မြန်မာ-ထိုင်း ချစ်ကြည်ရေး အမှတ်(၂) တံတား ပိတ်ထားသော်လည်း ပြည်တော်ပြန် မြန်မာ ၂၀၀ နီးပါး ယနေ့ တာချီလိတ်မြို့သို့ထပ်မံ ဝင်ရောက်လာကြောင်း သတင်းရရှိသည်။
မြန်မာ-ထိုင်း ချစ်ကြည်ရေး တံတား သည် COVID-19 ဖြစ်ပွားပြီးနောက် မတ် ၂၅ ရက် မှစတင် ပိတ်လိုက်သော်လည်း ပြည်တော်ပြန် ရွှေ့ပြောင်းအလုပ်သမားများ ဆက်တိုက်ရှိနေဆဲဖြစ်ပြီး ၄င်းတို့အား ၁၄ ရက် စောင့်ကြည့်သွားမည်ဟုသိရသည်။
ဧပြီလ ၆ ရက် ယနေ့မနက်ကလည်း ထိုင်းနိုင်ငံမှ မြန်မာနိုင်ငံသား ရွှေ့ပြောင်းအလုပ်သမား ၁၈၈ ဦး မယ်ဆိုင်သို့ ထပ်မံရောက်ရှိလာပြီး နှစ်ဘက်အာဏာပိုင်းများ ညှိနှိုင်းကာ မြန်မာ-ထိုင်း ချစ်ကြည်ရေး အမှတ်(၂) တံတားမှ ပို့ဆောင်ပေးခဲ့ကြောင်း၊ ထို ပြည်တော်ပြန်များကို တာချီလိတ်တွင် ၁၄ရက်ကြာ သီးခြားစောင့်ကြည့်သွားမည် ဖြစ်ကြောင်း တာချီလိတ် ခရိုင် အုပ်ချုပ်ရေးမှူး ဦးမြင့်နိုင် က ပြောသည်။
“၁၈၈ ယောက် တံတား ၂ ကနေ ပြန်ဝင်လာပြီးတော့ လက်ခံပေးပါတယ်။ ၁၄ ရက်စောင့်ကြည့်ထားပါမယ်၊ မိုးကုတ်ရိပ်သာ မှာထားပါ့မယ်” ဟု တာချီလိတ်ခရိုင် အုပ်ချုပ်ရေးမှူး ဦးမြင့်နိုင် ကပြောသည်။
အဆိုပါ ပြည်တော်ပြန် ၁၈၈ ဦးကို နိုင်ငံတော်က ညွှန်ကြားထားသည့်အတိုင်း ကျန်းမာရေးစောင့်ရှောက်မှုများ လိုက်နာကာ စားနပ်ရိက္ခာ အပြည့်အစုံ နှင့် ရေ မီး ပြည့်စုံအောင် ထားပေးမည်ဖြစ်ကြောင်း သိရသည်။
လွန်ခဲ့သည် မတ် ၂၅ ရက်က ထိုင်းနိုင်ငံဘန်ကောက်မြို့ မှ မြန်မာနိုင်ငံတာချီလိတ်မြို့သို့ ပြန်လာသည့် အသက် ၂၄နှစ် အရွယ် (ကျောက်မဲမြို့သား) အမျိုးသားတဦးသည် COVID-19 အတည်ပြု လူနာ အဖြစ် တွေ့ရှိခဲ့သည်။
ထို့နောက် ပြည်ပ မှ ပြန်လာသည့် ပြန်တော်ပြန်များကို သက်ဆိုင်ရာ အာဏာပိုင်များမှ နေရပ်ကို ချက်ချင်းမပြန်စေတော့ဘဲ နယ်စပ်ဒေသတွင် ၁၄ရက်စောင့်ကြည့်သည့် အစီစဉ် ပြုလုပ်လာကြသည်။
မတ်လ ၂၃ ရက်နေ့မှ ဧပြီ ၅ ရက်နေ့ထိ မြန်မာနိုင်ငံတွင် COVID-19 ရောဂါ ဓာတ်ခွဲအတည်ပြုလူနာ (၂၁) ဦး တွေ့ရှိပြီဖြစ်ပြီး ၁ ဦး သေဆုံးကာ ၁၉ ဦးမှာ ကျန်းမာရေး အခြေနေ တည်ငြိမ်လျှက်ရှိပြီး ကျန်ရှိသည့် လူနာ တစ်ဦးမှာ အထူးကြပ်မတ်ခန်းမှာ ထားရှိကြောင်း ပြည်ထောင်စု ကျန်းမာရေး နှင့် အားကစားဝန်ကြီးဌာန မှ သတင်းထုတ်ပြန်ထားသည်။
Leave a Comments