လောင်းကစားဝိုင်းများ ဂိမ်းဆိုင်များ ပေါများနေသော သျှမ်းပြည်မြောက်ပိုင်းကွတ်ခိုင်မြို့နယ် မိုင်းယုအုပ်စုတွင် ယာဘ မူးယစ်ဆေးဝါးလည်းအဆမတန် ပေါများနေကြောင်းဒေသခံများကပြောသည်။

“ယာဘ မူးယစ်ဆေးဝါးပေါချက်ကတော့ပြောမနေနဲ့တော့။ မုန့်ကောင်းကောင်းရှာစားရင်တောင်ခက်ဦးမယ်။ ယာဘမုူးယစ်ဆေးဝါးက လမ်းကောင်းကောင်းမလျှောက်ရင် ခလုတ်တောင်တိုက်သွားနိုင်တယ်။ စျေးလည်းပေါ ၊ရှာဝယ်လည်းလွယ်။ တပြားကျပ် ၄၀၀ ဘဲရှိတယ်။ လူတန်းစားမရွေးဝယ်စားနိုင် တယ်။အဲလောက် ထိပေါတာ။ လူငယ်တွေကိုယ့်အားကိုယ်ကိုး တိုက်ဖျက်မှုမလုပ်ရင် အနာဂတ်က မလွယ်ဘူး။” -ဟု ကွတ်ခိုင်မြို့နယ် မိုင်းယုအုပ်စုမှ လူငယ်စိုင်းလျောဝ်းစတ့် ကပြောသည်။

မိုင်းယုအုပ်စုအတွင်းရှိ ကျေးရွာ ၉ ရွာမှလူငယ်များစုပေါင်းကာ မတ်လ ၈ ရက်နေ့က ကျေးလက်အုပ်ချုပ်ရေးမှူးများနှင့်တွေ့ဆုံပြီး မူးယစ်ဆေးဝါးနှင့် ဂိမ်းဆိုင်များ ပိတ်ပင်တားဆီးပေးရန် တောင်းဆိုခဲ့ကြသည်။ သို့သော် ဂိမ်းဆိုင်များဖွင့်လှစ်ရာတွင်ပါ၀င်သည့် ဒေသတွင်းလှုပ်ရှားသည့် ပြည်သူ့စစ်တပ်ဖွဲ့မှာ အစည်းအဝေးတက်ရောက်ခြင်းမရှိပေ။

“လူငယ်တွေရွာသားတွေညီညွတ်စွာလက်တွဲပြီးခုခံတိုက်ခိုက်စေချင်တယ်။ ဂိမ်းဆိုင်တို့ မူးယစ်ဆေးတို့ဆိုတာက ဘယ်သူ့ကိုမှ အကျိုးမပေးပါဘူး။ ကိုယ့်ဒေသလူငယ်တွေပျက်စီးအောင် ဖျက်ဆီးနေတာ။ အမြဲသတိထားနေရမယ့်အချက်ဖြစ်တယ်။” – ဟု မူးယစ်ဆေးဝါးတိုက်ဖျက်ရေးတွင် ဦးဆောင်ပါ၀င်သည့် စိုင်းလျောဝ်စတ့် ကပြောသည်။

သျှမ်းပြည်မူးယစ်ဆေးဝါး စောင့်ကြည့်ရေးအဖွဲ့က – သျှမ်းပြည်အနှံ့ ယာဘ မူးယစ်ဆေးဝါးများပျ့ံနှံ့လျက်ရှိပြီး အသက် ၁၂ နှစ်ခလေးများမကျန်သုံးစွဲနေကြကြောင်း၊ ယာဘစျေးမှာလည်းအည့ံဆုံးအမျိုးအစားမှာ တပြား ၁၀၀ ကျပ်သာရှိကြောင်း -ပြောဆိုပါသည်။