သျှမ်းပြည်အရှေ့ပိုင်း တာချီလိတ်မြို့ရှိ အွန်လိုင်း လောင်းကစားရုံတစ်ခု ဝင်ရောက်စီးနင်းခံရပြီး နိုင်ငံခြားသား ၅၀ ဦးခန့် နှင့် ဆက်စပ်ပစ္စည်းများကို ဖမ်းဆီးရမိကြောင်း သိရသည်။
ယမန်နေ့ (ဧပြီလ ၂ ရက်) နေ့လယ်ပိုင်းတွင် တာချီလိတ်မြို့ ဆန်ဆိုင်း (ခ) ရပ်ကွက်ရှိ (Regina)ဟိုတယ်ကို စစ်ကော်မရှင်တပ်နှင့် ၎င်းလက်အောက်ခံ တာဝန်ရှိသူများက ဝင်ရောက်စီးနင်းခဲ့ရာ အွန်လိုင်းငွေလိမ် ကျားဖြန့်လုပ်ကိုင်နေသည့် နိုင်ငံခြားသား ၅၀ ဦးဝန်းကျင်ကို ဆက်စပ်ပစ္စည်းများနှင့် ဖမ်းဆီးရမိခဲ့ကြောင်း တာချီလိတ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“အဲ့ဟိုတယ်က အရင်တုန်းကတော့ နာမည်ကြီးတယ်။ ဖမ်းမိတာ ၅၀ ဦးစလုံးက ထိုင်းနိုင်ငံသားတွေတဲ့၊ မိန်းကလေးလည်း ပါတယ်။ အရင်ကတည်းက ကာစီနိုရှိပြီသား၊ သူတို့တောင်းတဲ့ ပမာဏအတိုင်း မပေးနိုင်လို့ ဝင်ဖမ်းတယ်လို့ပဲ မြင်တယ်။ ဝင်ဖမ်းတော့ ထိုင်းဘတ်တွေ သိန်းနဲ့ချီပါ ရသွားတာ”ဟု တာချီလိတ်မြို့ ဒေသခံအမျိုးသား တစ်ဦးက ပြောသည်။
ထိုဝင်ရောက်ဖမ်းဆီးမှုတွင် ကွန်ပျူတာများနှင့် ဆက်စပ်ပစ္စည်းများအပြင် ထိုင်းဘတ်ငွေ သိန်း ၆၀ ထပ်မနည်း ဖမ်းဆီးရမိခဲ့ကြောင်း သိရသည်။
သျှမ်းပြည်အတွင်း လှုပ်ရှားနေသည့် ကျားဖြန့် အွန်လိုင်းလုပ်ငန်းရှိသည့် နေရာများ၊ လောင်းကစား ကာစီနိုရှိသည့် နေရာများကို စစ်ကော်မရှင်တပ်နှင့် ၎င်းလက်အောက်ခံ ဌာနဆိုင်ရာ ပူးပေါင်းအဖွဲ့များက မကြာခဏ ဝင်ရောက်စီးနင်း ဖမ်းဆီးမှုများ ပြုလုပ်နေသော်လည်း လက်ရှိအချိန်ထိ ပပျောက်သွားခြင်း မရှိသေးကြောင်း သိရသည်။
ပြီးခဲ့သည့် မတ်လ ၃ ရက်တွင်လည်း တာချီလိတ်မြို့ မယ်ခေါင်ရပ်ကွက် (၂)၊ မယ်ခေါင်(၂)လမ်းတွင် ဖွင့်လှစ်ထားသည့် “ အပြည်ပြည်ဆိုင်ရာ ဟိုတယ်”တွင် နေထိုင်ပြီး ကျားဖြန့် အွန်လိုင်းငွေလိမ်လုပ်ငန်း လုပ်ကိုင်သော နိုင်ငံခြားသား (၃၉၃) ဦးကို စစ်ကော်မရှင်ဘက်က ဝင်ရောက်စီးနင်း ဖမ်းဆီးခဲ့ကြောင်း သတင်းထုတ်ပြန်ခဲ့သည်။
Leave a Comments