သျှမ်းပြည်မြောက်ပိုင်း မူစယ်ခရိုင် ကွတ်ခိုင်မြို့နယ် မိုင်းယုအုပ်စုတွင် ဂိမ်းဆိုင်များပိတ်ပင်တားဆီးပေးရန် ဒေသတွင်းလူငယ်များက ကျေးရွာ၊ အုပ်စုအုပ်ချုပ်ရေးမှူးနှင့် ဂိမ်းဆိုင်ပိုင်ရှင်များထံ စုပေါင်းတောင်းဆိုလိုက်သည်။

မတ်လ ၈ ရက်နေ့မနက်ပိုင်းက မိုင်းယုအုပ်စု စျေးတွင် မိုင်းယုအုပ်စုအတွင်း ဒေသခံလူငယ် ၅၀၀ နီးပါး တွေ့ဆုံကာ အုပ်ချုပ်ရေးမှူးများနှင့်တွေ့ဆုံပြီးတောင်းဆိုလိုက်ခြင်းဖြစ်သည်။

“အုပ်စုအတွင်း ၉ ရွာက ကျေးရွာအကြီးအကဲ တက်ရောက်ပြီး အမှာစကားပြောတယ်။ ပြီးတော့ တက်ရောက်လာတဲ့ လူငယ်အချင်းချင်းဆွေးနွေးတယ်။ေ ကျးလက်အကြီးအကဲတွေဆီတင်ပြ တောင်းဆိုတယ်။မိုင်းယုအုပ်စုအုပ်ချုပ်ရေးမှူး စိုင်းခမ်းနွံကတော့ မတ်လ ၈ ရက်နေ့ကပြီး ပိတ်ပင်ပေးမယ်လို့ ပြောဆိုသွားတယ်။ ဂိမ်းဆိုင်အားလုံးပိတ်ပင်နိုင်ရေးအတွက် တက်ရောက်လာတဲ့ လူငယ် ၄၇၀ ကျော်လက်မှတ်ရေးထိုးကြတယ်။” – ဟု တွေ့ဆုံရေးဖြစ်မြောက်ရေးဦးဆောင်လူငယ်တဦးဖြစ်သည့် စိုင်းလျောဝ်းစတ် ကသျှမ်းသံတော်ဆင့်အားပြောပြသည်။

အဆိုပါ တွေ့ဆုံမှု သို့တက်ရောက်ရန် ဂိမ်းဆိုင်ပိုင်ရှင်များ၊ ဒေသတွင်းလှုပ်ရှားသည့် ပန်းဆေးပြည်သူ့စစ်များ၊ ရဲများအား ဖိတ်ကြားသော်လည်း တက်ရောက်ခြင်းမရှိကြောင်း သိရသည်။

ပန်လော့တွင်ဖွင့်လှစ်ထားသော ဂိမ်းဆိုင် ၂ ခုမှာမူ ပန်းဆေးပြည်သူ့စစ်ပိုင်ဖြစ်သဖြင့် ဂိမ်းဆိုင်များမပိတ်ပေးပါက လူထုလက်မှတ်ရေးထိုးတောင်းဆိုမှုအား ပြည်နယ်အဆင့် ပြည်ထောင်စုအဆင့်အထိ တင်ပြတောင်းဆိုသွားမည်ဖြစ်ကြောင်း ရွာသားများပြောဆိုသည် ။

“ဂိမ်းဆိုင်တွေ လောင်းကစားဝိုင်းတွေပေါများလာတာကြောင့် ဒေသတွင်းလူငယ်တွေအကျင့်စာရိတ္တ ပျက်ပြားလာတယ်။ ဆိုးခိုးလုယက်မှုတွေများပြားလာတာကြောင့် မတ်လ ၄ ရက်နေ့က ကျနော်တို့ မိုင်းယုရွာကလူငယ်တွေကနေ ဟိုခို၊ ပန်လော့ ၊ လင်လျန်ရွာ လူငယ် ၃၀ ကျော်နဲ့တွေ့ဆုံဆွေးနွေးတယ်။ ဒီကိစ္စ ဘယ်လိုလုပ်ဆောင်သွားသင့်သလဲဆိုတာ ဆွေးနွေးဖို့ ဗဟုသုတဖလှယ်ဖို့ မတ်လ ၈ ရက်နေ့မှာ တွေ့ဆုံမှုတခုပြုလုပ်ဖို့ဆုံးဖြတ်ခဲ့ကြတာဖြစ်ပါတယ် ။”- ဟု စိုင်းလျောဝ်းစတ်က ပြောသည်။

ကွတ်ခိုင်မြို့နယ်မိုင်းယုအုပ်စုတွင် ဂိမ်းဆိုင်ပေါင်း ၁၀ ဆိုင်ကျော်ရှိပြီး ဂိမ်းဆိုင်များကိုလွန်ခဲ့သည့် ၁၀ နှစ်ခန့်ကတည်းစတင်ထားရှိလာသည်ဟုသိရပါသည်။