သျှမ်းပြည် မြောက်ပိုင်း ကွတ်ခိုင်မြို့ နယ် အတွင်း ယနေ့မနက် ပိုင်းတွင် မြန်မာ့တပ်မတော် နှင့် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) တို့ တိုက်ပွဲ ဖြစ်ပွားမှုကြောင့် ကားလမ်းခေတ္တ ပိတ်ထားရ ကြောင်း သတင်းရရှိသည်။
ယနေ့ အောက်တိုဘာ ၂၅ ရက် မနက် ၈နာရီခွဲ တွင် ကွတ်ခိုင်မြို့ နယ် လွိုင်ဆမ်ဆစ်တောင် အနီးတဝှိက်တွင် TNLA တပ်ဖွဲ့ ရှိနေသည်ဟု သတင်းရသဖြင့် မြန်မာ့တပ်မတော်မှ သွားရောက်ပစ်ခတ်ခြင်းဖြစ်ကြောင်း ကွတ်ခိုင်ဒေသခံများ ပြောပြချက် အရ သိရသည်။
“ ဒီမနက် ၈ နာရီ နဲ ၉ နာရီ ခွဲကြားမှာ ပစ်ခတ်မှု ဖြစ်သွားတာပါ။ ။ စစ်ရှောင်ကတော့ ခဏပဲရှောင်တယ်။ ပြန်သွားပြီ။ လွိုင်ဆမ်ဆစ် အောက်က ရွာ မှာ လက်နက်ကိုင် ရှိတယ်ဆိုပြီး တပ်က သွားတယ်။ အသံ နည်းနည်း ထွက်လာတာပါ” ဟု ကွတ်ခိုင်မြို ဂရုဏာ လူမှုကူညီရေး အသင်းမှ ဦးထွန်းအောင် က သျှမ်းသံတော်ဆင့် သို့ ပြောသည်။
ယနေ့ ပစ်ခတ်မှုကြောင့် မနက်ပိုင်းတွင် ခေတ္တယာယီ ကားလမ်းပိတ်ထားကြောင်း၊ လက်ရှိမှာ ပုံမှန် ပြန်လည်သွားလာနေကြောင်းလည်း ဦးထွန်းအောင် က ပြောသည်။
“ ဒီနေ့ ပစ်ခတ်မှု မှာ လူထိတယ်လို့ ကြားတယ်။ ဒါပေမယ့် စုံစမ်းနေတုန်းပါ။ သတင်းပဲ ကြားရတယ်” ဟု ဦးထွန်းအောင် က ဆိုသည်။
အဆိုပါ ယနေ့ မနက် ပိုင်း ကွတ်ခိုင်မြို့နယ် လွိုင်ဆမ်ဆစ် တောင် အနီး၌ ဖြစ်ပွားသည့် တိုက်ပွဲသည့် မြန်မာ့တပ်မတော်ဘက်မှတဖက်သက် ပစ်ခတ်ခြင်းဖြစ်ကြောင်း၊ မြန်မာ့တပ်မတော် ဘက်မှ TNLAတပ် ရှိသည့် နေရာကို ပစ်ခတ်ကြောင်း TNLA မှ ပြောရေး ဆိုခွင့်ရှိသူ ဗိုလ်မှူးကြီး တားအိုက်ကျော် က သျှမ်းသံတော်ဆင့် သို့ပြောသည်။
“ဒီမနက် ကွတ်ခိုင် လွိုင်ဆမ်းဆစ်နားက နမ့်ဟွေ တောင်ကြောတလျောက် ကျနော်တို့ ရှိတဲ့ ဘက်ကို လှမ်းပစ်တာပါ။ တပ်က တဖက်သတ်ပစ်တာပါ။တိုက်ပွဲ မဟုတ်ပါဘူး” ဟု တားအိုက်ကျော်က ဆိုသည်။
မြန်မာ့တပ်မတော် နှင့် TNLA သည် ယမန်နေ့ (အောက်တိုဘာ ၂၄) တွင် တိုက်ပွဲ ၃နေရာဖြစ်ပွားခဲ့ကြောင်း သိရသည်။
ထိုတိုက်ပွဲဖြစ်ပွားသည့်နေရာများမှာ နမ့်ခမ်းမြို့နယ် နမ့်ဟောမ်ရွာတွင် မနက် ၈နာရီတွင် တကြိမ်၊ ကွတ်ခိုင်မြို့နယ် ပန်လုံရွာ နှင့် တာထီးရွာ ကြားတွင် နေ့လည် ၁နာရီတွင် တကြိမ် နှင့် ညနေ၅နာရီ ကျော်တွင် ကွတ်ခိုင်မြို့ နယ် နမ့်ဟွေရွာ တွင် တကြိမ် တရက်တည်း ၃နေရာ ဖြစ်ပွားခဲ့ကြောင်း TNLA မှ တားအိုက်ကျော် က ပြောသည်။
ယနေ့ ကွတ်ခိုင်မြို့ နယ် အတွင်း ဖြစ်ပွားသည့် တိုက်ပွဲတွင် မြန်မာ့ တပ်မတော် ဘက်မှ တင့်ကားများ ဖြင့်ကွတ်ခိုင်-မန္တလေး ပြည်ထောင်စုလမ်းမ ပေါ်တွင် သွားလာနေကြောင်း ဟု ဒေသခံများပြောဆိုချက် အရ သိရသည်။
ထို့ပြင် တချို့ ကွတ်ခိုင်- မန္တလေး ပြေးဆွဲနေသည့် ကားသမားပြောပြချက် အရ ယနေ့ မနက်ပိုင်းတွင် TNLA တပ် မှ လွိုင်ဆမ်ဆစ် တောင် အနီးတဝှိက်တွင် ဆက်ကြေး ကောက်ခံမှု ရှိကြောင်း လည်း ပြောဆိုကြသည်။
“ တချို့ကားသမားတွေကို TNLA တပ်သားတွေ ပိုက်ဆံလာတောင်းတယ်။ ဘယ်နှကား တောင်းခံလဲတော့မသိဘူး။ ကျနော် ကြားပဲ ကြားရတာပါ။ ကျနော်ကတော့ မပေးလိုက်ရဘူး” ဟု ယနေ့ ကွတ်ခိုင် မှ မန္တလေး သို့ သွားသည့် ကားသမား စိုင်းလှအောင် က သျှမ်းသံတော်ဆင့် သို့ ပြောသည်။
မြောက်ပိုင်း မဟာမိတ် ၃ဖွဲ့ မှ ၂၀၁၉ နှစ်ကုန်ထိ အပစ်ရပ်ရန် စက်တင်ဘာ ၂၀ ရက်တွင် ကြေညာပြီးနောက် မြန်မာ့တပ်မတော် နှင့် TNLA တို့ တိုက်ပွဲ ၁၀ကြိမ် ဖြစ်ပွားခဲ့ကြောင်း TNLA ၏ ထုတ်ပြန်ချက် အရ သိရသည်။
ထို့ပြင် မြောက်ပိုင်း မဟာမိတ် (၄)ဖွဲ့ နှင့် အစိုးရ၊ တပ်မတော် တို့ ပဏာမ အပစ်ရပ် နှစ်ဦးသဘောတူ ( Bilateral) လက်မှတ်ရေးထိုး ရန် တွေ့ဆုံဆွေးနွေးမှုကို နိုဝင်ဘာ လ အတွင်း ရွှေ့ဆိုင်းလိုက်ကြောင်း သိရသည်။
Leave a Comments