သျှမ်းပြည် တောင်ကြီးမြို့ တွင် ကျင်းပသည့် တန်ဆောင်တိုင်ပွဲတော်တွင် လွှတ်တင်မည့် မီးပုံးပျံ အရေအတွက်သည် ယခင်နှစ်ထက် နည်းကြောင်း သတင်းရရှိသည်။
ယခုနှစ် တောင်ကြီး တန်ဆောင်တိုင် ပွဲတော်တွင် လွှတ်တင်မည့် မီးပုံးပျံ အရေးအတွက်သည် ၃၆၅ လုံးရှိပြီး၊ တန်ဆောင်တိုင် ပွဲတော်ကို နိုဝင်ဘာ ၄ရက်နေ့မှ ၁၂ရက်ထိ အဝေရာ မီးပုံးပျံကွင်းတွင် ကျင်းပသည်။
“ ဒီနှစ် မီးပုံးပျံ က မနှစ်က ထက်နည်းတယ်။ နေ့လွှတ် အရုပ် ကပိုများတယ်။ ညလွှတ်မီးပုံးပျံ ကတော့ လျော့လာတယ်။ ပွဲတော်နေ့ကလည်း တရက်လျော့လာတယ်” ဟု မီးပုံးပျံ ပညာရှင် ဥက္ကဌ ဒေါက်တာ သန်းဝင်း က သျှမ်းသံတော်ဆင့် သို့ ပြောသည်။
ယခုနှစ် နေ့လွှတ် အရုပ် မီးပုံးပျံသည် တရက်လျှင် အလုံး ၄၀ လွှတ်တင်မည့်ဖြစ်ကြောင်း၊ ယခင်နှစ်တွင် နေ့လွှတ် အရုပ်မီးပုံးပျံသည် တရက်လျှင် အလုံး ၃၀ သာ ရှိကြောင်း ဒေါက်တာ သန်းဝင်းက ပြောသည်။
တန်ဆောင်တိုင် ပွဲတော် ကျင်းပသည့် ရက်ကို ယခင်နှစ် ထက် တရက်လျော့ကျသဖြင့် မီးပုံးပျံ လွှတ်တင်ရန် အတွက် အခက်အခဲများစွာ ရှိကြောင်း တဖက်တွင်လည်း ရာသီဥတု အခြေအနေကို ကြည့်ကာ လွှတ်တင်ရကြောင်းလည်း ဒေါက်တာ သန်းဝင်း က ရှင်းပြသည်။
“ အခုနှစ် ညမီးပုံးလွှတ်တဲ့လူတွေက အရင်ကလို အချိန်မဆွဲတော့ဘူး။ ရာသီဥတု ကောင်းတာနဲ့ ချက်ချင်းလွှတ်တယ်။ ဒါပေမယ့် ပွဲဝင်လာတဲ့အချိန် လူများရင် သူတို့ ဝင်ဖို့ ခက်မယ်။ နေရာ အခက်အခဲကြောင့် အချိန်ကြာမယ်” ဟုလည်း ဒေါက်တာ သန်းဝင်း ကဆိုသည်။
ထို့ကြောင့် ရာသီဥတု မကောင်းပါက အခြေအနေကြည့်ပြီး မီးပုံးပျံလွှတ်တင်ရန် တရက် ထပ်မံတိုးပေးမည်ဟုလည်း သိရသည်။
တောင်ကြီးမြို့ တန်ဆောင်တိုင် မီးပုံးပျံ ယှဉ်ပြိုင်မှုကို အနယ်နယ်အရပ်ရပ်မှ လာရောက်ယှဉ်ပြိုင်ကြောင်း၊ လာရောက်ယှဉ်ပြိုင်သည့် မြို့များမှာ တာချီလိတ်၊ လွိုင်ကော်၊ ရွာငံ၊ ပင်းတယ။ လွိုင်လင် နှင့် ညောင်ရွှေ တို့လည်း ပါဝင်ကြောင်းသိရသည်။
ယမန်နှစ် တွင် တောင်ကြီးမြို့ တန်ဆောင်တိုင်ပွဲတော်တွင် မီးပုံးပျံ အလုံးရေ အရေအတွက် ၄၁၄လုံး လွှတ်တင်နိုင်ခဲ့သည်။
