သျှမ်းပြည် တောင်ပိုင်း ကျေးသီးမြို့နယ် နမ့်မော်ဆိုင်းကျေးရွာတွင် မိုးသည်းထန်းရွာပြီး မိုးသီးကျသဖြင့် အိမ်ပျက်စီးကာ ဒေသခံများ စားဝတ်နေရေး ခက်ခဲနေကြောင်း စုံစမ်းသိရသည်။
ယမန်နေ့ (ဧပြီ ၂၇)ရက် နေ့လည် ၃နာရီ ကျော်က ကျေးသီးမြို့နယ် နမ့်မော်ဆိုင်းကျေးရွာတွင် မိုးရွာပြီး မိုးသီးများကျသဖြင့် အိမ် ၇လုံးပျက်စီးရာ ဒေသခံ ၆၀ ကျော် နေစရာ စားစရာခက်ခဲနေကြောင်း နမ့်မော်ဆိုင်းကျေးရွာမှ ကျောင်းဆရာ မိုင်းအောင်ဆန်း ကသျှမ်းသံတော်ဆင့်ကို ပြောသည်။
“ အိမ်ခြေကတော့ ၇ အိမ်ပါ။ ခေါင်မိုးတွေပျက်၊ အိမ်တွေပျက်စီးတယ်။ အိမ်ထဲမှာရှိတဲ့ ပစ္စည်းတွေလည်း ရေတွေစိုကုန်တယ်။ ဆန်တွေကစ ရေတွေစိုကုန်တယ်။ အခုသူတို့နေဖို့စားဖို့ ခက်ခဲနေတယ်” ဟု မိုင်းအောင်ဆန်း ကဆိုသည်။
ထို ပျက်စီးသွားသည့် အိမ်ခြေ ၇ အိမ်တွင် လူ ၆၅ ဦးထက်မနည်း စုပေါင်းနေထိုင်ကြကြောင်း၊ ထိုထဲတွင်ကလေးငယ်များပိုများကြောင်း၊ ထို လူ၆၅ဦးသည် မိုးသီးကြောင့် မပျက်စီးသည့် ဘုန်းကြီးကျောင်း နှင့် အသိမိတ်ဆွေအိမ်များတွင် ကပ်နေရကြောင်း သိရသည်။
“ တချို့ကတော့ ဘုန်းကြီးကျောင်း၊ တချို့က ဘေးအိမ်တွေမှာ ကပ်နေရတယ်။ သူတို့အတွက် စားဖို့ နဲ့ အိမ်ပြန်ပြင်ဖို့ ခက်ခဲနေတယ်” ဟု မိုင်းအောင်ဆန်း ကဆိုသည်။
ကျေးသီးမြို့နယ် နမ့်မော်ဆိုင်း ကျေးရွာတွင် ဒုတိယအကြိမ် မိုးသီးကျခြင်းဖြစ်ကြောင်း၊ လယ်ယာ အနည်းငယ်ထိခိုက်မှုရှိပြီး တိရိစ္ဆာန် တချို့လည်း သေကြကြောင်း သိရသည်။
Leave a Comments