သျှမ်းပြည်နယ် အရှေ့ပိုင်း တာချီလိတ်မြို့ အတွင်း တရားမဝင် နေထိုင်သည့် တရုတ်နိုင်ငံသား တဦး ဖမ်းဆီးရမိကြောင်း သတင်းရရှိသည်။

ဖြစ်စဉ်မှာ တာချီလိတ်မြို့ ပါဆတ်ရပ်ကွက် ဟိုနားရွာ တွင် တရားမဝင်နေထိုင်သည့် တရုတ်နိုင်ငံသား တဦးကို အောက်တိုဘာ ၅ ရက် ညနေပိုင်းတွင် ဖမ်းဆီးရမိကြောင်း တာချီလိတ် မြို့မ ရဲစခန်းမှ စုံစမ်းသိရသည်။

အဆိုပါ မြန်မာပြည်အတွင်း တရားမဝင်နေထိုင်သည့် တရုတ်နိုင်ငံသား Mr.Zhan Zhengcheng သည် တရုတ်နိုင်ငံ ဖုကျန့်ပြည်နယ် စန်မင်စီမြို့ တွင် နေထိုင်သူဖြစ်ကြောင်းသိရသည်။

ထို တရုတ်နိုင်ငံသားသည် လွန်ခဲ့သည့် တလခန့်က ပြည်ဝင်ခွင့် ဗီဇာ မပါဘဲ ပတ်စ်ပို့ (နိုင်ငံကူး လက်မှတ်)ဖြင့် မြန်မာ-လာအို နယ်စပ် မဲခေါင်မြစ် ဝမ်ပုံလမ်းကြောင်းမှ တဆင့် လာကြောင်း တာချီလိတ်မြို့ မ ရဲစခန်း မှ တာဝန်ကျ ရဲက ပြောသည်။

မြန်မာပြည်အတွင်း ဗီဇာမပါဘဲ တရားမဝင်နေထိုင်သည့် တရုတ်နိုင်ငံသားကို တာချီလိတ်မြို့ မရဲစခန်းမှ ၁၉၄၇ ခုနစ် လူဝင်မှု ကြီးကြပ်ရေး(လတ်တလော ပြဌာန်းချက်များ) အက်ဥပဒေ ပုဒ်မ ၃(၁) ကျူး/ ၁၃(ခ) အရ အမှုဖွင့် အရေးယူ ဆောင်ရွက်ထားကြောင်း သိရသည်။

လွန်ခဲ့သည့် ဇူလိုင် ၂ ရက်နေ့တွင်လည်း တာချီလိတ်မြို့နယ် မိုင်းဖုန်း (ခ) ကျေးရွာ အုပ်စု ပါလိုင် ကျေးရွာတွင် တရားမဝင်နေထိုင်သည့် ထိုင်းနိုင်ငံသား ၆ ဦး နှင့် အတူ လက်နက်ခဲယမ်းများ ဖမ်းဆီးရမိခဲ့သည်။

ယခုနှစ်အတွင်း တာချီလိတ်မြို့နယ်တွင် တရားမဝင်နေထိုင်သည့် ထိုင်းနိုင်ငံသားနှင့် တရုတ်နိုင်ငံသားများ မကြာခဏ ဖမ်းဆီးရမိကြောင်း သိရသည်။