Thursday, May 30, 2024

တာချီလိတ်မြို့နယ် သိမ်းဆည်းခံထားရသည့် လယ်ယာမြေများ အမြန်ပြန်ပေးရန် တောင်းဆို

Must read

သျှမ်းပြည် အရှေ့ပိုင်း တာချီလိတ်မြို့နယ် ဟောင်လိတ် (ပေါက်ဆေခမ်း) ကျေးရွာတွင် သိမ်းဆည်းခံထားသည့် မြေယာများ ပြန်ပေးရန် လယ်သမားများက တောင်းဆိုလိုက်ကြောင်း သတင်းရရှိသည်။

Photo by တာချီလိတ်မြို့နယ် ဟောင်လိတ် ဒေသခံ/သိမ်းဆည်းခံထားရသည့် လယ်ယာမြေများ

မြန်မာ့တပ်မတော် မှ လွန်ခဲ့သည့် ၁၉၉၈-၁၉၉၉ ခုနစ်တွင် တာချီလိတ်မြို့ စက်မှုဇုံ ပြုလုပ်ရန် အတွက် ဟောင်လိတ် ကျေးရွာ ရှိ လယ်ယာမြေ ဧက ၆၀၀ကျော် သိမ်းဆည်ခဲ့ရာ လက်ရှိ အချိန်ထိ စက်မှုဇုံ မပြုလုပ်သေးသဖြင့် သိမ်းဆည်းထားသည့် လယ်မြေများ ပြန်လည် ပေးရန် ဒေသခံများ တောင်းဆိုရခြင်း ဖြစ်ကြောင်း ဟောင်လိတ် ကျေးရွာ မှ ဒေသခံများ က ပြောဆိုလိုက်သည်။

သိမ်းဆည်းထားပြီး အသုံးပြု မှု မရှိသည့် လယ်ယာမြေ များကို ဒေသခံများထံ ပြန်လည် ပေးအပ်မည် ဟု လွန်ခဲ့သည့် ၂၀၁၈ ခုနစ် သျှမ်းပြည်နယ် အစိုးရ ဝန်ကြီးချုပ် ဒေါက်တာ လင်းထွဋ် ကလည်း လယ်သမားများကို ဂတိပေးဆိုခဲ့သော်လည်း လက်ရှိ အချိန်ထိ ဒေသခံများ လယ်ယာမြေ ပြန်မရသေးပေ။

“ ကျနော်တို့ကို ဧက ၃၀၀ကျော် ပြန်ပေးမယ်။ နောက် နစ်နာကြေးလည်း ပေးမယ်လို့ပြောခဲ့တယ်။ နောက် ဧက ၁၀၀ကျော်ကို ဟုန်ပန်းကုမ္ပဏီကို ရောင်းဖို့ပြောတယ်။ ကျနော်တို့ လက်မခံဘူး။ တချု့ိလယ်ကတော့ မြေဖို့ထားတာတွေရှိတယ်” ဟု ပေါက်ဆေခမ်း ကျေးရွာ မှ စိုင်းမွန်းဆိုင် က သျှမ်းသံတော်ဆင့် သို့ပြောသည်။

Photo by တာချီလိတ်မြို့နယ် ဟောင်လိတ် ဒေသခံ/သိမ်းဆည်းခံထားရသည့် လယ်ယာမြေများ

လက်ရှိမှာ ဟုန်ပန်းကုမ္ပဏီ ကို ရောင်းပေးရန် ဧက ၁၀၀ကျော်နှင့် ပတ်သက်ပြီး ဒေသခံ လယ်သမားများ သဘောမတူညီကြောင်း၊ ထို့ကြောင့် အစိုးရ အနေဖြင့် လယ်ယာမြေ ကိစ္စ အမြန်ဖြေရှင်းပေး စေချင်ကြောင်းလည်း စိုင်းမွန်းဆိုင် က ပြောသည်။

“ အခုထိ လျော်ကြေးငွေ ဘာမှ မပြောသေးဘူး။ သက်ဆိုင်ရာ ကလည်း ဘာမှ မပြောသေးဘူး။ ငြိမ်နေတယ်။ကျနော်တို့ ကတော့ ရှင်းရှင်းလင်းလင်းသိချင်တယ်” ဟု စိုင်းမွန်းဆိုင် ကဆိုသည်။

ဒေသခံ လယ်သမားများအနေဖြင့် ၂၀၁၂ ခုနစ် သမ္မတဟောင်း ဦးသိန်းစိန် လက်ထက် ကတည်းမှ တောင်းဆိုခဲ့ကြပြီး လက်ရှိ အစိုးရ သစ်လက်ထက်တွင်လည်း ဆက်လက်တောင်းဆိုခဲ့ရာ ထူးခြားလာခြင်းမရှိကြောင်း ပေါက်ဆေခမ်း ကျေးရွာ မှ စိုင်းလုံ က သျှမ်းသံတော်ဆင့် သို့ ပြောသည်။

“ အရင် က တောင်းလို့ မရတော့ ကျနော်တို့ ၂၀၁၂ ခုနစ်က စပြီး ဆက်တိုက်တောင်းလာတယ်။ သျှမ်းပြည် ဝန်ကြီးကလည်း ပေးမယ်လို့ပြောပြီး အခု ထိဘာမှ မထူးဘူး။ ကျနော်တို့ ပြည်နယ် ဝန်ကြီးကို စာ မယ်။ အခု ကျေးရွာ ဥက္ကဌလည်း ဘာမှမပြောဘူး။ ပြည်သူတွေကတော့မျှော်နေရတယ်” ဟု စိုင်းလုံ က ဆိုသည်။

တာချီလိတ်မြို့နယ် ပေါက်ဆေခမ်း ကျေးရွာ လယ်ယာမြေ ဧက ၃၀၀ကျော် ကို ဒေသခံ ပြည်သူများ ထံ ပြန်လည် ပေးအပ်ပြီး၊ တချို့ လယ်ယာမြေ များကို အစိုးရ က သိမ်းဆည်းကာ လျော်ကြေးငွေများ နစ်နာကြေး ငွေများ ပေးသွားမည်ဟု ပေါက်ဆေခမ်း ကျေးရွာ ဥက္ကဌ စိုင်းကျုံးက သျှမ်းသံတော်ဆင့် သို့ ပြောသည်။

Photo by တာချီလိတ်မြို့နယ် ဟောင်လိတ် ဒေသခံ/သိမ်းဆည်းခံထားရသည့် လယ်ယာမြေများ

“ ဧက ၃၀၀ ပြန်ပေးမယ်။ နောက် ကျန်တဲ့လယ်ယာမြေတွေကို တဧက ၁၅၀ တသိန်းနဲ့ လျော်ကြေးပေးမယ်။ ဒါပေမယ့် ဒေသခံတွေက တဧက ကို ထိုင်းဘတ် ၂သန်း( မြန်မာငွေ သိန်းတထောင်) လိုချင်တယ်” ဟု စိုင်းကျုံးက ဆိုသည်။

ဆုံးရှုံးနစ်နာသွားသည့် လယ်ယာမြေများ အတွက် အစိုးရ၊ ဟိုပန်း ကုမ္ပဏီ နှင့် လယ်သမားများတွေ့ဆုံကာ နစ်နာလျော်ကြေး ပေးဆောင်သွားမည် ဟုလည်း သိရသည်။

လက်ရှိအခြေအနေတွင် သိမ်းဆည်းခံရသည့် လယ်ယာမြေများကို အစိုးရ အနေဖြင့် အမြန်ဆုံး လာရောက် ဖြေရှင်းပေးရန် လယ်သမားများက တောင်းဆိုလိုက်သည်။

Leave a Comments

- Advertisement -spot_img

Latest article