လူစုလူဝေး ပြုလုပ်သည့် ကိစ္စနှင့် ပတ်သက်ပြီး အစိုးရ အနေဖြင့် စည်းမျဉ်းစည်းကမ်း သတ်မှတ်မည် ဟု ဒေါ်အောင်ဆန်းစုကြည် ပြောကြားလိုက်သည်။
အဆိုပါ ပြောကြားချက်သည် ယနေ့ နေပြည်တော်တွင် ပြုလုပ်သည့် ၁၈ ကြိမ်မြောက် ပြည်ထောင်စု ငြိမ်းချမ်းေရေး ဆွေးနွေးမှု ပူးတွဲ ကော်မတီ (UPDJC) အစည်းအဝေးတွင် ပြောကြားခဲ့သည်။
မူဘောင်ပြင်ဆင်မှုကို အခြေခံပြီး အမျိုးသား အဆင့်နိုင်ငံရေး ဆွေးနွေးပွဲများ ဆက်လက် လုပ်ဆောင် သွားရန် ရှိနေသဖြင့် နိုင်ငံရေး ဆွေးနွေးပွဲများ ဆက်တိုက်ဖြစ်ပေါ်လာတော့မည် ဟု နိုင်ငံတော် အတိုင်ပင် ခံပုဂ္ဂိုလ် ဒေါ်အောင်ဆန်းစုကြည်က ပြောသည်။
ဆက်လက်ပြီး ဒေါ်အောင်ဆန်းစုကြည် က “ WHO (ကမ္ဘာ့ကျန်းမာရေး အဖွဲ့အစည်း) ကလည်း COVID 19 နဲ့ ပတ်သက်ပြီး Pandemic (ကမ္ဘာအနှံ့ ဖြစ်ပွားသောရောဂါ) လို့ကြေညာလိုက်ပါပြီ။ အဲ့တော့ ကျမ က ဒီနိုင်ငံရေး ဆက်စပ်ပြီး ပြောရမယ်ဆိုရင် လူစု လူဝေး လုပ်တဲ့ ကိစ္စတွေနဲ့ ပတ်သက်ပြီး အစိုးရ အနေနဲ့ စည်းမျဉ်းစည်းကမ်း သတ်မှတ်ရမှာ ဖြစ်ပါတယ်” ဟု အစည်းအဝေး မိန့်ခွန်းတွင် ထည့်သွင်းပြောဆိုခဲ့သည်။
ထို အစည်းအဝေးကို နေပြည်တော်ရှိ အမျိုးသား ပြန်လည်သင့်မြတ်ရေး နှင့် ငြိမ်းချမ်းရေး ဗဟိုဌာန (NRPC) တွင် ယနေ့ မနက် ၁၀ နာရီ ၌ ကျင်းပခဲ့သည်။
ထို အစည်းအဝေးကို တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် လက်မှတ်ရေးထိုး ထားသည့် တိုင်းရင်းသားလက်နက်ကိုင် အဖွဲ့အစည်းများ ( NCA-S- EAO) တို့ တက်ရောက်ခဲ့ကြောင်း သိရသည်။
နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်သည် ယခုရက်ပိုင်း သျှမ်းပြည် လားရှိုးမြို့၊ ပြင်ဦးလွင် နှင့် ဒီပဲယင်း မြို့သို့ လူထု တွေဆုံပွဲ ပြုလုပ်ခဲ့သည်။
