ရှမ်းနှင့်တိုင်းရင်းသားများ ဒီမိုကရက်တစ်ပါတီ SNDP အပါအဝင် စစ်ကောင်စီထံ မှတ်ပုံတင်ထားသည့် နိုင်ငံရေးပါတီ ၄ ခုတို့က အသစ်ဖွဲ့မည့် UPDJC နိုင်ငံရေးပါတီ အစုအဖွဲ့ကို ဦးဆောင်သွားမည်ဖြစ်ကြောင်း စုံစမ်းသိရသည်။

မေလ ၂၅ နှင့် ၂၆ ရက်များတွင် စစ်ကောင်စီ၏ ပြည်ထောင်စု ရွေးကောက်ပွဲကော်မရှင် (UEC) က ခွင့်ပြုထားသည့် နိုင်ငံရေးပါတီ ၄၇ ပါတီထဲမှ ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC)၏ နိုင်ငံရေးပါတီ အစုအဖွဲ့ကို ပါတီ (၄)ခုက ဦးဆောင်သွားရန် ရွေးချယ်လိုက်ကြောင်း SNDP ဥက္ကဋ္ဌ ဦးစိုင်းအိုက်ပေါင်းက ပြောသည်။

“အခုက ပါတီ ၄ ခုတော့ ရွေးလို့ရတာပေါ့။ ပထမဦးဆုံးက ၄၇ ပါတီထဲက ၁၆ ပါတီ ရွေးတယ်။ ၁၆ ပါတီကနေ ၄ ပါတီ ထပ်ရွေးတယ်။ ၄ ပါတီ ရွေးတဲ့အထဲမှာ ပ-ခေါင်းဆောင် ဒု-ခေါင်းဆောင် ပြန်ရွေးရမယ်။ ရှေ့လဆန်း ပထမပတ် မကုန်ခင်မှာ ထပ်ရွေးရဦးမယ်။ အခုလောလောဆယ် ခေါင်းဆောင် ၄ ဦးကို ယာယီရွေးထားတာပေါ့”ဟု ကျားဖြူပါတီ ဥက္ကဋ္ဌ ဦးစိုင်းအိုက်ပေါင်းက သျှမ်းသံတော်ဆင့်ကို ပြောသည်။

ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC)၏ နိုင်ငံရေးပါတီ အစုအဖွဲ့ကို ပူးတွဲဦးဆောင်သွားမည့် (၄)ပါတီမှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)၊ ပြည်သူ့ပါတီ (PP)မှ ဦးကိုကိုကြီး၊ ရခိုင့်ဦးဆောင်ပါတီ (AFP)မှ ဒေါက်တာအေးမောင် နှင့် ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP) မှ ဦးစိုင်းအိုက်ပေါင်းတို့ ဖြစ်ကြပြီး လာမည့် ဇွန်လ ပထမပတ်တွင် လုပ်ငန်းတာဝန်များကို စတင်ဆွေးနွေးသွားမည်ဖြစ်ကြောင်း သိရသည်။

UPDJC ကို အစိုးရ၊ လွှတ်တော်နှင့် တပ်မတော် အစုအဖွဲ့မှ ကိုယ်စားလှယ် ၁၆ ဦး၊ NCA လက်မှတ်ရေးထိုးထားသည့် တိုင်းရင်းသားလက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရမည်ဖြစ်ကြောင်း NCA စာချုပ်တွင် ပြဋ္ဌာန်းထားသည်။

“တကယ်တမ်း NCA အထဲမှာ သေချာဖတ်ကြည့်လိုက်ရင် လွှတ်တော်မရှိဘဲနဲ့လည်း အဲဒီ NCA သဘောတူညီချက်ရရင် ရွေးကောက်ပွဲကျင်းပလို့ လွှတ်တော်ပေါ်လာရင် အဲ့ဒီမှာ တင်ပြပြီး အတည်ပြုချက် ယူလိုက်ရင် အခြေခံ ဥပဒေ ပြင်လို့ရပြီ။ ဒီ ၄၇ ပါတီကပဲ ရွေးကောက်ပွဲ ဝင်မှာပဲ၊ လွှတ်တော်ကိုလည်း ဒီပါတီတွေရဲ့ ကိုယ်စားလှယ်တွေပဲ လွှတ်တော်ကိုယ်စားလှယ်တွေ ဖြစ်လာမှာပဲ။ အခုကတည်းက ညှိနှိုင်းထားရင် ရွေးကောက်ပွဲ ပြီးလာတဲ့အခါမှာ လွှတ်တော်ပေါ်လာရင် တင်ပြပြီး အတည်ပြုချက် ယူလိုက်ရင် ပြင်ချင်တဲ့ ပုဒ်မတွေ ပြင်လို့ရပြီ”ဟု ဦးစိုင်းအိုက်ပေါင်းက သျှမ်းသံတော်ဆင့်ကို ဆက်ပြောသည်။

၂၀၂၁ ခုနှစ်တွင် စစ်တပ်က အရပ်သားအစိုးရထံမှ အာဏာသိမ်းပြီးနောက်ပိုင်း UPDJC နိုင်ငံရေးပါတီများ အစုအဖွဲ့ကို ပြန်လည်စုဖွဲ့ခဲ့ရာ ဥက္ကဋ္ဌအဖြစ် ကျားဖြူပါတီ SNDP မှ ဦးစိုင်းအိုက်ပေါင်းက တာဝန်ယူခဲ့ဖူးကြောင်း သိရသည်။

ထို့အပြင် ငြိမ်းချမ်းရေးကိစ္စရပ်များ တွေ့ဆုံဆွေးနွေးနိုင်ရန် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများ၏ စုဖွဲ့မှုကို ပြင်ဆင်ထားကြောင်း သိရသော်လည်း NCA ကို ဆက်လက်ကိုင်စွဲထားသည့် တိုင်းရင်းသားလက်နက်ကိုင် (၇)ဖွဲ့မှာ “7 EAO Alliance” မဟာမိတ်အဖြစ် ပြင်ဆင်ဖွဲ့စည်းထားရာ မည်သို့ရှေ့ဆက်ဆောင်ရွက်သွားမည်ကို မသိနိုင်သေးကြောင်း နိုင်ငံရေးလေ့လာသုံးသပ်သူများက ပြောဆိုသည်။