တောင်ပိုင်း ၀ တပ်ဖွဲ့၏ အမှတ် ၁၇၁ စစ်ဒေသ တွင် မူးယစ်မှောင်ခိုအဖွဲ့နှင့် ၀ တပ်ဖွဲ့များ ပစ်ခတ်မှုဖြစ်ပွါးခဲ့ပြီးနောက် စိတ်ကြွဆေးပြား သိန်း ၃၀ သယ်ဆောင်လာသည့် မူးယစ်မှောင်ခို သမား ၁ ဦး နှင့် သေဆုံးသည့် အလောင်း ၆ လောင်းအား ဖမ်းဆီးရမိကြောင်း သတင်းရရှိသည်။
အောက်တိုဘာ ၂ ရက် ညနေပိုင်းက စိတ်ကြွဆေးအပြားပေါင်း သိန်း ၃၀ သယ်ဆောင်သည့် မူးယစ် မှောင်ခို သမားများအား “ဝ” တပ်ဖွဲ့ မှ လက်နက်ချ ခိုင်းရာမှ အပြန်အလှန် ပစ်ခတ်မှု ဖြစ်ပွားခဲ့ကြောင်း၊ ထိုပစ်ခတ်မှုကြောင့် မူးယစ်မှောင်ခို အလောင်း ၆ လောင်းနှင့် အရှင် တဦး ထပ်မံဖမ်းဆီးရမိကြောင်း သိရသည်။
ဖမ်းဆီးရမိသည့် အဆိုပါမူးယစ်သယ်ဆောင်သူများသည် အောက်တိုဘာ ၁ ရက်နေ့ ပစ်ခတ်ဖမ်းဆီးမှုမှ ထွက်ပြေးလွှတ်မြောက်သွားသူများဖြစ်ကြောင်း၊ ထိုလွှတ်မြောက်သူများနောက် ၀ တပ်ဖွဲ့မှ လိုက်လံ ရှာဖွေရာ အောက်တိုဘာ ၂ ရက် ညနေ ၅ နာရီအချိန်တွေ့ရှိကာ ပစ်ခတ်မှု ဖြစ်ပွားခဲ့ခြင်းဖြစ်ကြောင်း UWSA ပြောရေးဆိုခွင့်ရှိသူ ဦးညီရမ်းက သျှမ်းသံတော်ဆင့် သို့ ပြောသည်။
“ ကျနော်တို့ ၂ ရက်နဲ့ ၃ ရက် ဆက်တိုက် ဖမ်းမိတယ်။ လက်ရှိတော့ မြေပြင် သတင်း အရ ၂ ရက်နေ့ မှာ စိတ်ကြွဆေးပြားပေါင်း သိန်း ၃၀ ပါ။ အလောင်းကတော့ ၂ ရက်နေ့ ညနေပိုင်းပါ ၆ လောင်း နဲ့ အရှင် ၁ တွေ့ပါတယ်။ ၃ ရက်နေ့ ကတော့ မြေပြင်သတင်း မတက်လာသေးပါဘူး” ဟု ဦးညီရမ်း က ပြောသည်။
အဆိုပါ မူးယစ်ဆေးဝါး သယ်ဆောင်သူများသည် မြန်မာနိုင်ငံ မှ တိုင်းရင်းသားများဖြစ်ကြောင်း၊ လက်ရှိ စိတ်ကြွဆေးပြားသည် မည်သည့် အဖွဲ့ ပိုင်ဆိုင်သည်ကို စစ်ဆေးနေကြောင်းလည်း သိရသည်။
သျှမ်းပြည် အရှေ့ပိုင်း “ဝ” တပ်ဖွဲ့၏ ၁၇၁ စစ်ဒေသအတွင်း ယခုရက်ပိုင်း စိတ်ကြွ ဆေးပြား နှင့် မူးယစ်သယ်ဆောင်သူများဆက်တိုက် ဖမ်းဆီးရမိနေကြောင်းလည်း ဦးညီရမ်း က ပြောသည်။
“ မှောင်ခိုလမ်းကြောင်းဆိုတာ ပုံသေ တွက်လို့ မရပါဘူး။ ကျနော်တို့ ၀ တောင်ပိုင်းတပ်စခန်း က ယိုးဒယားနဲ့ ကီလိုမီတာအားဖြင့် ၄၀၀ လောက်ဘဲရှိတယ်လေ” ဟု ဦးညီရမ်း က ပြောသည်။
ထိုင်းနိုင်ငံသို့ မူးယစ်ဆေးဝါးများရောက်သွားပါက UWSA တပ်ဖွဲ့ ၏ မူးယစ်ဆေးဝါးဟု နာမည်တပ် ပြောဆိုမှု မကြာခဏ ကြုံရပြီး၊ ပြည်တွင်း ၊ပြည်ပ မီဒီယာများကလည်း UWSA တပ်ဖွဲ့၏ပုံရိပ်ကို ကျဆင်းစေမည့်ရေးသားမှုမျိုးဖြင့် ရေးသားတိုက်ခိုက်မှုများကြောင့် UWSA မှ မူးယစ်ဆေးဝါး အထူးစစ်ဆင်ရေး အနေဖြင့် ပိုမိုအားဖြည့်ဖမ်းဆီးနေရခြင်းဖြစ်ကြောင်းလည်း UWSA ပြောရေးဆိုခွင့် က ဖြည့်စွက်ပြောကြားသည်။
“ အရင်ကလည်း ဖမ်းဆီးမှု တွေ ရှိပါတယ်။ ကျနော်တို့ လှုပ်ရှားနေတဲ့တောင်ပိုင်းမှာ မူးယစ်ဆေးဝါးတွေ မဖြတ်သန်းနိုင်အောင် ကျနော်တို့ကြိုးစားလုပ်ဆောင်နေပါတယ်” ဟုလည်း ဦးညီရမ်း က ထပ်လောင်းပြောကြားသည်။
အောက်တိုဘာ ၁ ရက်နေ့ ကလည်း “ဝ” တပ်ဖွဲ့များ အခြေချလှုပ်ရှားသည့် မိုင်းတုံမြို့နယ် ပုံပါကျင်မြို့နယ်ခွဲ ရှိ ထိုင်းနယ်စပ် ဟွေ့အော့ရွာ နမ့်ယုမ်းကျေးရွာ အနီးတွင် စိတ်ကြွဆေးပြား ၁၈သိန်း သယ်ဆောင်လာသည့်အဖွဲ့နှင့်ပစ်ခတ်မှုဖြစ်ပွါးရာ အမျိုးသား ၈ ဦး နှင့် သေဆုံးသည့် အလောင်း ၂ လောင်းကို ဖမ်းဆီးရမိခဲ့ကြောင်း ၀ တပ်ဖွဲ့ကထုတ်ပြန်ပါသည်။
