သျှမ်းပြည်အရှေ့ပိုင်း မိုင်းတုံမြို့နယ်တွင် ‘ဝ’တပ်ဖွဲ့ UWSA (၁၇၁) စစ်ဒေသအတွင်း ဖမ်းဆီးရမိသည့် မူးယစ်ဆေးဝါး စိတ်ကြွဆေးပြား ၁၄ သန်းခန့်ကို စစ်ကော်မရှင်တာဝန်ရှိသူများထံ လွှဲပြောင်းပေးခဲ့ကြောင်း သတင်းသိရသည်။

စက်တင်ဘာလ (၂၉) ရက်တွင် မိုင်းတုံမြို့နယ် ဟွေအော်ကျေးရွာ၌ ‘ဝ’ပြည်သွေးစည်းညီညွတ်ရေးတပ်မတော် UWSA (၁၇၁) စစ်ဒေသအတွင်း ဖမ်းဆီးရမိခဲ့သည့် မူးယစ်ဆေးဝါး စိတ်ကြွဆေးပြား (၁၃,၈၈၀,၈၂၈) ပြား စုစုပေါင်း ၁၄ သန်းခန့်ကို စစ်ကော်မရှင် တာဝန်ရှိသူများထံ လွှဲပြောင်းပေးခဲ့ကြောင်း ‘ဝ’ပြင်ပဆက်ဆံရေးတာဝန်ခံ ဦးညီရမ်းက ၎င်း၏ ဖေ့စ်ဘုတ် လူမှုကွန်ရက်စာမျက်နှာတွင် ဓာတ်ပုံနှင့်တကွ ဖော်ပြထားသည်။

အဆိုပါ လွှဲပြောင်းပေးခဲ့သည့် မူးယစ်ဆေးဝါးများကို ဇူလိုင်၊ ဩဂုတ်နှင့် စက်တင်ဘာလအတွင်း UWSA တောင်ပိုင်းတပ် (၁၇၁) စစ်ဒေသအတွင်း (၄) ကြိမ်ခွဲ၍ ဖမ်းဆီးရမိခဲ့ခြင်းဖြစ်ပြီး စစ်ကော်မရှင်ထံ (၂၄) ကြိမ်မြောက် လွှဲပြောင်းပေးခဲ့ခြင်း ဖြစ်ကြောင်း သိရသည်။

သျှမ်းပြည်အရှေ့ပိုင်း မိုင်းဆတ်ခရိုင်အခြေစိုက် UWSA တောင်ပိုင်းတပ် (၁၇၁) စစ်ဒေသအတွင်းရှိ မူးယစ်တိုက်ဖျက်ရေးအဖွဲ့မှ ဇူလိုင်လ ၆ ရက် ပုလုံရွာအနီးတွင် (၁.၅) သန်းခန့်၊ ဩဂုတ်လ ၁ ရက် မယ်ကျန့်ရွာအနီးတွင် (၁.၉) သန်း၊ ဩဂုတ်လ ၂၈ ရက် ပုံပါကျင် ဝမ်မိုင်ရွာ လမ်းခွဲတွင် (၅.၆၉) သန်း၊ စက်တင်ဘာလ ၂၀ ရက် ထိုင်း-မြန်မာနယ်စပ် နောင်ဝမ်းရွာအနီးတွင် (၄.၈) သန်းခန့် မူးယစ်ဆေးဝါး စိတ်ကြွဆေးပြားများ ဖမ်းဆီးရမိခဲ့ကြောင်း ဆိုသည်။

အလားတူ ဇွန်လ (၈) ရက်တွင်လည်း တရုတ်နိုင်ငံထဲ မူးယစ်ဆေးဝါး ခိုးသွင်းရန် ကြိုးပမ်းခဲ့သည့် မူးယစ်မှောင်ခိုဂိုဏ်းကို ‘ဝ’တပ်ဖွဲ့ UWSA မှ နှိမ်နှင်းပြီး ဖမ်းဆီးရမိသည့် မူးယစ်ဆေးဝါးများကို တရုတ်ရဲတပ်ဖွဲ့ထံ လွှဲပြောင်းပေးအပ်ခဲ့ကြောင်း ‘ဝ’တပ်ဖွဲ့ဘက်မှ သတင်းထုတ်ပြန်ထားသည်။

ပြီးခဲ့သည့် မေလ (၂၇) ရက်တွင် ထိုင်းနိုင်ငံ မူးယစ်ဆေးဝါးထိန်းချုပ်ရေးအဖွဲ့ချုပ် (ONCB) တွင် ပြုလုပ်သည့် မူးယစ်ဆေးဝါး တားဆီးနှိမ်နင်းရေး အစီအမံများနှင့် ပတ်သက်သည့် ဆွေးနွေးပွဲ၌ ‘ဝ’တပ်ဖွဲ့ UWSA နှင့် ဆက်နွယ်နေသော မူးယစ်ဂိုဏ်းများကို နှိမ်နင်းရန် စစ်ကော်မရှင်ဘက်မှ မဖြေရှင်းနိုင်ပါက ထိုင်းအစိုးရကိုယ်တိုင် ဖြေရှင်းရန် တောင်းဆိုမည်ဟုလည်း ထိုင်းဝန်ကြီးချုပ်ဟောင်း သက်ဆင် မှ ပြောဆိုခဲ့ဖူးသည်။

ပုံစာ – UWSA ဖမ်းမိသည့် မူးယစ်ဆေးဝါးများကို စစ်ကော်မရှင်ထံ လွှဲပြောင်းပေးစဉ် (ဓာတ်ပုံ – Nyi Rang FB)