သျှမ်းပြည် မြောက်ပိုင်း သိန္နီမြို့အတွင်း   ယနေ့မနက်ပိုင်းက  ပစ်ခတ်မှုဖြစ်ပွားရာ လူနေအိမ်အပေါ်လက်နက်ကြီးကျည်များကျရောက်ကာ   အရပ်သား ၆ ဦးထက်မနည်း ဒဏ်ရာရ  ကြောင်းသိရသည်။

အောက်တိုဘာလ ၉ ရက် ယနေ့မနက် ၆ နာရီခွဲမှ ၇ နာရီအချိန်အထိ  တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)နှင့် မြန်မာ့တပ်မတော် တို့ သိန္နီမြို့လယ်ခေါင်တွင်  ပစ်ခတ်ခဲ့ကြခြင်းဖြစ်သည်။

လက်နက်ကြီးများပစ်ခတ်မှုကြောင့် အရပ်သား ၆ ဦး ဒဏ်ရာရရှိပြီး၊ မြန်မာ တပ်မတာ်မှ ၂ ဦး ကျဆုံးခဲ့ကြောင်း သိန္နီမြို့နယ် ပြည်သူ့လွှတ်တော် ကိုယ်စားလှယ် စိုင်းဦးခမ်း က သျှမ်းသံတော်ဆင့် သို့ ပြောသည်။

“မြို့လယ်ခေါင် မှာ ဖြစ်တာ။ မြန်မာ့တပ်မတော် ယာဉ်တန်းကို TNLA စောင့်ပြီးပစ်တာလို့သိရတယ်။ မြန်မာ့တပ်မတော် ကတော့ ၂ ယောက်သေတယ်။  အရပ်သား ၆ ဦး ကိုတော့  သိန္နီဆေးရုံကို ပို့ထားတယ်” ဟု စိုင်းဦးခမ်း က ဆိုသည်။

လက်နက်ကြီးသည် သိန္နီမြို့ ဈေးအနီး ရဲစခန်းနှင့်ကပ်လျက် ရပ်ကွက် ၂ ဟိုနောင်ရှိ ဒေါ်ပါယဉ်၏ နေအိမ်ပေါ်သို့လည်းကောင်း၊ ဈေးအရှေ့ဘက်ရှိ ရပ်ကွက် ၁ အတွင်း  ဒေသခံများ၏နေအိမ် ၅ လုံးသို့လည်းကောင်း၊ တပေါင်းပွဲကျင်းပသည့်ကွင်းအတွင်းသို့လည်းကောင်းကျရောက်ခဲ့ပြီး   ဒေသခံလူထု ၆ ဦး  ထိခိုက်ဒဏ်ရာရရှိခဲ့သည်။

အဆိုပါလက်နက်ကြီးကျည်များသည် TNLA ဘက်မှ ပစ်ခတ်သည်ဟု ဒေသခံများပြောဆိုနေကြသော်လည်း မည်သည့်အဖွဲ့လက်နက်ဖြစ်သည်ကို  သျှမ်းသံတော်ဆင့်မှ သီးခြားအတည်ပြုချက် မရသေးပေ။

သိန္နီမြို့နယ် ဒေသခံတဦးကလည်း – “ပစ်ခတ်သံတွေ ထွက်နေချိန်မှာ  လက်နက်ကိုင်အဖွဲ့တဖွဲ့ကလည်း CB ဘဏ်ကို ဖောက်ထွင်းတယ်လို့ကြားတယ်။ ဘယ်လောက်ပါသွားလဲတော့မသိရသေးဘူး။ လူတွေက ကြောက်လှန့်ပြီး နေအိမ်ကနေမထွက်ရဲသေးတော့အသေးစိတ်လည်းမသိရသေးဘူးဖြစ်နေလို့လေ ” – ဟု သျှမ်းသံတော်ဆင့်အားပြောသည်။

လက်ရှိတွင်မူ သိန္နီမြို့မြောက်ဘက် မြို့ပြင်သို့ မြန်မာ့တပ်မတော်မှ အင်အားဖြည့်တင်း လိုက်လံသွားကြောင်း ၊ပစ်ခတ်သံမှာ ငြိမ်သွားပြီဖြစ်သော်လည်းဒေသခံ များ စိုးရိမ်ထိတ်လန့်မှု ဖြစ်နေပြီး လက်ရှိမှာ အိမ်ပြင်သို့မထွက်ရဲသေးကြောင်း လည်း သိရသည်။

သိန္နီတိုက်ပွဲနှင့်ပတ်သက်ပြီး TNLA ထံသျှမ်းသံတော်ဆင့်မှ ဆက်သွယ်မေးမြန်းသော်လည်း ဆက်သွယ်၍မရသေးပေ။

သြဂုတ် လ ၁၅ ရက်နေ့မှစတင်ပြီး ညီနောင် မဟာမိတ် (၃)ဖွဲ့ နှင့် မြန်မာ့တပ်မတော်တို့သည် မူဆယ်-မန္တလေး လမ်းမပေါ် တိုက်ပွဲဖြစ်ပွားကာ အရပ်သား ၁၄ဦး သေဆုံးခဲ့ပြီး ၁၈ဦး ဒဏ်ရာရရှိခဲ့ကြောင်း သိရသည်။