ်ဖွဲ့ကြား စစ်ရေးပဋိပက္ခများ ဖြစ်ပွားခဲ့ပြီးနောက် ကွတ်ခိုင်၊ နမ္မတူ၊ နမ့်ဖက်ကာနှင့် မူဆယ် ၁၀၅ မိုင်ရှိ ကုန်သွယ်ရေးဇုန် အပါအဝင် TNLA တပ်စခန်းများကို MNDAA က တိုက်ခိုက် ဖယ်ရှားပြီး ထိန်းချုပ်ထားကြောင်း သိရသည်။

လက်ရှိတွင် မြန်မာ – တရုတ် အဓိက ကုန်သွယ်ရေးလမ်းကြောင်းဖြစ်နေသည့် သျှမ်းပြည်မြောက်ပိုင်း မူဆယ် – လားရှိုး ပြည်ထောင်စုလမ်းမကြီးတကြောကို MNDAA က ထိန်းချုပ်ထားသည်။

“ကိုးကန့်က တရုတ်စကားပြောတယ်၊ ဘာသာစကားတူ နောက်ပြီး လူမျိုးတူ စာတူ နောက်ပြီး စနစ်ကလည်း တူတယ်။ တရုတ်က မီးစိမ်း မပြရင် ကိုးကန့်က အခုလို လုပ်ရဲမလား၊ တရုတ်က မြန်မာပြည်ထဲက စီမံကိန်းတွေကို ရအောင်လုပ်ဖို့ မြန်မြန်ပြီးဖို့အတွက် နည်းမျိုးစုံ သုံးမှာပဲ” ဟု သျှမ်းပြည် စစ်ရေး၊ နိုင်ငံရေး လေ့လာသုံးသပ်သူတစ်ဦးက ပြောဆိုသည်။

လားရှိုး – မူဆယ် ပြည်ထောင်စုလမ်းမကြီးတကြောတွင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ ကချင်လွတ်လပ်ရေးတပ် (KIA) ၊ ကိုးကန့်တပ်ဖွဲ့ (MNDAA) နှင့် တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) တို့ သွားလာလှုပ်ရှားမှု ရှိနေကြောင်း သိရသည်။

ပြီးခဲ့သည့် မတ်လ ဒုတိယပတ်တွင်လည်း သျှမ်းပြည်တောင်ပိုင်းနှင့် မြောက်ပိုင်းကို ဆက်သွယ်ထားသည့် ရပ်စောက် – နောင်ချို လမ်းမကြီးပေါ်ရှိ SSPP/SSA တပ်၏ စစ်ဆေးရေးဂိတ်အချို့ကို ဖယ်ရှားပေးရန် စစ်ကော်မရှင်တပ်က ဖိအားပေးခဲ့ကြောင်း သိရသည်။