သျှမ်းပြည် တောင်ပိုင်း ကျေးသီးမြို့နယ် Covid -19 သံသယ စောင့်ကြည့်ခံရသည့် အမျိုးသမီး တဦးသေဆုံးခဲ့ကြောင်း ယနေ့ ည ၈နာရီ မြန်မာနိုင်ငံ ကျန်းမာရေး နှင့် အားကစား ဝန်ကြီးဌာန ၏ ထုတ်ပြန်ချက်တွင် ဖော်ပြထားသည်။

Covid-19 စောင့်ကြည့်လူနာ အဖြစ် သတ်မှတ်ခံရသည့် အမျိုးသမီး ၏ ဆေးစစ်ချက် ဓာတ်ခွဲနမူနာကို အမျိုးသား ကျန်းမာရေး ဓာတ်ခွဲမှုဆိုင်ရာ ဌာန (ရန်ကုန်) သို့ ပေးပို့စစ်ဆေးရန် စီစဉ် လျက်ရှိပြီး ယနေ့ (မတ် ၂၀ ) တွင် သေဆုံးသွားကြောင်း ထုတ်ပြန်ချက်တွင် ရေးသားထားသည်။

ထို အမျိုးသမီးသည် လွန်ခဲ့သည့် ၂ပတ်တွင် ထိုင်းနိုင်ငံသို့ ခရီးသွားထားကြောင်း ဆေးမှတ်တမ်းအရ သိရသည်။

သေဆုံးသွားသည့် အမျိုးသမီးသည် မတ် ၅ရက်နေ့ က ချောင်းဆိုးခြင်း၊ မောပန်းခြင်းစသည့် ရောဂါလက္ခဏာ များခံစားနေရသဖြင့် မိုင်းနောင် တိုက်နယ် ပြည်သူ့ဆေးရုံသို့ မတ် ၁၉ ရက် တွင် သွားရောက်ပြသခဲ့ရာ သေဆုံးသွားခြင်းဖြစ်သည်။

သေဆုံးရသည့် အကြောင်းရင်းမှာ ပြင်းထန် အဆုတ်ရောင်ရောဂါ နှင့် နာတာရှည်ရောဂါ အခံ ဖြစ်သော ဆီးချို ရောဂါ ၏ နောက်ဆက်တွဲဆိုးကျိုး များကြောင့် သေဆုံးသွားခြင်း ဖြစ်သည်။

ထိုနည်းတူ မတ် ၁၈ ရက်နေ့တွင်လည်း သျှမ်းပြည် အရှေ့ပိုင်း ကျိုင်းတုံဆေးရုံတွင် Covid-19 သံသယဖြင့် ကုသနေသည့် အမျိုးသားတဦး သေဆုံးခဲ့သည်။

လက်ရှိ ယနေ့ အချိန်ထိ မြန်မာနိုင်ငံတွင် Covid -19 ကူးစက်ခံရသူ တဦးတယောက်မှ မရှိသေးသော်လည်း Covid-19 စောင့်ကြည့်ခံရပြီး သေဆုံးသူ ၈ဦး ရှိပြီဖြစ်ကြောင်း သိရသည်။

တရုတ်နိုင်ငံ ဝူဟန်ပြည်နယ်မှ စတင်ဖြစ်ပွားသည့် Covid-19 သည် နိုင်ငံပေါင်း ၁၅၆ နိုင်ငံကျော် ကူးစက်ခံရသူ (၂၄၃၇၆၇) ဦးရှိပြီး သေဆုံးသူဦးရေ (10333) ရှိကြောင်း South China Morning Post သတင်းဖော်ပြချက် အရ သိရသည်။

မြန်မာနိုင်ငံနှင့် နီးစပ်သည့် ထိုင်းနိုင်ငံတွင် Covid-19 ကူးစက်ခံရသူ (၃၂၂) ဦးရှိခဲ့ပြီး သေဆုံးသူ ၁ဦး ရှိကြောင်း ထိုင်းနိုင်ငံ ကျန်းမာရေး ဌာန ထုတ်ပြန်ချက် အရ သိရသည်၊

မြန်မာနိုင်ငံ နယ်စပ် စစ်ဆင်ရေး ဂိတ်များမှ ပြည်ဝင်ခွင့်ဗီဇာဖြင့် ဝင်ရောက် ခွင့် ကို မတ် ၁၉ ရက်နေတွင် ယာယီပိတ်လိုက်ကြောင်း မြန်မာနိုင်ငံ နိုင်ငံခြား ရေး ဝန်ကြီးဌာန မှ ထုတ်ပြန်ကြောညာထားသည်။