သျှမ်းပြည်မြောက်ပိုင်းလားရှိုးမြို့နယ် မိုင်းကျက်အုပ်စုဘက်လှုပ်ရှားသည့်အစိုးရတပ်မတော်သည် ဒေသခံရွာသားများထံမှ ၀ါး၊ သစ်များဆင့်ဆိုခြင်း ကား၊ထော်လာဂျီများအား ချောဆွဲခြင်းများပြုလုပ်နေကြောင်း ဒေသခံများပြောပြချက်အရသိရပါသည်။
လားရှိုးမြို့အရှေ့ဘက်ရှိ မိုင်းကျက် အုပ်စု တွင်အခြေချသည့် အစိုးရတပ်မတော် တပ်မ ၉၉ လက်အောက်ခံ ခမရ ၃၆၅ သည် မိုင်းကျက်ဒေသခံများထံမှ ကား၊ ထော်လာဂျီများ တရက်လျင် ၄ စီးဆင့်ဆိုချောဆွဲနေ ကြောင်း၊ မိုင်းယော်နှင့် မိုင်းကျက်ကြား ၀မ့်ခန် ၊ ပန်လျှော် ရွာဘက်ရှိ ၄င်းတို့တပ်စခန်းသို့ ပစ္စည်းများ တင်ပို့ပေးခိုင်းကြောင်း မိုင်းကျက်ဒေသခံ ဆန်စိုင်းဆာမ် ကပြောသည်။
“သူတို့ သုံးဖို့ ကား ၊ထော်လာဂျီတွေကို ၀မ့်လုံမိုင်းကျက် ကို နေ့တိုင်း စတန်းပိုင်သွားနေပေးရတယ်။ ကားသမားတယောက်ကို ပန်လျှော်က သူတို့စခန်းဆီပစ္စည်းပို့ခိုင်းတာ ၂၁ ရက်ကတည်းက သွားတယ် ၂၃ ရက်နေ့မှပြန်လွှတ်ပေးတယ် ” – ဟု ဆန်စိုင်းဆာမ် က သျှမ်းသံတော်ဆင့်အားပြောသည်။
ပန်လျှော်ရှိ အဆိုပါတပ်စခန်းသည် ယခင်က ကောင်းခါး ကေတီအေ ပြည်သူ့စစ်စခန်းချ နေထိုင်ကြောင်း၊ အစိုးရတပ်မတော်မှ ၄င်းတို့ဌာနချုပ်ဖြစ်သော ကွတ်ခိုင်မြို့ရှိ ကောင်းခါးရွာအား ၀င်ရောက်စစ်ဆေးကာ မူးယစ်ချက်ရုံများအားသိမ်း ဆည်းလိုက်ပြီးနောက် ဖေဖော်ဝါရီလနှောင်းပိုင်းကစပြီး ပန်လျှော်စခန်းအားလည်း အစိုးရတပ်က ၀င်ရောက်တပ်စခန်းချနေထိုင်ခဲ့ကြောင်း၊ ထို့ကြောင့် စခန်းပြုပြင်ဆောက်ရန်အ တွက်လိုအပ်သော သစ်၊ ၀ါးများ ပစ္စည်းများကို ဒေသခံများထံမှ ဆင့်ဆိုယူဆောင်နေကြောင်း မိုင်းယော်ဒေသခံ ပြည်သူ့စစ်အဖွဲ့ဝင်တဦးကပြောသည်။
ထိုသို့ လူထုမှ အဓမ္မလုပ်အား ပေးနေရမှုနှင့်ပတ်သက်ပြီး သျှမ်းလူ့အခွင့်အရေးမဏ္ဍိုင် SHRF မှ စိုင်းဟော်ရှဲန်က – “လူထုအနေနဲ့တော့ ဒီလိုခံနေရတာ နှစ်ရှည်လများဖြစ်နေပြီ။ အစိုးရရဲ့တပ်မတော်ဘက်က ဖြူစင်တဲ့စေတနာသဘောထား ရှိရင် စားပွဲဝိုင်းမှာနိုင်ငံရေးဆွေးနွေးအဖြေရှာနိုင်မှ ဒီအခုလို လူထု အဓမ္မအခွင့်အရေးကျူးလွန်ခံနေရတာတွေကိုဖြေရှင်းနိုင်မယ်။ နိုင်ငံတကာဥပဒေနဲ့ဆိုရင်အခုလိုမျိုး တပ်မတော်က လူထုကိုလုပ်အားခိုင်းစေနေတာတွေဟာ စစ်ဥပဒေကို ဖောက်ဖျက်ကျူးလွန်တာဘဲ ”- ဟု သျှမ်းသံတော်ဆင့်အားပြောသည်။
ယခုလ ၈ ရက်နေ့ကလည်း အဆိုပါတပ်စခန်းသို့ တချောင်းလျင် ၅ ပေထက်မလျော့စေသော ၀ါးပိုး အချောင်း ၁၀၀ ၊ ပြီးခဲ့သည့် ၂၁ ရက်နေ့က အချောင်း ၁၀၀ ရွာသားများရှာပို့ရပြီးဖြစ်ကြောင်း ၊ထိုမျှမက တရွာလျှင် သစ် ၁၀ ချောင်း၊ သက်ကယ်၊ နှီးအစရှိသည်များ ဆင့်ဆိုသဖြင့် ပို့ဆောင်ပေးရပြီဖြစ်ကြောင်း မိုင်းကျက်ရွာသားများကပြောသည်။
