မြန်မာနိုင်ငံရေး ဖြေရှင်းရန် အရှေ့တောင်အာရှ နိုင်ငံများအသင်းက ချမှတ်ထားသည့် ဘုံသဘောတူညီချက် ၅ ရပ်ကို အကောင်အထည်ဖော်နိုင်ရန်အတွက် NCA လက်မှတ်ထိုးထားသော တိုင်းရင်းလက်နက်ကိုင် (၇) ဖွဲ့ ဆက်ပူးပေါင်းသွားမည်ဖြစ်ကြောင်း သိရှိရသည်။
ယမန်နေ့ (ဇန်နဝါရီလ ၁၀ ရက်) နံနက်ပိုင်းတွင် ဆာဆီယံဉက္ကဌ၏ မြန်မာနိုင်ငံဆိုင်ရာ အာဆီယံအထူး ကိုယ်စားလှယ် Mr.Alounkeo Kittikhoun ဦးဆောင့်သည့် ကိုယ်စားလှယ်အဖွဲ့နှင့် NCA လက်မှတ်ရေးထိုးထားသည့် တိုင်းရင်းလက်နက်ကိုင် (၇) တို့ နေပြည်တော်တွင် တွေ့ဆုံဆွေးနွေးခဲ့ရာ ယခုကဲ့သို့ သဘောတူညီချက်များ ဆွေးနွေးခဲ့ကြောင်း PPST အဖွဲ့ဝင် ဦးခွန်ဉက္ကာက ပြောသည်။
“အာဆီယံရဲ့ ဘုံသဘောတူညီချက် ၅ ရပ်ကို မဖြစ်မနေအကောင်အထည်ဖော်မယ်။ အဲ့ဒီကိစ္စမှာ ကျနော်တို့ NCA လက်မှတ်ရေးထိုးထားတဲ့ အဖွဲ့တွေကလည်း ထောက်ခံထားတယ်။ ပူးပေါင်းပါဝင်မယ်လို့ ပြောထားတယ်။ ဒါကြောင့် ဒီနှစ်ထဲမှာတော့ နည်းလမ်းရှာပြီး အကောင်အထည်ဖော်နိုင်အောင် ကြိုးပမ်းမယ်။ နောက်တစ်ခုက မြန်မာပြည်က အများလိုနေတဲ့ငြိမ်းချမ်းရေးပေါ့။ ငြိမ်းချမ်းရေး လုပ်ငန်းစဉ်တွေလည်း ဆက်ပြီးတော့ ခရီးဆက်နိုင်အောင် အာဆီယံအနေနဲ့ ကြိုးစားဆောင်ရွက်ပေးဖို့ ကျနော်တို့မေတ္တာရပ်ခံထားတယ်” ဟု ဦးခွန်ဉက္ကာက ပြောသည်။
အဆိုပါ နွေးဆွေးမှုနှင့် ပတ်သက်၍ ဆုံးဖြတ်ချက်များ ထွက်ပေါ်လာခြင်း မရှိသေးကြောင်း၊ လိုအပ်ရင်လိုအပ်သလို မကြာခဏတွေ့ဆုံသွားကြမည်ဆိုသည့် ကတိဂဝတ်ရှိထားကြောင်း ၎င်းကဆက်ပြောသည်။
ဆွေးနွေးမှုပွဲတွင် NCA လက်မှတ်ရေးထိုးထားသည့် တိုင်းရင်းလက်နက်ကိုင် (၇) ဖွဲ့ဖြစ်သည့် ရခိုင်ပြည်လွတ်မြောက်ရေးပါတီ (ALP)၊ ကရင်ငြိမ်းချမ်းရေးကောင်စီ (KNU/KNLA)၊ လားဟူဒီမို ကရက်တစ်အစည်းအရုံး (LDU)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊ ဒီမိုကရေစီ အကျိုးပြုကရင်တပ်မတော် (DKBA)၊ မွန်ပြည်သစ်ပါတီ (NMSP)နှင့် သျှမ်းပြည်ပြန်လည် ထူထောင်ရေးကောင်စီ (RCSS) တို့မှ ကိုယ်စားလှယ်များ တက်ရောက်ခဲ့ အဖွဲ့အသီးသီး၏ ကိုယ်စားလှယ်များက (၅) မိနစ်ကြာ အမြင်သဘောထား တင်ပြခဲ့သည်။
ထို့အပြင် စစ်ကောင်စီ၏ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC နှင့် NCA လက်မှတ်ရေးထားသည့် တိုင်းရင်းလက်နက်ကိုင် (၇) တို့ ပထမရက် ဆွေးမှုတွင်လည်း လာမည့်ဆွေးနွေးမှုများကို စဉ်ဆက်မပြတ်လုပ်ဆောင်ရန် အပြန်အလှန်ဘဘောတူထားကြောင်း၊ နိုင်ငံရေးပြသာနာကို နိုင်ငံရေးနည်းဖြင့် ရှင်း၍ ဆွေးနွေးညှိနှိုင်း အဖြေရှာမည်ဖြစ်ကြောင်း ဆိုသည်။
“ကျနော်တို့ဘက်ကလည်း စစ်ရေးဘောင်ကို ကျဉ်းနိုင်သမျှ ကျဉ်းအောင်၊ စစ်ရေးပဋိက္ခ လျှော့နိုင်သမျှ လျှော့အောင်လုပ်ပြီးတော့ နိုင်ငံရေးဘောင်ကို ကျယ်နိုင်သလောက်ကျယ်အောင် ဖွင့်ပေးဖို့ နိုင်ငံရေးပါတီရဲ့ အခန်းကဏ္ဍကို ဦးစားပေးဖို့၊ ပြီးတော့ နိုင်ငံရေး လုပ်ခွင့် အခွင့်အလမ်းတွေလည်း ဖွင်ပေးဖို့ တိုက်တွန်းခဲ့ပါတယ်” ဟု ဦးခွန်ဦးက္ကာက ထပ်လောင်းပြောသည်။
လက်ရှိတွင် စစ်ကောင်စီသည် ငြိမ်းချမ်းရေး လုပ်ငန်းစဉ်များ ဖော်ဆောင်ရန်အတွက်ဟုဆိုကာ တနိုင်ငံလုံး အပစ်ခတ်ရပ်စဲရေးဟုကြေညာထားသော်လည်း သျှမ်းမြောက်ဒေသက “၁၀၂၇ စစ်ဆင်ရေး” အပါအဝင် နိုင်ငံတဝှမ်း နေရာအနှံ့အပြား၌ စစ်ပွဲများဆက်လက် ဖြစ်ပွားနေဆဲဖြစ်သည်။
