စစ်ကောင်စီ က ဦးဆောင်တဲ့ အမျိုးသား စည်းလုံးညီညွတ်ရေး နှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နဲ့ နိုင်ငံရေးပါတီများ အစုအဖွဲ့ (UPDJC) တို့ ပြီးခဲ့တဲ့ နိုဝင်ဘာလ ၃၀ ရက် က နေပြည်တော်မှာ တွေ့ဆုံခဲ့ ကြပါတယ်။ အဲ့ဒီ တွေ့ဆုံမှုမှာ NSPNC ဥက္ကဋ္ဌ ဒုတိယ ဗိုလ်ချုပ်ကြီး ရာပြည့် နဲ့ UPDJC နိုင်ငံရေးပါတီများ အစုအဖွဲ့မှ ကိုယ်စားလှယ်တို့က တွေ့ဆုံဆွေးနွေးခဲ့ကြတာပါ။

တွေ့ဆုံဆွေးနွေးပွဲမှာ ဖွဲ့စည်းပုံ အခြေခံဥပဒေ ပြင်ဆင်ရေးကို အဓိက ပြောဆိုခဲ့ကြပါတယ်။ ဒါ့ကြောင့် ဆွေးနွေးပွဲကို တက်ရောက်ခဲ့တဲ့ ရှမ်းတိုင်းရင်းသားများ ဒီမိုကရက်တစ်ပါတီ (SNDP) ကျားဖြူပါတီ ဥက္ကဌ ဦးစိုင်းအိုက်ပေါင်း ကို သျှမ်းသံတော်ဆင့် သတင်းထောက် နန်းနောင့်နောင့် က ဆက်သွယ်မေးမြန်းထားပါတယ်။

ဒါ့အပြင် လာမယ့် ၂၀၂၃ ရွေးကောက်ပွဲ အတွက် SNDP ပါတီရဲ့ ပြင်ဆင်မှု အခြေအနေတွေကိုလည်း အသေးစိတ် မေးမြန်းတင်ဆက်ထားပါတယ်။

မေး ။ ။ ပြီးခဲ့တဲ့ နိုဝင်ဘာလ ၃၀ ရက် က စစ်ကောင်စီ ငြိမ်းချမ်းရေးအဖွဲ့ NSPNC နဲ့ ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ UPDJC တွေ့ဆုံဆွေးနွေးမှုမှာ ဘာတွေ ဆွေးနွေးဖြစ်ခဲ့သလဲရှင့်။

ဖြေ ။ ။ ကျနော်တို့က ဖွဲ့စည်းပုံ အခြေခံ ဥပဒေ ပြင်ဆင်ရေးကို ဆွေးနွေးဖြစ်ခဲ့ပါတယ်။ ကျနော်တို့ဘက်က အကြံပြု တင်ပြထားတာ ၁၁ ချက်ပေါ့။ ၄ ချက်တော့ သဘောတူညီချက်ရရှိပါတယ်။ ပုဒ်မ ၂၆၁ လည်း ရသွားပြီ၊ သက်ဆိုင်ရာ တိုင်းဒေသကြီး သို့မဟုတ် ပြည်နယ် လွှတ်တော်ကနေပြီးတော့ သက်ဆိုင်ရာပြည်နယ် သို့မဟုတ် တိုင်းဒေသကြီး ဝန်ကြီးတို့ကို လွှတ်တော်ကနေပဲ ရွေးရမယ်။ ရွေးပြီးရင် မဲအများဆုံးရတဲ့သူက ဝန်ကြီးချုပ်ဖြစ်မှာပေါ့။ ဒါအရေးကြီးဆုံးပဲ။ တိုင်းရင်းသားတွေ လိုလားတဲ့ ကိုယ်ပိုင်အုပ်ချုပ်ခွင့်ဆိုတာ ဒါပဲလေ။

မေး။။ ။ ဖွဲ့စည်းပုံ အခြေခံ ဥပဒေက ပုဒ်မ ၂၆၁ ကို သဘောတူညီချက်ရရှိထားတဲ့ အပေါ်မှာ ဘယ်လိုမျိုး မှတ်ချက် ပေးချင်လဲရှင့်။

ဖြေ။ ။ ဒါက ရှင်းရှင်းပြောရရင် ကိုယ့်ဝန်ကြီးချုပ်ကို ကိုယ်ရွေးရတယ်ဆိုတာ ဒါကိုယ်ပိုင်အုပ်ချုပ်ခွင့် ဖြစ်သွားပြီ လေ၊ ကိုယ့်ဘာသာကို အုပ်ချုပ်ရသွားပြီလေ၊ ဒီတစ်ဆင့်ကတော့ မဆိုးဘူးပေါ့၊ အခွင့်အရေးတွေ ရလာပြီပေါ့။

မေး ။ ။ လက်ရှိ သဘောတူညီချက်ကနေ ရှေ့ဆက်ရမယ့် ငြိမ်းချမ်းရေး လမ်းကြောင်းနဲ့ လုပ်ဆောင်ချက်တွေရော ဘယ်လိုရှိမလဲရှင့်။
ဖြေ ။ ။ တို့က နိုင်ငံရေးပါတီ အစုအဖွဲ့ကိုယ်စား UPDJC အဖွဲ့ပေါ့နော်၊ အစိုးရ တပ်မတော်နဲ့ လောလောဆယ် နှစ်ဖွဲ့ ပဲ ရှိတာပေါ့နော်၊ သဘောထားကတော့ကောင်းပါတယ်၊ သူတို့ကလည်း အရင်လို မတင်းမာတော့ဘူး၊ အရင်က ထက်စာရင် အများကြီး ပျော့ပျောင်းလာတယ်၊ ပြီးတော့ ယုံကြည်မှုလည်း ပိုရလာတော့ တိုးတက်လာမှုတွေ ရှိလာတယ်။

မေး။ ။ လာမဲ့ ၂၀၂၃ ခုနှစ်မှာ ပြုလုပ်မယ့် ရွေးကောက်ပွဲမှာရော ရှမ်းတိုင်းရင်းသားများ ဒီမိုကရက်တစ်ပါတီ (SNDP ) အနေနဲ့ ဝင်ရောက်ယှဉ်ပြိုင်ဖို့ အဆင်သင့်ဖြစ်ပြီလားရှင့်။

ဖြေ။ ။ ကျနော်တို့က ဝင်ပြိုင်မှာပါ၊ ပြင်ဆင်ထားပြီးပါပြီ။ ထိုက်သင့်သလောက်လည်း အဆင်သင့်ဖြစ်နေပါပြီ၊ လာမယ့် ရွေးကောက်ပွဲမှာ ရလဒ်ကောင်းတွေ ဖော်ဆောင်နိုင်မယ်လို့လည်း ထင်ပါတယ်၊ ပြည်သူလူထုတွေလည်း သိသွားပြီလေ၊ အရင် ကျနော်တို့ နိုင် စဥ်က သျှမ်းပြည်နဲ့ ကချင်ပြည်တို့မှာ ဘယ်လို အခြေအနေ ရှိသလဲ။ ကျနော်တို့ မနိုင်တဲ့ ကာလ သက်တမ်းမှာ ပြည်သူလူထုတွေက ကိုယ်တွေ့ ကြုံတွေ့နေရပြီလေ။ ရှင်းရှင်းပြောရရင် ကျနော်တို့ မနိုင်စဥ်မှာ ကျောက်မဲဘက်က စစ်ဘေးရှောင်တွေက တောင်ကြီးဘက်က ဘုန်းကြီးကျောင်းမှာ လာပြီးတော့ နေကြရတယ်ဗျာ။

မေး။ ။ လာမယ့် ၂၀၂၃ ရွေးကောက်ပွဲမှာ ရွေးကောက်ပွဲ ဝင်ပြိုင်မယ့် နိုင်ငံရေးပါတီ မှတ်ပုံတင်ကြေးလည်း အပြောင်းအလဲတွေ ရှိလာနိုင်တယ်ပြောတဲ့အပေါ်မှာရော SNDP အနေနဲ့ ဘယ်လိုပြင်ဆင်ထားသလဲရှင့်။

ဖြေ ။ ။ နိုင်ငံရေးပါတီတွေက မှတ်ပုံတင် အသစ် ပြန်တင်ရမယ်လို့တော့ ကြားတယ်၊ အခုကျနော်တို့ ပါတီက လည်း စာရင်းတွေပြန်ကောက်ပြီးတော့ စုစည်းထားတယ်၊ ပါတီဝင်တွေက ဘယ်မြို့နယ်မှာ ဘယ်နှထောင် ဆိုတာက အကုန်လုံးလုပ်ထားပြီးသားလေ၊ တင်ရမယ်ဆိုလည်း တင်ရုံပဲ၊ ပြီးတော့ ရွေးကောက်ပွဲ ကော်မရှင်က တင်သွင်းထားတဲ့ ပါတီဝင်တစ်သိန်း Deposit ငွေသိန်းတစ်ထောင်ဆိုတာကို နစက အဖွဲ့ဝင်တွေက ဒါမဖြစ်သင့် ဘူး လို့ ဆွေးနွေးတဲ့အခါမှာ ဒါမဖြစ်တော့ဘူးလေဗျာ၊ ပျက်ပြယ်သွားပြီလို့ ပြောလို့ရတယ်။

မေး ။ ။ ၂၀၂၃ ရွေးကောက်ပွဲအတွက် SNDP ပါတီ အနေနဲ့ တခြား နိုင်ငံရေးပါတီ အဖွဲ့အစည်းတွေ၊ လက်နက်ကိုင် တပ်ဖွဲ့တွေနဲ့ တွေ့ဆုံဆွေးနွေးညှိနှိုင်းမှုတွေ ရှိနိုင်မလားရှင့်။

ဖြေ။ ။ ကျနော်တို့က ရွေးကောက်ပွဲပြီးတော့မှ ကျနော်တို့ ပြည်ထောင်စုကြီးအတွက် သျှမ်းပြည်အတွက် ဘယ်ပါတီ နဲ့မဆို လက်တွဲပူးပေါင်းဖို့ အဆင်သင့်ပါပဲ။ ဘယ်အဖွဲ့ကိုမဆို ကျနော်တို့က တွေ့မှာပဲ၊ ပြည်သူလူထု ကို လွတ်လွတ်လပ်လပ် မဲပေးခွင့်ပြုပါ။ ကျနော်တို့က ပြောမှာပဲ။ အခု ကျနော်တို့ သျှမ်းပြည်မှာ အဖွဲ့အစည်း တွေက ဆက်ကြေးကောက်တယ်၊ လူသစ်တွေ စုဆောင်းတယ်။ ဒါတွေကို ဘယ်ပါတီမှ မတောင်းဆိုဘူး။ တို့ ကျားဖြူပါတီကပဲ Statement ထုတ်တယ်လေ။ တို့ကတော့ ဘယ်သူ့ဘက်ကိုမှ ဘက်မလိုက်ဘူး၊ ပြည်သူလူထုဘက်ကိုပဲ မျက်နှာမူတယ်။

မေး။ ။ နောက်ဆုံးအနေနဲ့ ကျမ မမေးမိတဲ့ အကြောင်းအရာတွေကို ဥက္ကဌကြီး ဘာများထပ်ဖြည့်စွက် ပြောချင်တာလဲရှင့်။

ဖြေ ။ ။ နောက်ပိုင်းကျရင်လေ အုပ်ချုပ်ရေးပိုင်းတွေမှာ ရွေးကောက်တင်မြောက်တဲ့ ပုံစံတွေ ဖြစ်လာတော့မှာ၊ အသေးစိတ်တော့ ပြောလို့မရသေးဘူးပေါ့နော်၊ မူအားဖြင့်တော့ အခုက မြို့နယ်တို့ ခရိုင်တို့တွေမှာ ဝန်ထမ်းတွေ နဲ့ အုပ်ချုပ်နေတာမလား၊ နောက်ဆိုလို့ရှိရင် ရွေးကောက်တင်မြောက်တဲ့ ဒေသခံ ပုဂ္ဂိုလ်တွေနဲ့ အုပ်ချုပ် ရတော့မှာ။