ထိုင်းနိုင်ငံမြောက်ပိုင်း ချင်းမိုင်ခရိုင်၊ ဖန်မြို့နယ်၊ ချင်းရိုင်မြို့လယ်ခေါင်နှင့် လန်ဖွန်မြို့နယ် တို့တွင် စိတ်ကြွဆေးပြား (ယာဘ) (၅ သန်းကျော်) ကို လမ်းဘေးစွန့်ပစ်ထားမှု၊ မီးပွိုင့်မိစဉ် စီးနင်းဖမ်းဆီးမှုနှင့် ကားဖြင့်တိုက်ပြေးမှု ဖြစ်စဉ်များမှ ဆက်တိုက် ဖမ်းဆီးရမိခဲ့ကြောင်း ချင်းမိုင်သတင်းများတွင် ဖော်ပြသည်။

ထိုင်းမြောက်ပိုင်း ကျေးရွာများမှတဆင့် နိုင်ငံဖြတ်ကျော် မူးယစ်ဆေးဝါးများ အဆက်မပြတ် တိုးမြှင့်ဝင်ရောက်လာနေသဖြင့် အစိုးရ၊ ထိုင်းတော်ဝင်ရဲတပ်ဖွဲ့တို့က ၂၄ နာရီပတ်လုံး ကြားဖြတ်ပိတ်ဆို့သည့် အစီအမံများ အရှိန်မြှင့်နေစဉ်ပင်၊ ၂ ရက်တာကာလအတွင်း စိတ်ကြွဆေးပြား ၅ သန်းကျော် ဖမ်းဆီးမိခဲ့ခြင်းဖြစ်သည်။

ဇွန်လ ၂၁ ရက်နေ့ နံနက်အစောပိုင်းတွင် ချင်းမိုင်ခရိုင်၊ ဖန် (Fang) မြို့နယ်၊ မယ်ဆွန်တိုက်နယ်၊ ဘန်လုံအိုကျေးရွာ လမ်းဘေး၌ သံသယဖြစ်ဖွယ် စွန့်ပစ်ထားသည့် သက်တံရောင်စပ် ဆာလာအိတ် ၂ အိတ်နှင့် ပလတ်စတစ်သေတ္တာ ၁ လုံးတို့ကို ဒေသခံအချို့က တွေ့ရှိခဲ့ကြသည်။

အဆိုပါ အိတ်များနှင့် နက်ပြာရောင် သေတ္တာအတွင်းမှ ခန့်မှန်းခြေ ယာဘပြား ၉၉၄,၀၀၀ ကို အတည်ပြုသိမ်းဆည်းရမိခဲ့သည်။

အာဏာပိုင်များက မူးယစ်ဆေးများကို ထိုသို့ လမ်းဘေးတွင် ချခဲ့ခြင်းမှာ မူးယစ်ဆေးအလှဲအလယ်လုပ်သည့် နေရာမှားချမိခြင်း သို့မဟုတ် ဖမ်းဆီးခံရမည်ကို ကြောက်ရွံ့သဖြင့် လူမရှိဘဲ ပစ္စည်းလာချသွားသည့် (Dead-drop) ပုံစံမျိုး ဖြစ်နိုင်သည်ဟု ယူဆထားကြပြီး မှုခင်းဆေးပညာယူနစ်များက လက်ဗွေနှင့် ဒီအန်အေ (DNA) များကို ခြေရာခံ စစ်ဆေးလျက်ရှိသည်။

အလားတူ ဇွန်လ ၂၁ ရက်တွင်လည်း ချင်းရိုင်ခရိုင် မူးယစ်ဆေးဝါးနှိမ်နင်းရေးရဲတပ်ဖွဲ့သည် ဒေသန္တရရဲတပ်ဖွဲ့တို့နှင့် ပူးပေါင်းကာ ချင်းရိုင်မြို့လယ်ခေါင်ရှိ မီးပွိုင့်တစ်ခုတွင် ရရှိထားသော သတင်းအရ ဘန်ကောက်မြို့မှ အသက် ၄၂ နှစ်အရွယ် အမျိုးသားတစ်ဦး မောင်းနှင်လာသည့် အဖြူရောင် ဟွန်ဒါ (Honda CR-V) ကားကို ကြားဖြတ်ဝိုင်းရံ ဖမ်းဆီးနိုင်ခဲ့သည်။

ဇွန်လ ၁၇ ရက်တွင် အဆိုပါ SUV ကားဖြင့် မူးယစ်ဆေးဝါးများ သယ်ဆောင်မည်ဖြစ်ကြောင်း ထောက်လှမ်းရေး သတင်းရရှိသဖြင့် ရဲတပ်ဖွဲ့က ၃ ရက်တိုင်တိုင် နောက်ယောင်ခံလိုက်ခဲ့သည်။

ထို့နောက် ဇွန်လ ၁၉ ရက် ည ၁၁:၁၀ နာရီတွင် ချင်းရိုင်ခရိုင်၊ မယ်ယောင်းတိုက်နယ်၌ မူးယစ်ဆေးဝါးများ တင်ဆောင်သည့် ကားသည်မြို့ပြင်ပသို့ ထွက်ခွာရန် မောင်းနှင်လာရာ မီးပွိုင့်တွင် ရဲတပ်ဖွဲ့က ကားကို ပိတ်ဆို့ စီးနင်းခဲ့ပြီး ကားအတွင်း ဆာလာအိတ် ၉ အိတ်အတွင်းမှ ယာဘပြား ၁.၈ သန်း ကို ရှာဖွေတွေ့ရှိခဲ့ပြီး ကုန်ပို့သမားအဖြစ် ဆောင်ရွက်ခဲ့သည့် ကားမောင်းသူကို ချင်းရိုင်ရဲစခန်းသို့ လွှဲပြောင်းကာ အမှုဖွင့်ထားသည်။

ထိုနည်းတူ ဇွန်လ ၁၉ ရက်တွင် ချင်းမိုင်ခရိုင် မယ်အွန်မြို့နယ်မှ လန်ဖွန်မြို့ဘက်သို့ မူးယစ်ဆေးဝါးအများအပြား သယ်ဆောင်လာသည့် ကားကိုနောက်ယောင်လိုက် စစ်ဆေးကာ ကားမောင်းသူကကားကို စွန့်ပစ်ခဲ့ပြီး ထွက်ပြေးသွားခဲ့သည်။

စွန့်ပစ်ခဲ့သော ကားနောက်ဖုံးအတွင်းမှ အမည်းရောင် ဆာလာအိတ် ၈ အိတ်နှင့်အတူ ယာဘပြား စုစုပေါင်း ၂,၄၀၀,၀၀၀ (၂.၄ သန်း) ကို သိမ်းဆည်းရမိခဲ့သည်။

ထိုင်းရဲတပ်ဖွဲ့မှ ဒေသခံပြည်သူများအနေဖြင့် မိမိတို့နေရပ် ပတ်ဝန်းကျင်အတွင်း ထူးဆန်းသည့်အပြုအမူများနှင့် သံသယဖြစ်ဖွယ် ပြင်ပသူစိမ်းများတွေ့ရှိပါက သက်ဆိုင်ရာ ရဲစခန်းနှင့် တာဝန်ရှိသူများထံ သတင်းပေးပို့ကြရန် တိုက်တွန်းထားသည်။

ကိုးကား – Chiang Mai News