မြန်မာ- တရုတ်နယ်စပ် မူဆယ်မြို့နယ် အတွင်းရှိ နယ်စပ်ဂိတ်များ ဝင်၊ ထွက်သွားလာမှု ယခင်က အတိုင်းပြန်ဖြစ်နေကြောင်း သိရသည်။
တရုတ်နိုင်ငံ ဝူဟန်ပြည်နယ် မှ စတင်ဖြစ်ပွားသည့် Novel Corona Virus (ခိုရိုနာ ဗိုင်းရပ်စ်) ကြောင့် တရုတ်နိုင်ငံအတွင်းရှိ ဈေးဆိုင်များ၊ စက်ရုံများ ယာယီပိတ်ဆိုင်း ခဲ့ကြသည်။
ထိုပိတ်ဆိုင်းမှုကြောင့် မြန်မာ- တရုတ်နယ်စပ်သို့ သွားရောက် အလုပ်လုပ်သည့် ရွှေ့ပြောင်းအလုပ် သမားများ ယာယီခေတ္တ နားထားရာမှ ယခု တရုတ်ပြည်သို့သွားပြီး အလုပ်ပြန်လုပ်ကြကြောင်း မူဆယ်ဒေသခံ များကပြောကြားသည်။
“ တရုတ်ပြည် ပြန်ဝင်ပြီး အလုပ်ပြန်လုပ်တာ တပတ်လောက်ရှိပြီ။ တရုတ်ပြည် ဂျယ်ဂေါင်၊ ရွှေလီတွေမှာ တော့ ဆိုင်တွေပြန်ဖွင့်ဘူး။ တချို့ စက်ရုံတွေလည်းပြန်ဖွင့်ပြီလို့ ကြားတယ်” ဟု မူဆယ်မြို့ဒေသခံ စိုင်းလောဝ် က သျှမ်းသံတော်ဆင့် သို့ပြောသည်။
လက်ရှိတွင် ခိုရိုနာ ဗိုင်းရပ်စ် ထက် စားဝတ်နေရေး အတွက် ပိုပြီး စိုးရိမ်နေရကြောင်း၊ တရုတ်ပြည်ရှိ ဈေးဆိုင်များ၊ စက်ရုံများ ယာယီပိတ်လိုက်သည့်အခါ ရွှေ့ပြောင်းအလုပ်သမားများအတွက် အခက်အခဲများစွာ ကြုံခဲ့ရကြောင်း စိုင်းလောဝ် က ပြောသည်။
တရုတ်ပြည် အတွင်းသို့ သွားရောက် အလုပ်လုပ်သည့် သူများသည် မြန်မာပြည်တဝှမ်းရှိ ရွှေ့ပြောင်းအလုပ်သမားများဖြစ်ကြောင်း သိရသည်။
“ ဆိုင်တွေ ပြန်ဖွင့်နေပြီလို့ပြောလို့သွားတာပါ။ မသွားရင်လည်း လစာမရဘူးလေ။ ဝမ်းရေး က ရှိသေးတယ်” ဟု တရုတ်ပြည် ရွှေလီတွင် အလုပ်လုပ်နေသည့် အမျိုးသမီး တဦးက သျှမ်းသံတော်ဆင့်သို့ပြောသည်။
တရုတ်ပြည်သို့ သွားရောက်ပါက မြန်မာပြည်ဘက်တွင် တကြိမ်၊ တရုတ်ပြည်ဘက်တွင် တကြိမ် ကိုယ်အပူချိန် တိုင်းကြောင်း၊ ကိုယ်အပူချိန် ရှိနေပါက ဖြတ်သန်းသွားလာခွင့်မပြုကြောင်းလည်း အဆိုပါ အမျိုးသမီးက ပြောသည်။
“ မသွားရင်လည်း စားဖို့က မရှိ၊ အစစအရာရာ ဈေးက မြင့်နေတော့ ဘာဗိုင်းရပ်စ် မှ ကြောက်မနေတော့ဘူး” ဟုလည်း တရုတ်ဘက်သို့ ဝင်ပြီး အလုပ်လုပ်ရန် တန်းစီနေသည့် ရွှေ့ပြောင်းအလုပ်သမား မောင်အေး က ပြောသည်။
မြန်မာ-တရုတ်နယ်စပ်ဂိတ်တိုင်းတွင် ကျန်းမာရေး စောင့်ရှောက်မှုများပြုလုပ်နေကြောင်း၊ နယ်စပ် အဝင်၊ အထွက်ဂိတ်တိုင်း ကျန်းမာရေး စစ်ဆေးမှုများပြုလုပ်နေပြီး ကိုယ်အပူချိန် ရှိနေသူ၊ နေမကောင်းသူဖြစ်ပါက နယ်စပ်ဂိတ်ဖြတ်သန်းခွင့်မပြုကြောင်း မူဆယ်မြို့ ကျန်းမာရေး ဝန်ဆောင်မှု ပေးနေသည့် အဖွဲ့ မှ တာဝန်ရှိသူ တဦးက ပြောသည်။
“ နယ်စပ်ဂိတ်ကတော့ ပိတ်တာမရှိဘူး။ အဝင်၊ အထွက် နည်းသွားတာပဲရှိတယ်။ တဖက် တရုတ်နိုင်ငံ အလုပ်တွေ ဈေးဆိုင်တွေပိတ်တော့ သွားတာနည်းသွားတယ်။ အခု ပြန်ဖွင့်တော့ တရုတ်ပြည်ပြန်သွားသူများလာတယ်။ မသွားနဲ့လို့လည်း တားလို့မရဘူး” ဟု ၎င်း က ပြောသည်။
တရုတ်နိုင်ငံမှ စတင်ဖြစ်ပွားသည့် ခိုရိုနာ ဗိုင်းရပ်စ် သည် ကမ္ဘာပေါ်ရှိနိုင်ငံပေါင်း ၁၀၀ ကျော်တွင် ပျံ့နှံ့နေပြီး ဗိုင်းရပ်စ် ကူးစက်ခံရသူ ( ၁၂၄၁၇၁) ဦး ၊ သေဆုံးသူ ၄၆၂၂ ဦးရှိပြီဖြစ်ကြောင်း South China Morning Post သတင်း တွင်ဖော်ပြထားသည်။
သို့သော် တရုတ်ပြည်နှင့် နယ်မြေ ထိစပ်နေသည့် မြန်မာနိုင်ငံတွင် ယနေ့အချိန်ထိ ရောဂါကူးစက်ခံရသူ၊ သေဆုံးသူတဦးတယောက်မှ မရှိသေးပေ။
Leave a Comments