သျှမ်းပြည် မြောက်ပိုင်း သီပေါမြို့နယ် အတွင်းရှိ နမ္မမြစ်ပေါ် ရေကာတာ တည်ဆောက်မှုအား ဆန့်ကျင်ကန့်ကွက်သူဒေသခံများ၏ လက်မှတ်များအား ကောက်ယူကာ သက်ဆိုင်ရာသို့ပေးပို့သွားမည် ဟု သိရသည်။

သီပေါမြို့နယ် အတွင်းရှိ နမ္မမြစ်ပေါ် ရေကာတာ တည်ဆောက်ရန်ကြိုးစားနေသော Unienergy ကုမ္ပဏီ မှဒေသခံ ပြည်သူအား တွေ့ဆုံရန်ကြိုးစားနေမှုကို ကန့်ကွက်သည့် အနေဖြင့် ဒေသခံများထံလက်မှတ်ကောက်ယူနေကြောင်း နမ္မဒေသခံ သျှမ်းလူငယ်ခေါင်းဆောင် စိုင်းသိန်းမြင့် က သျှမ်းသံတော်ဆင့် သို့ ပြောသည်။

“ အခုက ကုမ္ပဏီတွေက ကျေးရွာတွေမှာ သွားပြီးတွေ့ဆုံဖို့ ကြိုးစားနေတယ်။ ဒါကြောင့် မနေ့က ကျနော်တို့ ဒေသခံတွေဆီရောက်သွားတော့ သူတို့လည်း အလိုမရှိကြောင်းပြောကြတာနဲ့ ကုမ္ပဏီ ကိုဆန့်ကျင်ကန့်ကွက်တဲ့ လက်မှတ်ကောက်လာတာပါ” ဟု စိုင်းသိန်းမြင့် ကဆိုသည်။

လက်ရှိတွင် နမ္မမြစ်ချောင်း တလျှောက်ရှိ ကျေးရွာများထံမှ ကန့်ကွက်လက်မှတ် ၅၀၀ ကျော် ကောက်ခံရရှိပြီး၊ ကျန်ကျေးရွာများထံမှ လက်မှတ်ဆက်လက်ကောက်ယူသွားမည် ဟု စိုင်းသိန်းမြင့်က ပြောသည်။

“ နမ္မမြစ် ကနေ နမ္မတူ မြစ် ဘေးတလျှောက်အထိ ကျေးရွာတွေကို ဆက်ပြီး ကောက်သွားမယ်” ဟု သူက ဆက်လက်ပြောသည်။

ထို ကောက်ခံရရှိသည့် ကန့်ကွက်လက်မှတ်များကို နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်၊ သျှမ်းပြည်နယ် လျှပ်စစ်ဝန်ကြီးဌာန၊ လွှတ်တော်ကိုယ်စားလှယ်များ နှင့် သျှမ်းပြည် တိုးတက်ရေးပါတီ၊ သျှမ်းပြည်တပ်မတော်(SSPP/SSA) တို့ဆီ ပေးပို့သွားမည်ဟု သိရသည်။

“ကျနော်တို့ ရွာကတော့ ရေကာတာ တည်ဆောက်မယ့် ဘယ်အဖွဲ့ကိုမဆို ကန့်ကွက်သွားမယ်။ တွေ့ဆုံဖို့လည်းလက်မခံဘူး” ဟု နမ္မ ကျေးရွာ အုပ်ချုပ်ရေးမှူး ဦးစိုင်းပီး က ပြောသည်။

သျှမ်းပြည် မြောက်ပိုင်း သီပေါမြို့ နယ် နမ္မချောင်းပေါ်တွင် လျှပ်စစ်ဓါတ်အား ၂၅ မီဂ္ဂါဝပ် ထွက်ရှိမည့် ရေကာတာ တည်ဆောက်ရေး စီမံကိန်းကို ဒေသခံလူထု ကန့်ကွက်သည့် ကြား တည်ဆောက်နိုင်ရေး အတွက် လေ့လာ ဆန်းစစ်မှု များပြုလုပ်ရန် MOU ကို ယခုနှစ် သြဂုတ် ၁၄ ရက်နေ့ တွင် လက်မှတ်ရေးထိုးခဲ့သည်။

ရေကာတာ တည်ဆောက်မည့် နေရာသည် ၂၀၁၆ ခုနှစ်တွင် မြန်မာ့ တပ်မတော် နှင့် တိုင်းရင်းသား လက်နက်ကိုင် များအကြား မကြာခဏ ပဋိပက္ခ ဖြစ်ပွားသည့် နေရာဖြစ်သည်။