သျှမ်းပြည် တောင်ပိုင်း တောင်ကြီးခရိုင် အတွင်း ဘိန်းစိုက်ပျိုးမှု လျော့ကျလာခြင်းမရှိကြောင်း ဒေသခံများထံသိရသည်။
Photo by မူးယဈရဲတပျဖှဲ့
သက်ဆိုင်ရာမှနှစ်စဉ် ဘိန်းစိုက်ပျိုးမှုကို ဖျက်ဆီးနေ သော်လည်း ဘိန်းစိုက်ပျိုးမှုမှာ လျော့ချလာခြင်းမရှိကြောင်း ပင်းလောင်မြို့ ဒေသခံ စိုင်းဘ က ပြောသည်။
မြန်မာနိုင်ငံ မူးယစ်ရဲတပ်ဖွဲ့ သည် သျှမ်းပြည်တောင်ပိုင်း တောင်ကြီးခရိုင်အတွင်း အောက်တိုဘာ ၂၉ ရက်နေ့မှ စတင်ကာ ဒီဇင်ဘာ ၁၂ရက်နေ့ထိ ဘိန်းစိုက်ခင်း ဧက ၁၁၀၀ ကျော် ဖျက်ဆီးပြီးကြောင်း ယနေ့ ရက်စွဲဖြင့် မူးယစ်ရဲတပ်ဖွဲ့ က ထုတ်ပြန်ကြေညာလိုက်သည်။
ထိုဖျက်ဆီးလိုက်သည့် ဘိန်းခင်းများသည် ပင်လောင်းမြို့နယ်တွင် ၈၁၇.၅ ဧက နှင့် ဖယ်ခုံမြို့နယ်တွင် ၃၅၇ ဧက တို့ကို ဖျက်ဆီးခဲ့ကြောင်း မူးယစ်ရဲတပ်ဖွဲ့ ထုတ်ပြန်ချက် အရ သိရသည်။
Photo by မူးယဈရဲတပျဖှဲ့
ထို့ကြောင့် တောင်ကြီးခရိုင်အတွင်း ဘိန်းခင်းဖျက်ဆီးမှု ဧက ၁၁၆၉ ရှိလာကြောင်း သိရသည်။
“ နှစ်တိုင်း ဒီချိန်ဆို သက်ဆိုင်ရာက ဘိန်းခင်း ဖျက်တယ်။ စိုက်တဲ့သူက စိုက်တာပဲ။ တခြား သီးနှံ စိုက်ပျိုးရင် ဈေးကွက်မရှိတာ။သီးနှံဈေးနှုန်းတွေ လမ်းပန်းတွေ ကောင်းအောင်မလုပ်ပေးနိုင်ရင်တော့ ဘိန်းစိုက်ပျိုးမှု က ဆက်ရှိနေမှာပါ” ဟု ပင်းလောင်းမြို့ ဒေသခံ စိုင်းဘ က သျှမ်းသံတော်ဆင့် သို့ပြောသည်။
ဘိန်းခင်းများ သွားရောက်ဖျက်ဆီးရာတွင် တပ်မတော်သားများ၊ ဌာနဆိုင်ရာဝန်ထမ်းများ၊ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ မှ တပ်ဖွဲ့ဝင်များ နှင့် ကျေးရွာနေ ပြည်သူများ ပူးပေါင်း ပါဝင်ခဲ့ကြောင်း ထုတ်ပြန်ချက်တွင်ရေးသားထားသည်။
လက်ရှိ သျှမ်းပြည် တွင် ဘိန်းခင်း အများဆုံး စိုက်ပျိုးသည့်မြို့နယ်သည် ပင်လောင်းမြို့နယ် ဖြစ်ကြောင်းသိရသည်။
သက်ဆိုင်ရာမှ နှစ်စဉ် ဘိန်းခင်း ဖျက်ဆီးမှု များရှိသော်လည်း ဘိန်းစိုက်ပျိုးမှုမှာ လျော့ကျသွားခြင်းမရှိသည့် အပေါ် သျှမ်းပြည်သူများ က ဝေဖန်မှုများရှိနေသည်။
မြန်မာ နိုင်ငံတွင် ကချင်၊ သျှမ်း၊ ချင်း နှင့် ကယားပြည် တို့တွင် ကုလသမဂ္ဂ မူးယစ်ဆေးဝါး နှင့် ရာဇဝတ်ဆိုင်ရာ ရုံး(UNODC) နှင့် ပူးပေါင်းကာ ဘိန်းအစားထိုး သီးနှံ စိုက်ပျိုးရေး စီမံကိန်း လုပ်ဆောင်လျက်ရှိသည်။
