သျှမ်းပြည်မြောက်ပိုင်း ကျောက်မဲမြို့နယ်အတွင်း အစိုးရတပ်မတော်နှင့် တအာင်း TNLA တပ်တို့ကြားတိုက်ပွဲဖြစ်ပွါးသဖြင့် ဒေသခံလူထု လမ်းခရီးပြတ်တောက်ကြန့်ကြာခဲ့ရကြောင်း သိရသည်။
နိုဝင်ဘာလ ၁၁ ရက် ယမန်နေ့က ည ၇ နာရီအချိန်ကစပြီး ကျောက်မဲမြို့နယ် ကွန်ကောက်အုပ်စု တော့ဖယ်ရွာအနီး အစိုးရတပ်နှင့် TNLA ကြား ပစ်ခတ်တိုက်ခိုက်မှုများဖြစ်ပွါးခဲ့သည့်အပြင် မိုင်းငေါ့မြို့နယ်ခွဲဘက်မှနေ၍ အစိုးရတပ်မှ လက်နက်ကြီးပစ်ခတ်သဖြင့် မိုင်းငေါ့ – ကျောက်မဲ ခရီးသွားလူထု ခရီးပြတ်တော့ကြန့်ကြာခဲ့ရကြောင်း မိုင်းငေါ့ဒေသခံ လုံးစိုင်းကပြောသည်။
“မနေ့က မနက်ပိုင်းကတည်းက အသံတွေကြားရတယ်။ တော့ဖယ်-ကွန်ကောက်ဘက်မှာပေါ့။ သေနတ်သံက ည ၇ နာရီလောက်မှာပိုမိုပြင်းထန်လာတယ်။ မိုင်းငေါ့ဘက်ကနေပစ်တဲ့အသံတွေလည်း မနေ့က ၇ လုံး ၈ လုံးလောက်ကြားရတယ်။ ဒီနေ့လည်းကြားရတယ်။ မိုင်းငေါ့-ကျောက်မဲအသွားအလာတောင်မရှိဘူး ။ ကထိန်လှည့်အလှူပြုချိန်ဗျာ ဒေသခံလူထု အလှူတောင်ကောင်းကောင်းမပြုရတော့ဘူး။ ပစ်ခတ်တိုက်ခိုက်နေကြတာနဲ့ ” ဟု ကုန်သည်တဦးလည်းဖြစ်သော အသက် ၆၀ ကျော်အရွယ်လုံးစိုင်းက ပြောသည်။
တအာင်းပြန်ကြားရေးဌာနကမူ အစိုးရတပ်မတော်သည် တပ်မ ၇၇နှင့် ၈၈ လက်အောက်ခံတပ်များပူးပေါင်းကာ တော့ဖယ်ရွာဘက်တွင်လှုပ်ရှားနေသော တအာင်းတပ်ဖွဲ့၏ တပ်မဟာ ၇၆၅ အား ပစ်ခတ်တိုက်ခိုက်သည် ဟုထုတ်ပြန်ထားသည်။ အစိုးရတပ်သည် ကိန်းလီရွာဘက်မှ အင်အားဖြည့်တင်းကာ တော့ဖယ်ရွာဘက်သို့တက်လာကြောင်း ယမန်နေ့ကတည်းက ပစ်ခတ်မှုမှာ ပစ်လိုက်ရပ်လိုက်ဖြင့် ဖြစ်ပွါးနေပြီး ယနေ့အချိန်အထိ ၂ ဘက်တင်းမာနေဆဲဖြစ်ကြောင်းလည်း ထုတ်ပြန်ထားသည်။
ကျောက်မဲမြို့နယ် ပြည်နယ်လွှတ်တော်အမတ် စိုင်းထွန်းဝင်းက – တိုက်ပွဲက ခုချိန်အထိ (နိုဝင်ဘာလ ၁၂ ရက် မွန်းလွဲ ၂ နာရီ ၃ နာရီခန့်အထိ) ပစ်ခတ်သံတချက်တချက်ကြားမိတယ်။ တဖက်ဘဲပစ်တဲ့အသံဘဲ ကျနော်ကြားမိတယ်။ ခုချိန်ထိတော့ စစ်ဘေးရှောင်မရှိသေးပါဘူး- ဟု သျှမ်းသံတော်ဆင့်အားပြောသည်။
အလားတူ ကွတ်ခိုင်မြို့နှင့်နမ့်ဆန်မြို့တို့ဘက်တွင်လည်းတိုက်ပွဲများဖြစ်ပွါးရာ အစိုးရတပ်ဖက်မှ လက်နက်ကြီးပစ်ခတ်မှုရှိခဲ့ကြောင်း နမ့်ဆန်မြို့နယ် လွယ်ပိန်းရွာဘက်တွင်လူထုနေအိမ်ပေါ် လက်နက်ကြီးကျမှုရှိခဲ့ကြောင်း သိရသည်။
Leave a Comments