သျှမ်းပြည်အရှေ့ပိုင်း မိုင်းတုံမြို့နယ်အတွင်း မြန်မာ့တပ်မတော်နှင့် သျှမ်းပြည်တပ်မတော် RCSS/SSA တို့ အပြန်အလှန် ပစ်ခတ်မှု ဖြစ်ပွားပြီးနောက်ပိုင်း ယနေ့ အထိ စစ်ရေးတင်းမာမှု ဖြစ်ပွားနေပြီး ဖြစ်ပွားနေ သော စစ်ရေးပဋိပက္ခ ကြောင့် ကျေးလက်ဒေသခံလည်း ဖမ်းဆီးခံရသည်ဟုသိရသည်။
သျှမ်းပြည်အရှေ့ပိုင်း မိုင်းဆတ် အခြေစိုက် စစ်ဆင်ရေးကွပ်ကဲမှုစစ်ဌာနချုပ် စကခ အမှတ် ၁၄ လက် အောက်ခံ တပ်ရင်းသုံးရင်း ပူးပေါင်းက မိုင်းတုံမြို့နယ် အတွင်းရှိ သျှမ်းပြည်တပ်မတော် RCSS/SSA တပ်စခန်းအား မတ်လ ၂၅ ရက်နေ့ နံနက်ပိုင်းက ထိုးစစ်ဆင်တိုက်ခိုက်သည့်နောက်ပိုင်း မိုင်းအစ် ကျေးရွာ ဉက္ကဌနှင့် ၎င်း၏သား ဖြစ်သူအား အစိုးရတပ်မတော်မှ ဖမ်းဆီးခေါ်ဆောင်သွားခြင်းဖြစ်သည်။
သျှမ်းပြည်တပ်မတော် ပြောခွင့်ရပုဂ္ဂိုလ် ဒုတိယ ဗိုလ်မှူးကြီး အုမ်ခေးက – ” မိုင်းတုံဘက်မှာ ကျနော်တို့ တပ်စခန်းကို လာရောက်တိုက်ခိုက်ပြီးနောက်မှာ တပ်မတော်က မိုင်းအစ်ကျေးရွာ ဥက္ကဋ္ဌ နဲ့ သူ့သားကို လမ်းပြအဖြစ် ဖမ်းသွားတယ်။ ရက်အနည်းငယ်ကြာတော့ သူ့သားကိုပြန်လွှတ်ပေးခဲ့ပေမယ့် အဖေဖြစ် သူကိုတော့ ခုချိန်ထိ ပြန်လွှတ်မလွှတ်ပေးသေးဘူး ။ တိုက်ပွဲရယ်လို့ ဖြစ်လာပြီဆိုတာနဲ့ ပြည်သူလူထုကို အရင်ဆုံးထိခိုက်တာ အမှန်ပါပဲ။ ဒါကြောင့် RCSS ပဲဖြစ်ဖြစ် တပ်မတော်ကပဲဖြစ်ဖြစ် ဘယ်တပ်ဖွဲ့မဆို ပြည်သူလူထုကို မတရား ဖမ်းဆီးနှိပ်စက်ခဲ့သည်ရှိလျှင် သက်သေအခိုင်အလုံနဲ့ ပြောရဲဆိုရဲရှိရမယ် “ – ဟုပြောသည်။
လက်ရှိအခြေအနေမှာ မိုင်းတုံမြို့နယ်အတွင်း အစိုးရတပ်မတော် နှင့် RCSS/SSA ကြား စစ်ရေးငြိမ် သက်နေသော်လည်း သျှမ်းပြည်တောင်ပိုင်း ကျေးသီးမြို့နယ်အတွင်း တပ်မတော်ဘက် စစ်ရေးလှုပ်ရှားမှု ရှိနေသည့်အတွက် တိုက်ပွဲ အချိန် မရွေးဖြစ်နိုင်သည့်အနေအထားရှိနေသည်။
ဒုတိယ ဗိုလ်မှူးကြီး အုမ်ခေး က ” လွယ်တောင်းတောင်ဘက်လဲ တပ်မတော်က စစ်ရေးလှုပ်ရှားမှု တွေရှိနေတယ်။ လွိုင်ဟွန်းတောင်ဘက်ဆိုလည်း မငြိမ်းချမ်းသေးတဲ့သဘော။ ဘယ်နေ့ဘယ်ချိန်မှာ တိုက်ပွဲထပ်ဖြစ်မလဲဆိုတာကိုလဲ ခန့်မှန်းလို့မရနိုင်သေးပါဘူး” – ဟု ပြောပါသည်။
ဖေဖော်ဝါရီ ၂၇ မှ မတ်ချ် လ ၃ ရက်အနေ့အထိ အစိုးရ တပ်မတော်မှ စစ်အင်အား အလုံးအရင်းဖြင့် သျှမ်းပြည်တောင်ပိုင်း လွိုင်လင်ခရိုင်မိုင်းကိုင်မြို့နယ် ဟမ်းငိုင်းရွာမ မြောက်ဘက် သျှမ်းပြည်ပြန်လည် ထူထောင်ရေး ကောင်စီ၊ သျှမ်းပြည် တပ်မတော် RCSS/SSA ၏ လွိုင်တောင်းတောင်တပ်စခန်းအား အပြင်းအထန်ထိုးစစ်ဆင်တိုက်ခိုက်သည့်အတွက် RCSS/SSA ဘက် တပ်စခန်းမှ ဆုတ်ခွာပေးလိုက်ရ သည်။
သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA သည် တနိုင်ငံလုံးဆိုင်ရာ အပစ်အခတ်ရပ်ဆဲရေးစာချုပ် NCA လက်မှတ်ရေးထိုးထားသည့် လက်နက်ကိုင်တပ် တခုဖြစ်သော ကြောင့် အစိုးရတပ်မတော်နှင့်တွေ့ဆုံဆွေးနွေးရန် ဆန္ဒရှိသော်လည်း ကမ္ဘာ့ကပ်ရောဂါ COVID 19 ကူးစက်ပျံ့နှံ့နေသောကြောင့် တွေ့ဆုံရန် မဖြစ်နိုင်သေးသည့် အနေအထားဖြစ်နေကြောင်း ဒုတိယ ဗိုလ်မှူးကြီး အုမ်ခေး ကပြောသည်။
(ယိင်းယိင်း ရေးသားပေးပို့သည်)
