သျှမ်းပြည် သီပေါမြို့နယ်တွင် နိုင်ငံသားစိစစ်ရေးကတ် မှတ်ပုံတင်ပြုလုပ်ရန် ငွေကျပ် ၁ သိန်းအထိ ပေးဆောင်နေရကြောင်း စုံစမ်းသိရသည်။
မတ်လ ပထမပတ်အတွင်းက သီပေါမြို့နယ် နမ့်ရမ်းကျေးရွာအုပ်စုတွင် စစ်ကောင်စီ လက်အောက်ခံ လူဝင်မှုကြီးကြပ်ရေး လဝက ဝန်ထမ်းများနှင့် ကျေးရွာအုပ်စု ထွေအုပ်စာရေးတို့ ပူးပေါင်းပြီး နိုင်ငံသားစိစစ်ရေးကတ် မှတ်ပုံတင် ပျက်စီး၊ ပျောက်ဆုံးနှင့် အသစ်ပြုလုပ်ရန် ဒေသခံများထံမှ ငွေကျပ် ၁ သိန်းအထိ တောင်းခံနေကြောင်း သီပေါဒေသခံများက ပြောသည်။
“ ထွေအုပ်က အုပ်စုစာရေးနဲ့ လဝက လေးငါးယောက် ပေါင်းပြီးတော့ တစ်သုတ်ပြီးတစ်သုတ် လုပ်စားနေတာ။ ရွာမှာ မှတ်ပုံတင် လုပ်ချင်တဲ့လူတွေကို အုပ်စုစာရေးက နာမည်စာရင်းနဲ့ စာရွက်စာတမ်း ကောက်သွားပြီးတော့ လဝကရုံးကို ယူသွားပေးတာ။ ပျောက်တာ၊ နာမည်မှားတာ ပြင်ချင်တာပဲဖြစ်ဖြစ်၊ တယောက်ကို တစ်သိန်းနှုန်းနဲ့ တောင်းတာ”ဟု သီပေါမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
သီပေါမြို့နယ် နမ့်ရမ်းကျေးရွာအုပ်စုရှိ ရွာများတွင် လက်ရှိလုပ်ပေးသည့် မှတ်ပုံတင်မှာ စမတ်ကတ် မဟုတ်သေးဘဲ ယခင်ကဲ့သို့ မှတ်ပုံတင် ပန်းရောင်ကတ် အမျိုးအစားသာ ဖြစ်ကြောင်း သီပေါဒေသခံများထံမှ သိရသည်။
“၁ ရက် နေ့တုန်း လာတာ။ မှတ်ပုံတင်ရရင် သူတို့ဖုန်းဆက်ပြီး သီပေါမှာ သွားယူရမယ်လို့ ပြောတာ။ ရွာကတော့ လူ ၂၀ နီးပါးလောက် ရှိတယ်။ မှတ်ပုံတင်လုပ်တာ။ ရွာကလူတွေလည်း ရုံးဆိုရင် ကြောက်တတ်တော့၊ ရပ်ကျေးစာရေးနဲ့ လဝက ပေါင်းပြီး ၁ ယောက်ကို ၁ သိန်းနဲ့ လုပ်စားနေတာ။ အုပ်စု ဥက္ကဋ္ဌ ရှိတဲ့ ရွာတွေဆိုရင် လာတယ်”ဟု သီပေါမြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဖေဖော်ဝါရီ နောက်ဆုံးပတ်က သီပေါမြို့သို့ အရှေ့မြောက်တိုင်း စစ်ဌာနချုပ် ရမခတိုင်းမှူး သီပေါမြို့သို့ လာရောက်စဉ်ကလည်း သီပေါမြို့ပေါ် ရပ်ကွက်များတွင် သန်းခေါင်စာရင်း ကောက်ယူရန်နှင့် ဧည့်စာရင်း စစ်ဆေးရန်တို့ကို ပြောဆိုခဲ့ကြောင်း သီပေါဒေသခံများထံမှ သိရသည်။
