သျှမ်းပြည်တောင်ပိုင်း တောင်ကြီးမြို့တွင် နိုင်ငံခြားကုန်ပစ္စည်းများ လက်လီ၊လက်ကား အရောင်း ကုမ္ပဏီများ ယခုရက်ပိုင်း ပိတ်သိမ်းလိုက်ရကြောင်း စုံစမ်းသိရသည်။

စစ်အာဏာသိမ်းပြီး တနှစ်သာ ကာလအတွင်း စစ်ကောင်စီ၏ မတည်မြဲသည့် မူဝါဒများနှင့် အမေရိကန် ဒေါ်လာ ပြဿနာကြောင့် တောင်ကြီးမြို့ရှိ ကုမ္ပဏီများပိတ်သိမ်းလိုက်ရကြောင်း ကုမ္ပဏီဝန်ထမ်းများထံ သိရသည်။

တောင်ကြီးမြို့ ရှိ နိုင်ငံခြားကုန်ပစ္စည်းများ လက်လီ၊လက်ကားရောင်းသည့် ကုမ္ပဏီများဖြစ်သော လူသုံးကုန်ပစ္စည်းများ ၊ အိမ်သုံးပစ္စည်းများ နှင့် စားသုံးကုန်ပစ္စည်း စသည့် ဇူလိုင် ၂၁ ရက်မှ စ၍ အရောင်း ခေတ္တပိတ်ဆိုင်းထားကြောင်းလည်း အသက် ၂၅ နှစ်အရွယ်ရှိ ကုမ္ပဏီဝန်ထမ်း အမျိုးသား က သျှမ်းသံတော်ဆင့်ကို ပြောသည်။

စစ်ကောင်စီ၏ သွင်းကုန်ပို့ကုန် မူဝါဒ ပြောင်းလဲမှုနှင့် အမေရိကန် ဒေါ်လာ မတည်ငြိမ်မှုများကြောင့် ကုမ္ပဏီများ ပိတ်ဆိုင်းရကာ ဝန်ထမ်းများလည်း အလုပ်လက်မဲ့စတင်ဖြစ်လာကြသည်။

“ ကုမ္မဏီတွေ ဒီနေ့ (ဇူလိုင် ၂၁) ရက် ကစပြီး နားထားကြပြီ လကုန်မှ ပြန်ဖွငံ့်မယ်ထင်တယ်။ အရောင်းတွေ ခဏနားထား တာပေါ့။ ကျနော်တို့ဆိုရင် လစာတောင် ရတာ ကွာဟသွားတယ်။ အရင်ကလစာ (၅၀၀, ၀၀၀) ကျပ် နီးပါး ရတယ်။ ဒီလတော့ (၂၀၀,၀၀၀)ကျပ် လောက်ပဲ ရတော့မယ် ထင်တယ်။ လစာတွေအတွက်တော့ စိုးရိမ်ရတယ်” ဟု အိမ်သုံးပစ္စည်းရောင်းသည့် ကုမ္ပဏီမှ ဝန်ထမ်း အမျိုးသားက ဆိုသည်။

လက်ရှိ ကုမ္ပဏီများသည် ဒေါ်လာစျေးနှုန်းမြင့်တက်မှုကြောင့် အရောင်းအဝယ်ရှုံးသဖြင့် ကုမ္ပဏီကို ယာယီပိတ်လိုက်ရခြင်းဖြစ်ကြောင်းကုမ္ပဏီပိုင်ရှင်များက ဝန်ထမ်းများကို ပြောဆိုခဲ့သည်။

ထို ယာယီ ပိတ်ထားသည့် ကုမ္ပဏီမှ ဝန်ထမ်းများကို လစာ ၆၀ ရာခိုင်နှုန်းထိ ပေးဆောင်သွားမည် ဖြစ်ကြောင်း သိရသည်။

ထိုသို့ ကုမ္ပဏီများ ယာယီပိတ်ထားခြင်းအပေါ် ဝန်ထမ်းများ အလုပ်လက်မဲ့ ဖြစ်သွားမည်ကို စိုးရိမ်နေကြသည်။

“ အခုမြန်မာနိုင်ငံက စီးပွားရေးတွေ ပြတ်လုနီးပါးပါပဲ။ တကယ်လို့ ဒီကုမ္ပဏီမှာ မလုပ်ချင်တော့လို့ တခြားကုမ္ပဏီဆီမှာ ပြောင်းလို့ရတယ်။အခုက ကုမ္ပဏီတစ်ခုတည်း ဖြစ်တာမဟုတ်ဘူး။ ကုမ္ပဏီတိုင်းဖြစ်နေတာ အဆင်မပြေဘူးလေ။ ဝန်ထမ်းတွေလည်း အလုပ်လက်မဲ့ဖြစ်သွား နိုင်တယ် “ ဟု၎င်းက ဆိုသည်။

နယ်စပ်ဖြတ်ကျော်မှု၊ ပုံမှန် ကုန်သွယ်မှု နည်းလမ်းဖြင့် အမေရိကန်ငွေကြေးအသုံးပြုရမည်ဟုလည်း စစ်ကောင်စီ လက်အောက်ခံ စီးပွားရေးနှင့် ကူးသန်းရောင်းဝယ်ရေးက ဆိုထားသည်။

ထို့အပြင် စစ်ကောင်စီမှ ပို့ကုန်တင်ပို့မှု ဒေါ်လာငွေဖြင့် ပြောင်းလဲသတ်မှတ်လိုက်ပြီးနောက် တစ်ဒေါ်လာလျှင် မြန်မာကျပ်ငွေ (၁၈၅၀)ကျပ် ဖြင့် သတ်မှတ်နှုန်းထားကြောင်း သိရသည်။

စစ်အာဏာသိမ်းပြီးနောက်ပိုင်း စစ်ကောင်စီလက်အောက်ခံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန မှ စနစ်အမျိုးမျိုးပြောင်းလဲမှုကြောင့် ကုန်သည်များ အရှုံးပေါ်လာကြသည်။